އިންޑިއާގެ ރެސްލިން ފެޑެރޭޝަނުގެ ކުރީގެ ރައީސް އަދި ނުފޫޒު ގަދަ ސިޔާސީ ޝަޚުސިއްޔަތެއް ކަމަށްވާ ބްރިޖް ބުޝަން ޝަރަން ސިންގްގެ މައްޗަށް، އަންހެން އެތުލީޓުންތަކަކަށް ޖިންސީ ފުރައްސާރަ ކުރި ކަމަށް ބުނެ ތިން އަހަރު ކުރިން އުފުލި ދައުވާތަކުން އޭނާ ސަލާމަތްވެއްޖެ އެވެ.
އިންޑިއާގެ ރެސްލިން ފެޑެރޭޝަނުގެ ރައީސްގެ މަގާމުގައި ބްރިޖް ބުޝަން ހުންނެވި ދުވަސްވަރު، އޭނާ ޖިންސީ ފުރައްސާރަ ކުރި ކަމަށް ބުނެ ހަ އަންހެން ރެސްލަރަކު ވަނީ އޭނާގެ މައްޗަށް ތުހުމަތުތަކެއް ކޮށްފަ އެވެ. ނަމަވެސް، ބްރިޖް ބުޝަން ވަނީ އެ ހުރިހާ ތުހުމަތުތަކަކަށް އިންކާރު ކުރައްވާފަ އެވެ.
ބްރިޖް ބުޝަން އަކީ އިންޑިއާގެ ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އަށް ނިސްބަތްވާ ކުރީގެ މެންބަރެކެވެ. އޭނާއަކީ އިންޑިއާގެ ސިޔާސީ ގޮތުން އެންމެ މުހިންމު ސްޓޭޓް ކަމަށްވާ އުއްތަރު ޕްރަދޭޝްގައި ވަރަށް ބޮޑު ނުފޫޒެއް އޮންނަ ބޭފުޅެކެވެ.
ބްރިޖް ބުޝަންއާ ދެކޮޅަށް ކުރެވުނު މި ތުހުމަތުތައް 2023 ވަނަ އަހަރު ދުނިޔޭގެ ސަމާލުކަމަށް އައީ، އިންޑިއާގެ ވެރިރަށް ދިއްލީގައި ހުންނަ އާ ޕާލަމެންޓް އިމާރާތާ ދިމާލަށް ހިނގާލުމެއް ބޭއްވުމަށް މަސައްކަތް ކުރި ރެސްލަރުންތަކެއް ފުލުހުން ހައްޔަރުކުރުމާ ގުޅިގެންނެވެ.
އޮލިމްޕިކް މެޑަލް ހޯދާފައިވާ ސާކްޝީ މާލިކް އާއި ބަޖްރަންގް ޕޫނިއާގެ އިތުރުން، ދުނިޔޭގެ ޗެމްޕިއަންޝިޕްގައި ދެ ފަހަރު މެޑަލް ހޯދާފައިވާ ވިނޭޝް ފޯގަޓް މަގުމަތީގައި ދަމާފައި ގެންގޮސް ފުލުހުންގެ ވޭންތަކަށް އަރުވާ މަންޒަރު ފެންނަ ވީޑިއޯތައް އާންމުވުމާއެކު، މަޝްހޫރު އެތުލީޓުންނާއި އިދިކޮޅު ސިޔާސީ ލީޑަރުންގެ ބޮޑެތި ފާޑުކިޔުންތަކެއް ސަރުކާރަށް އަމާޒުވި އެވެ.
މީގެ އިތުރުން، ބްރިޖް ބުޝަންއާ ދެކޮޅަށް ފިޔަވަޅު އެޅުމަށް ގޮވާލައި، އެ ރެސްލަރުން ވަނީ ދިއްލީގެ މެދުތެރޭގައި ހަފުތާތަކެއް ވަންދެން އިހުތިޖާޖު ކޮށްފަ އެވެ.
މި މައްސަލައިގައި ޑިސްޓްރިކްޓް ކޯޓުން ހުކުމް އިއްވުމާ ގުޅިގެން، ހޯމަ ދުވަހު ބްރިޖް ބުޝަން އިންޑިއާގެ މީޑިއާތަކަށް ބުނީ އޭނާ ހުރީ ވަރަށް "އުފަލުން" ކަމަށާއި އޭނާގެ ވަކީލުންނަށް ޝުކުރު އަދާކުރާ ކަމަށެވެ.
ބްރިޖް ބުޝަންއާ ދެކޮޅަށް ކުރި އިހުތިޖާޖުތަކުގައި އެންމެ އިސްކޮށް އުޅުނު އެއް އެތުލީޓު ކަމަށްވާ ވިނޭޝް ފޯގަޓް، އެކްސްގައި ކުރި ޕޯސްޓެއްގައި ބުނީ ކޯޓުގެ މި ނިންމުމާ މެދު ވަރަށް ބޮޑަށް މާޔޫސްވާ ކަމަށެވެ.
މި ތުހުމަތުތައް ފުރަތަމަ ފެންމަތިވިއިރު، އޭރު ބީޖޭޕީގެ މަޖިލިސް މެންބަރެއްގެ ގޮތުގައި ހުރި ބްރިޖް ބުޝަންއާ ދެކޮޅަށް މޯދީ ސަރުކާރުން އެކަށީގެންވާ އަވަސް ފިޔަވަޅެއް އަޅާފައި ނުވާ ކަމަށް ބުނެ ގިނަ ބަޔަކު ފާޑުކިޔެވެ. ނަމަވެސް ސަރުކާރުން އެ ތުހުމަތުތައް ދޮގުކޮށް ބުނީ، ގާނޫނީ ނިޒާމުގެ ތެރެއިން މައްސަލަ ކުރިއަށްދާނެ ކަމަށެވެ.
މި މައްސަލައިގެ ފިއްތުންތަކާ ހުރެ، 2024 ވަނަ އަހަރުގެ އިންތިޚާބުގައި އުއްތަރު ޕްރަދޭޝްގެ ކައިސަރްގަންޖް ގޮނޑިއަށް ވާދަކުރުމަށް ބީޖޭޕީން ބްރިޖް ބުޝަންއަށް ޓިކެޓެއް ނުދެ އެވެ. އޭގެ ބަދަލުގައި އެ ޕާޓީން ޓިކެޓް ދިނީ ބްރިޖް ބުޝަންގެ ދަރިފުޅަށެވެ. އޭނާ ވަނީ އެ ގޮނޑި ކާމިޔާބު ކޮށްފަ އެވެ.
