މަޝްހޫރު ލަވަކިޔުންތެރިޔާ އެރިއާނާ ގްރާންޑޭގެ "އިޓާނަލް ސަންޝައިން" ޓުއާ އަންނަ މަހު ނިމުމާއެކު، އާންމުންގެ ތެރެއަށް ނުކުމެ އުޅުން ހުއްޓާލުމަށާއި ލަންޑަނުގައި ހުށަހަޅައިދޭން އޮތް މިއުޒިކަލް ޕްރޮޑަކްޝަނެއްގައި ބައިވެރިނުވާން ނިންމައިފި އެވެ.
އުމުރުން 33 އަހަރުގެ އެމެރިކާގެ ލަވަކިޔުންތެރިޔާގެ މަންދޫބަކު "ޕީޕަލް" މެގަޒިންއަށް މައުލޫމާތު ދެމުން ބުނީ، އޭނާގެ ސިފައާ މެދު އާންމުންގެ މެދުގައި މެދުނުކެނޑި ބަހުސްކޮށް ފާޑުކިޔުންތައް އަމާޒުވަމުންދާތީ، މިހާރު ކުރިއަށްދާ ޓުއާ ނިމުމުން އާންމުންގެ ލޮލަށް ފެންނަ ހިސާބުން އޭނާ ދުރަށް ޖެހިލާނެ ކަމަށެވެ.
ސްޓީވަން ސޮންޑްހައިމްގެ "ސަންޑޭ އިން ދަ ޕާކް ވިތު ޖޯޖް" މިއުޒިކަލް 2027 ވަނަ އަހަރު ލަންޑަނުގެ ބާބިކަންގައި އަލުން ހުށަހަޅައިދޭން ތައްޔާރުވަމުންދާ ކުންފުނިން ވަނީ، އެ ޕްރޮޑަކްޝަންގައި އެރިއާނާ ދެން ބައިވެރިނުވާނެކަން ކަށަވަރުކޮށްދީފަ އެވެ. އަދި އެއީ އޭނާގެ އަމިއްލަ ނިންމުމެއް ކަމަށާއި އެ ނިންމުމަށް އެ ކުންފުނީގެ ފުރިހަމަ ތާއީދާއި އިހުތިރާމް އޮތް ކަމަށް ވެސް އެ ކުންފުނިން ބުންޏެވެ.
ވޭތުވެދިޔަ އަހަރުތަކުގައި އެރިއާނާގެ ހަށިގަނޑަށް އައިސްފައިވާ ބަދަލުތަކާއި އޭނާގެ ސިއްހީ ހާލަތާ މެދު އާންމުންގެ މެދުގައި ވަނީ ތަފާތު ވާހަކަތަކެއް ދެކެވިފަ އެވެ.
މީގެ ދެ ދުވަސް ކުރިން އޭނާގެ އެންމެ ފަހުގެ އަލްބަމް "ޕެޓަލް" ނެރުމާއި، އެ އަލްބަމް އިޝްތިހާރު ކުރުމަށް އާންމުކުރި ވީޑިއޯތަކުން އޭނާ ފެންނަ ގޮތުން، މި ވާހަކަތައް ވަނީ އިތުރަށް ގަދަވެފަ އެވެ.
އެރިއާނާގެ މަންދޫބު "ޕީޕަލް" މެގަޒިންއަށް އިތުރަށް ބުނީ، އޭނާގެ އަމާޒަކީ މިހާރު ކުރިއަށްދާ ޓުއާ ވަރަށް އުފާވެރިކަމާއެކު ސިއްހަތު ސަލާމަތުން ހުރެ ނިންމާލުން ކަމަށެވެ. އަދި އޭގެ ފަހުން އާންމުންގެ ފާޑުކިޔުންތަކާ ދުރުގައި، މަސައްކަތުން ބްރޭކެއް ނަގައިގެން އަރާމުކުރަން އޭނާ ބޭނުންވާ ކަމަށް ވެސް މަންދޫބު ބުންޏެވެ.
މީގެ އިތުރުން، އެރިއާނާ ހުށަހަޅައިދޭ ޝޯތަކަކީ ހަށިގަނޑަށް ބުރަ، ހަރަކާތްތައް ގިނަ ޝޯތަކެއް ކަމަށާއި، ކޮންމެ ރެއަކު ވެސް އޭނާ ޝޯތައް ހުށަހަޅައިދެނީ ވަރަށް ފުރިހަމަ ސިއްހަތެއްގައި ހުރެގެން ކަމަށް އޭނާގެ ޓީމުން ބުންޏެވެ.
މި ޓުއާގެ އެންމެ ފަހު ޝޯ އޮންނާނީ އަންނަ ސެޕްޓެމްބަރު މަހުގެ 1 ވަނަ ދުވަހު ލަންޑަނުގަ އެވެ.
"ތޭންކް ޔޫ، ނެކްސްޓް" އަދި "7 ރިންގްސް" ފަދަ މަޝްހޫރު ލަވަތައް ކިޔާފައިވާ އެރިއާނާ، ސޮންޑްހައިމްގެ 1984 ވަނަ އަހަރުގެ މަޝްހޫރު މިއުޒިކަލްގައި ފެންނާނެ ކަމަށް ކުރިން އޮތީ އިއުލާންކޮށްފަ އެވެ. މި ޕްރޮޑަކްޝަންގައި އޭނާއާއެކު ފެންނާނީ "ވިކެޑް" ފިލްމުން ވެސް އޭނާއާއެކު ފެނިގެންދާ އިނގިރޭސި އެކްޓަރު ޖޮނަތަން ބެއިލީ އެވެ.
ޕުލިޓްޒާ އިނާމު ހޯދާފައިވާ މި މިއުޒިކަލްގައި އެރިއާނާގެ ބަދަލުގައި ދެން ފެންނާނީ ކާކުކަން އަދި އިއުލާނެއް ނުކުރެ އެވެ.
އެރިއާނާގެ ސިފައާ މެދު ފާޑުކިޔުންތައް އަލުން ގަދަވީ، އޭނާގެ އާ އަލްބަމް "ޕެޓަލް" ގައި ހިމެނޭ އެ ނަމުގެ ލަވައިގެ މިއުޒިކް ވީޑިއޯ ނެރުމާ ގުޅިގެންނެވެ.
އެ ވީޑިއޯގައި އެރިއާނާ ކުޅެފައިވަނީ އޮޑިޝަންތަކުގައި ބައިވެރިވާ ފަންނާނެއްގެ ރޯލެވެ. އެ ވީޑިއޯއިން ފެންނަ ގޮތުގައި، އޭނާއަކީ "ކުރިއަށްދާން އެކަށީގެންވާ މީހެއް ނޫން" ކަމަށާއި، "މާ ބޮޑަށް މަސައްކަތް ބޭނުންވާ" މީހެއް ކަމަށް ބުނެ މީހުން ފާޑުކިޔަ އެވެ. އަދި އޭނާގެ ސިފަ ރީތިކުރަން "ސާޖަރީ" ހަދަން ޖެހޭ ކަމަށާއި، އަނެއްބައި ފަހަރު "މާ ގިނައިން ސާޖަރީ ހަދާފައިވާ" ކަމަށް ބުނެ މީހުން ދިމާކުރެ އެވެ. އެ ވީޑިއޯ ނިމެނީ އެ ފާޑުކިޔާ މީހުންނަށް އޭނާ ރައްދުދޭ މަންޒަރުންނެވެ.
