އެމެރިކާގެ އެރިޒޯނާގެ ސްވިމިން ޕޫލަކަށް ގެނބިގެން ހަބަރު ހުސްވެފައި އޮއްވާ ފެނިގެން މަރުވި ކަމަށް ކަނޑައެޅި ތުއްތު ކުއްޖަކު، ހޮސްޕިޓަލުގެ މޯޗަރީގައި ބާއްވާފައި އޮއްވާ ދިރިހުރިކަން އެނގިފައިވާ ކަމަށް ފުލުހުންގެ ރިޕޯޓަކުން ހާމަވެއްޖެ އެވެ.
އުމުރުން އެންމެ 18 މަހުގެ މި ފިރިހެން ކުއްޖާ، ގެއެއްގެ ޕޫލް ތެރޭގައި ގެނބިފައި އޮއްވާ ފެނުމުން، އެ ކުއްޖާގެ އާއިލާއިން ފުލުހުންނަށް ގުޅާފައިވަނީ މިދިޔަ ފެބްރުއަރީ މަހުގެ 8 ވަނަ ދުވަހު އެވެ.
ހާދިސާ ހިނގި ސަރަހައްދަށް ވަގުތުން ފުރަތަމަ އެހީތެރިކަން ފޯރުކޮށްދޭ ފަރާތްތައް ގޮސް، ކުއްޖާގެ ފުރާނަ ސަލާމަތް ކުރުމަށް މަސައްކަތް ކުރުމަށް ފަހު ހޮސްޕިޓަލަށް ގެންދިޔަ އެވެ. ނަމަވެސް ހޮސްޕިޓަލަށް ގެންދިޔަތާ ގަޑިއިރެއް ފަހުން އެ ކުއްޖާ މަރުވެފައިވާ ކަމަށް ޑޮކްޓަރުން ވަނީ ކަނޑައަޅާފަ އެވެ.
ފުލުހުންގެ ރިޕޯޓުގައިވާ ގޮތުން، އެ ކުއްޖާގެ ހަށިގަނޑުން ދިރިހުރިކަމުގެ ނިޝާންތަކެއް ފެންނަ ކަމަށް ފުލުހުން އެ ވަގުތު ހޮސްޕިޓަލުގައި ހުރި ޑޮކްޓަރު އާރިއަން ތޫސީ ގާތު ބުންޏެވެ. ނަމަވެސް އެ ޑޮކްޓަރު ޖަވާބުގައި "ތިޔަބޭފުޅުންގެ މަސައްކަތް ތިޔަބޭފުޅުން ކުރައްވާ، އަދި އަޅުގަނޑުގެ މަސައްކަތް އަޅުގަނޑަށް ކުރަން ދޫކޮށްލާ،" ކަމަށް ބުނި ކަމަށް ރިޕޯޓުގައިވެ އެވެ.
އެ ރިޕޯޓުގައިވާ ގޮތުން ޑޮކްޓަރު ތޫސީ އިތުރަށް ބުނެފައިވަނީ އޭނާ މެޑިކަލް ސްކޫލަށް ދިޔައީ ސަބަބެއް އޮވެގެން ކަމަށެވެ.
ކުއްޖާ ގެނބިގެން ފުލުހުންނަށް ރިޕޯޓްކުރި ވަގުތަކީ، އެމެރިކާގެ އެންއެފްއެލް ސުޕަ ބޯލް މެޗު ބަލަން އެ އާއިލާގެ މީހުން އެއްވެ ތިބި ވަގުތެކެވެ.
އެންބީސީ ނިއުސްއަށް ލިބިފައިވާ ފުލުހުންގެ ބޮޑީކެމް ވީޑިއޯއިން ފެންނަ ގޮތުގައި، "އެއްވެސް އިއުތިރާޒެއް ނެތް ނަމަ، މަރުވި ވަގުތު ކަނޑައަޅަން އަޅުގަނޑު ބޭނުން،" ކަމަށް ޑޮކްޓަރު ތޫސީ ބުނެ އެވެ.
ޑޮކްޓަރު ބުނެފައިވަނީ މަރުވި ވަގުތަކީ 18:20 ކަމަށެވެ.
ނަމަވެސް، މެރިކޯޕާ ކައުންޓީ މެޑިކަލް އެގްޒެމިނާސް އޮފީހުން ހަށިގަނޑު ބަލާ ދިޔަ މީހަކަށް، ފަސް ގަޑިއިރު ފަހުން އެ ކުއްޖާ އަދިވެސް ނޭވާލާކަން ފާހަގަކުރެވުނު ކަމަށް ފުލުހުން ބުނެ އެވެ.
އެއާއެކު ވަގުތުން އެހެން ހޮސްޕިޓަލަކަށް އެ ކުއްޖާ ވައިގެ މަގުން ގެންގޮސް ފަރުވާ ދިނުމުން، އޭނާގެ ހާލު ރަނގަޅުވެ މިހާރު ވަނީ ހޮސްޕިޓަލުން ދޫކޮށްލާފަ އެވެ.
ޑޮކްޓަރުގެ ވަކީލު ސްކޮޓް ހޯލްޑަން ބީބީސީއަށް ފޮނުވި އީމެއިލް ބަޔާނެއްގައި ބުނެފައިވަނީ، އާއިލާއަށް އިހުތިރާމް ކުރުމުގެ ގޮތުންނާއި ބަލިމީހާގެ ސިއްރު ހިފެހެއްޓުމުގެ ގޮތުން، މި ވަގުތު އެއްވެސް އެއްޗެއް ބުނަން ބޭނުންނުވާ ކަމަށެވެ.
މި މައްސަލައިގައި ފުލުހުން ދަނީ ކުއްޖާގެ މައިންބަފައިންގެ މައްޗަށް އިހުމާލުވުމުގެ ދައުވާ ކުރުމަށް ލަފާދެމުންނެވެ.
ފުލުހުންގެ ރިޕޯޓުގައިވާ ގޮތުން، ތަހުގީގު ކުރި ފަރާތްތަކަށް އެ ގޭތެރެއިން މަސްތުވާތަކެތީގެ ބާވަތެއް ކަމަށްވާ މަރުއާނާ ވަސް ވަރަށް ގަދައަށް ދުވި އެވެ. އެހެންކަމުން، އެ ކުއްޖާ ޕޫލް ކައިރިއަށް ދިޔައީ ބެލެނިވެރިއެއްގެ ސަމާލުކަން ނެތި ކަމަށް ބެލެވޭ ކަމަށް ފުލުހުން ބުނެ އެވެ.
