ނިއު ޔޯކް، ޔުނައިޓެޑް ސްޓޭޓްސް (ޖުލައި 15) - މި ފަހަރުގެ ފީފާ ވޯލްޑް ކަޕްގެ ފައިނަލް މެޗުގައި ބޭނުންކުރާ ގިނަ ތަކެތި ހިމެނޭ ނީލަން ކިއުމެއް ބާއްވަން ނިންމާފައިވާ ކަމަށް ނިއު ޔޯކް އޯކްޝަން ހައުސް އިން އިއުލާނުކޮށްފި އެވެ.
ފީފާ ވޯލްޑް ކަޕް ފުޓްބޯޅަ މުބާރާތުގެ ފައިނަލް މެޗު ކުރިއަށްދާނީ މި މަހު 19 ވަނަ ދުވަހުގެރޭގަ އެވެ. އޮންލައިންކޮށް ކުރިއަށްގެންދަން ހަމަޖެހިފައިވާ މި ނީލަން ކިޔުން މި މަހުގެ 22 ވަނަ ދުވަހުން ފެށިގެން ތިން ހަފްތާގެ މުއްދަތަށް ކުރިއަށްގެންދިއުމަށް ވަނީ ހަމަޖައްސައިފަ އެވެ.
މިއީ، ފީފާގެ ގްލޯބަލް ސިޓިޒެން އެޑިއުކޭޝަން ފަންޑުން އިންތިޒާމްކުރާ ނީލަމެކެވެ. މި ނީލަން ކިއުމުގެ ޓާގެޓަކީ، 100 މިލިއަން ޑޮލަރުގެ އާމްދަނީއެއް ހޯދުމެވެ.
މި ނީލަން ކިއުމުގައި ވިއްކުމަށް ހަމަޖެހިފައިވާ ތަކެތީގެ ތެރޭގައި، ވޯލްޑް ކަޕްގެ ހުޅުވުމުގެ ރަސްމިއްޔާތާއި ނިންމުމުގެ ރަސްމިއްޔާތުގައި، ކޮލަމްބިއާގެ ލަވަކިޔުންތެރިޔާ ބޭނުންކުރާ ހެދުމާއި ވޯލްޑް ކަޕްގެ މެޗުތަކުގައި ބޭނުންކޮށްފައިވާ ބޯޅަތަކާއި 2022 ވަނަ އަހަރުގެ ވޯލްޑް ކަޕްގައި ލިއޮނަލް މެސީ ބޭނުންކޮށް، ސޮއިކޮށްފައިވާ ޖޯޒީ އަކާއި މި ފަހަރުގެ ވޯލްޑް ކަޕްގެ ފައިނަލް ކުޅޭ މެޓްލައިފް ސްޓޭޑިއަމްގެ ވިނަކޮޅުތަކާއި، ފައިނަލް މެޗުގައި އައިޓަމްތައް ގެނެސްދޭ އެކި ފަންނާނުން ބޭނުންކުރާ ބައެއް ސާމާނު ހިމެނެ އެވެ.
މި ފަހަރުގެ ވޯލްޑް ކަޕްގެ ފައިނަލުގެ ހާފްޓައިމްގައި 11 މިނިޓްގެ ޝޯއެއް ދޭ ގޮތަށް ވަނީ ހަމަޖެހިފަ އެވެ. މި ޝޯގައި ޝަކީރާ އާއި މެޑޯނާ، ޖަސްޓިން ބީބާ އަދި ބީޓީއެސްގެ އިތުރުން، އެހެން މަޝްހޫރު ފަންނާނުން ވެސް ހަރަކާތްތެރިވާ ގޮތަށް ވަނީ ހަމަޖެހިފަ އެވެ.
ފީފާ އިން ވޯލްޑް ކަޕް ބާއްވަން ފަށައި، މިހާތަނަށް ތާރީހުގައި ވެސް ތިން ގައުމެއް ބައިވެރިވެގެން ހޯސްޓްކުރުމުގެ ފުރުސަތު ދިނީ އެންމެ ފުރަތަމަ ފަހަަރަށް މި އަހަރު އެވެ. އެ ގޮތުން، އެމެރިކާއާ ގުޅިގެން، މެކްސިކޯ އާއި ކެނަޑާ އިން މި ވޯލްޑް ކަޕް ހޯސްޓްކުރިއިރު، މުބާރާތުގެ ހުޅުވުމުގެ ރަސްމިއްޔާތު ތިން ގައުމުގައި ވެސް ކުރިއަށް ގެންގޮސްފައިވެ އެވެ.
