ޑަކާރު، ސެނެގާލް (ޖުލައި 13) - މި ފަހަރުގެ ފީފާ ވޯލްޑް ކަޕްގައި ސެނެގާލްގެ ކޯޗަކަށް ހުރި ޕާޕޭ ތިއާއޮ މަގާމުން ވަކިކުރަން، ސެނެގާލްގެ އެފްއޭގެ ހިންގާ ކޮމިޓީން ނިންމައިފި އެވެ.
މި ފަހަރުގެ ވޯލްޑް ކަޕުން ސެނެގާލް ކެޓީ ގަދަ 32 ޓީމު ކުޅުނު ބުރުގަ އެވެ. އެ ގޮތުން، ނޮކައުޓްގެ ފުރަތަމަ ބުރުގައި، ސެނެގާލުން ރަނގަޅު ލީޑެއްގައި އޮވެމެ، ފަހު ވަގުތު ބެލްޖިއަމް އަތުން ބަލިވެ މުބާރާތުން ކެޓީ އެވެ. މެޗުގެ 86 ވަަނަ މިނިޓާ ހަމައަށް ދެ ގޯލު ކުރީގައި އޮތް ސެނެގާލާ ދެކޮޅަށް ބެލްޖިއަމުން ފަހު ވަަަގުތު ނަތީޖާ ނެރުނީ، 2-2 އިން އެއްވަރުކޮށް އިތުރުވަގުތުގެ ދެ ހާފު ކުޅެގެން، 3-2 އިން މޮޅުވެގެންނެވެ.
ވޯލްޑް ކަޕްގެ ކަންކަން ރިވިއު ކުރަން ސެނެގާލްގެ ފުޓްބޯޅަ އެސޯސިއޭޝަންގެ ހިންގާ ކޮމިޓީން ބޭއްވި ބައްދަލުވުމުގައި، ސެނެގާލްގެ ފުޓްބޯޅަ އިދާރާގެ ޓެކްނިކަލް ޑިޕާޓްމަންޓުން ތައްޔާރުކޮށްފައިވާ ރިޕޯޓާއި ކޯޗު ތިއާއޮގެ މަސައްކަތް ވަނީ ރިވިއުކޮށްފަ އެވެ. އަދި، ކަންކަން ބެލި ބެލުމުގައި ތިއާއޮ ޒިންމާ ނަގަން ޖެހޭ ކަންކަން އަތުން ދޫވެފައި ހުރުމާއި، ޖަވާބުދާރީވާން ޖެހޭ ބައެއް ކަންކަމުގައި ފަރުވާ ކުޑަވެފައިވާތީވެ، ސެނެގާލް އެފްއޭ އިން ނިންމީ ތިއާއޮ ވަކިކޮށް އާ ކޯޗެއް ގެންނަން ޖެހޭ ކަމަށެވެ.
ސެނެގާލް ފުޓްބޯޅަ އިދާރާއިން ބުނީ، އާ ވިސްނުންތަކަކާ އެއްގޮތަށް ގައުމީ ފުޓްބޯޅަ ޓީމުތަކުގެ އޮނިގަނޑު ހަރުދަނާ ސިސްޓަމެއްގެ ތެެރެއިން ހިންގުމަށް ފުރުސަތު ދިނުމަށްޓަކައި، އާ ކޯޗެއްގެ ބެލުމުގެ ދަށުން ކަންކަން ކުރިއަށްގެންދަން ޖެހޭ ކަމަށް އެފްއޭ އަށް ގަބޫލުކުރެވޭ ކަމަށެވެ.
ރިޕޯޓްތައް ބުނާގޮތުން ސެނެގާލް ފުޓްބޯޅަ ފެޑެރޭޝަނުން އަންނަނީ ގިނަ ކޯޗުންތަަކަކާ މަޝްވަރާ ކުރަމުންނެވެ. އެ ގޮތުން، އެ ޓީމުން ބޭނުންވަނީ ބައިނަލްއަގުވާމީ ފުޓްބޯޅައިގެ މަތީ ލެވަލްގައި ކުޅެ، ކޯޗިން ތަޖުރިބާ ވެސް ހާސިލްކޮށްފައިވާ ފަރާތަކާ ޓީމު ހަވާލުކުރާށެވެ. އެ ގޮތުން، އެ ޓީމުން ގެންގުޅޭ ކޯޗުންގެ ޝޯޓްލިސްޓުގެ ތެރޭގައި، އުޒްބެކިސްތާނަށް މި ފަހަރުގެ ވޯލްޑް ކަޕްގައި ކޯޗުކޮށްދިން އިޓަލީގެ ފަބިއޯ ކަނަވާރޯ އާއި ފްރާންސްގެ ކުރީގެ މިޑްފީލްޑަރު، ޕެޓްރިކް ވިއޭރާ ހިމެނެ އެވެ.
