އެޓްލަންޓާ، ޔުނައިޓެޑް ސްޓޭޓްސް (ޖުލައި 8) - މި ފަހަރުގެ ފީފާ ވޯލްޑް ކަޕްގެ ފައިނަލަށް އާޖެންޓީނާ ގޮސްފިނަމަ ބޭނުމީ ސްޕެއިނާ ދެކޮޅަށް ކުޅޭ މެޗެއް ކަމަށް އާޖެންޓީނާގެ ކޯޗު، ލިއޮނަލް ސްކަލޯނީ ބުނެފި އެވެ.
އެންމެ ފަހުގެ ޗެމްޕިއަން، އާޖެންޓީނާ އިން މި ފަހަރުގެ ވޯލްޑް ކަޕްގެ ކުއާޓާ ފައިނަަލަށް ދަތުރުކުރީ، ގަދަ 16 ބުރުގައި ފަހަތުން އަރައި 3-2 އިން މިސްރު ބަލިކޮށްފަ އެވެ. އާޖެންޓީނާ އިން މި ފަހަރުގެ ވޯލްޑް ކަޕްގެ ނޮކައުޓް ބުރުގައި ކުޅުނު ދެ މެޗުން ވެސް މޮޅުވީ އުނދަގުލުންނެވެ. އެ ގޮތުން، ގަދަ 32 ޓީމުގެ ބުރުގައި، ކޭޕް ވާޑް އަތުން މޮޅުވީ ވެސް އިތުރު ވަގުތުގެ ދެ ހާފު ކުޅެގެން، 3-2 އިންނެވެ.
ކޮޕަ އެމެރިކާގެ ޗެމްޕިއަނުންނާއި ޔޫރޯގެ ޗެމްޕިއަނުން ކުޅޭ ފައިނަލިސިމާ މެޗު މިދިޔަ މާޗް މަހު ކުޅެން ރޭވި ނަމަވެސް، މެދުއިރުމަތީގައި ކުރިއަށްދިޔަ ހަނގުރާމައިގެ ސަަބަބުން އެ މެޗު ޖެހުނީ ކެންސަލްކުރާށެވެ. އެ މެޗު ކުރިއަށްދިޔަނަމަ ބައްދަލުކުރަން އޮތީ އާޖެންޓީނާ އާއި ސްޕެއިން އެވެ.
ސްޕެއިނާއި އާޖެންޓީނާ ކުޅެން އޮތް "ފައިނަލިސިމާ" މެޗު ކެންސަލް
ފުޓްބޯޅައިގެ ވަރުގަދަ ދެ ބައްރު ކަމަށްވާ ދެކުނު އެމެރިކާ އާއި ޔޫރަޕްގެ ޗެމްޕިއަނުންގެ މެދުގައި ކުޅޭ، "ފައިނަލިސިމާ" ގައި އާޖެންޓީނާ އާއި ސްޕެއިން ބައްދަލުކުރާ މެޗު ގަތަރުގައި ނުކުޅެވި ވަނީ ކެންސަލްކޮށްފައި.
އެ މެޗަށް އިޝާރާތްކޮށް، ސްކަލޯނީ ބުނެފައިވަނީ، މި ފަހަރުގެ ވޯލްޑް ކަޕްގެ ފައިނަލަށް އާޖެންޓީނާ ދަތުރުކޮށްފިނަމަ، ސްޕެއިނާ ދެކޮޅަށް ކުޅެން ބޭނުންވާ ކަމަށެވެ.
"އަަަހަރެެމެން ފައިނަލުގައި ސްޕެއިނާ ކުޅެން ޖެހިއްޖިިއްޔާ ހެޔޮ ހިތުން ގަބޫލުކުރާނަން. އަހަރެމެން މަސައްކަތް މި ކުރަނީ ފައިނަލަށް ދާން،" ސްކަލޯނީ ބުންޏެވެ.
ސްކަލޯނީ ވަނީ މި ފަހަރުގެ ވޯލްޑް ކަޕަކީ އެއްވެސް ގައުމަކަށް ފަސޭހަނުވާނެ މުބާރާތެއް ކަމަށް ބުނެފަ އެވެ. އަދި، ނޮކައުޓް ބުރުގެ މެޗުތަކުގެ ނަތީޖާތައް ނުކުންނަ ގޮތުން އެކަން ސާފުވާނެ ކަމަށް ވެސް ސްކަލޯނީ ވަނީ ބުނެފަ އެވެ.
"ފްރާންސް އެ އޮތީ ވަރަށް ވަރުގަދަކޮށް، އެކަމަކު، އެ މީހުންނަށް ޕެރަގުއޭ ކައިރިން ވެސް އުނދަގޫވި. ސްޕެއިނުން ޕޯޗުގަލް ބަލިކުރި، އެކަމަކު އެއީ ވެސް ފަސޭހަ މެޗެއް ނޫން. އެއްވެސް ޓީމަކަށް ކުރިން ދައްކަމުން އައި ލެވަލްގެ ކުޅުމެއް ދައްކަން އުނދަގޫ ކަމަކަށްވެފައި މި އޮތީ. އެއީ، އިދިކޮޅު ޓީމުތައް މި އަންނަނީ ވަރަށް ތައްޔާރުވެގެން،"
ޕޮޗެޓީނޯ ވަނީ ވޯލްޑް ކަޕަށް އައިއިރު ކުޅުންތެރިންގެ ފިޒިކަލް ފިޓްނަސް ހުރި ގޮތުން މެޗުތަކުގައި ގޮންޖެހުންތަކާ ކުރިމަތިލާން ޖެހޭ ކަމަށް ބުނެފަ އެވެ. އެއީ، ގިނަ ކުޅުންތެރިން އައީ ކްލަބް ފުޓްބޯޅަ ސީޒަނުގައި ގިނަ މެޗުތަކެއް ކުޅެފައި ކަމަށްވާތީ އެވެ.
މި ފަހަރުގެ ވޯލްޑް ކަޕްގެ ކުއާޓާ ފައިނަލުގައި އާޖެންޓީނާ އިން ކުޅޭނީ ގަދަ 16 ގައި ޕެނަލްޓީ ޖަހައިގެން ކޮލަމްބިއާ ބަލިކުރި ސްވިޒަލެންޑްއާ އެވެ.
