އާދީއްތަ ދުވަހުގެ ރޭ ގ. ފުންފަޅު ގޭގައި އަލިފާނުގެ ހާދިސާއެއް ހިނގައި ބޮޑެތި ގެއްލުންތަކެއް ލިބުނީ ޕަވާ ބޭންކެއް ގޮވުމުގެ ސަބަބުން ކަމަށް އެނގިފައިވެ އެވެ. މިފަދަ އެތައް ހާދިސާއެއް އެހެން ގައުމުތަކުގައި ވެސް ތަކުރާރުކޮށް ހިނގާފައި އެބަ ހުއްޓެވެ. އެހެންވެ، މި ލިޔުމުގައި ބަލާމިލަނީ ޕަވާ ބޭންކުގައި އަލިފާން ރޯވާން މެދުވެރިވެދާނެ ސަބަބުތަކާއި އެ ނުރައްކަލުން ސަލާމަތް ކުރެވިދާނެ ބައެއް ކަންކަމެވެ.
ޕޯޓަބަލް ޗާޖަރު ނުވަތަ ޕަވާ ބޭންކާ ބެހޭ ގޮތުން އެނގެންޖެހޭ މައިގަނޑު ކަންތައްތަކެއް އެބަ ހުއްޓެވެ. އެންމެ މުހިންމު ކަމަކީ އެ އުފައްދާފައިވާ ގޮތް ދެނެގަތުމެވެ. ޕަވާ ބޭންކު ބަހާލާފައި ވަނީ މައިގަނޑު ތިން ބަޔަކަށެވެ. އެއީ؛
- ބެޓެރީ: މިއީ ޕަވާ ބޭންކުގެ އެންމެ މުހިންމު ބަޔެވެ. ޕަވާ ބޭންކުތަކުގައި އާންމުކޮށް ބޭނުންކުރަނީ ލިތިއަމް-އަޔަން ނުވަތަ ލިތިއަމް-ޕޮލިމަރ ބެޓެރީ އެވެ. ލިތިއަމް-އަޔަން ބެޓެރީގައި ހަކަތަ ގިނައިން ރައްކާކުރެވުނަސް އެހެން ޕަވާ ބޭންކުތަކަށް ވުރެ ބަރުވާނެ އެވެ. އަދި ރަނގަޅަށް ނުގެންގުޅެފިނަމަ ހޫނުވުމުގެ ފުރުސަތު ބޮޑެވެ. ލިތިއަމް-ޕޮލިމަރ ބެޓެރީއަކީ ލުއި، ތުނި ޑިޒައިންތަކަށް މާ އެކަށީގެންވާ ބެޓެރީއެކެވެ.
- ސާކިޓް ބޯޑް: މިއީ ޕަވާ ބޭންކުގެ އެތެރޭގައި ހުންނަ މުހިންމު އިލެކްޓްރޯނިކް ނިޒާމެކެވެ. މިއީ ކަރަންޓު ދައުރުވުން ކޮންޓްރޯލްކޮށް، ގުޅާފައިވާ ޑިވައިސްތަކަށް އެއްވަރެއްގައި ވޯލްޓޭޖާއި ކަރަންޓު ފޯރުކޮށްދޭ ބަޔެވެ. މީގެ ތެރޭގައި މައިކްރޯކޮންޓްރޯލާސް، ރެސިސްޓާސް، ކެޕޭސިޓާސް އަދި ވޯލްޓޭޖް ރެގިއުލޭޓަރު ފަދަ ބައިތަކުގެ އިތުރުން، އޯވާޗާޖް ހިމާޔަތްކުރުމާއި، ޝޯޓް-ސާކިޓް ހުއްޓުވުމާއި، ހޫނުމިން މޮނިޓަކުރުން ފަދަ ރައްކާތެރިކަމުގެ ފީޗާސްތައް ހިމެނެއެވެ.
- އިންޕުޓް އަދި އައުޓްޕުޓް ޕޯޓްތައް: މިއީ ޕަވާ ބޭންކު ޗާޖުކުރުމަށާއި ކަރަންޓު ދޫކުރުމަށް ބޭނުންކުރާ ޖެކްތަކެވެ. އިންޕުޓް ޕޯޓްތައް ބޭނުންކުރަނީ ޕަވާ ބޭންކު ޗާޖުކުރުމަށެވެ. އެންމެ އާންމުކޮށް ހުންނަނީ ޔޫއެސްބީ-ސީ އަދި މައިކްރޯ-ޔޫއެސްބީ އެވެ. މީގެ ތެރޭގައި ޔޫއެސްބީ-ސީ، ލައިޓްނިން އަދި ޔޫއެސްބީ-އޭ ހިމެނެއެވެ.
ޕަވާ ބޭންކެއް މަސައްކަތްކުރަނީ އޭގެ އެތެރޭގައިވާ ލިތިއަމް-އަޔަން ބެޓެރިން ކަރަންޓު އުފައްދައި، ވޯލްޓޭޖް ކޮންޓްރޯލްކުރާ ސާކިޓް ބޯޑެއްގެ އެހީގައި، ޔޫއެސްބީ ޕޯޓުން ބޭރުކޮށްގެން ފޯނަށް ޗާޖު ފޯރުކޮށްދީގެންނެވެ.
ޕަވާ ބޭންކުގައި އަލިފާން ރޯވަނީ ކީއްވެ؟
ޕަވާ ބޭންކު ބޭނުންކުރަމުން ދިޔަސް ނުވަތަ ބޭނުން ނުކޮށް ބާއްވާފައި އޮއްވައިވެސް އޭގައި އަލިފާން ރޯވެދާނެ އެވެ. އާންމުގޮތެއްގައި މިއީ ރައްކާތެރި އެއްޗެހި ކަމަށް ވިޔަސް، ބައެއް ހާލަތްތަކުގައި ނުރައްކާ ބޮޑުވެ އެވެ.
- އޯވާޗާޖުވުމުގެ މައްސަލަތައް: ޕަވާ ބޭންކު އެއްކޮށް ޗާޖުވުމަށްފަހުވެސް ޕްލަގަށް ޖަހާފައި ބެހެއްޓުމުން އޯވާޗާޖުވެ އެވެ. މީގެ ސަބަބުން މާބޮޑަށް ހޫނުވެ، ނުރައްކާތެރި ހާލަތްތަކުގައި އަލިފާން ރޯވެ އެވެ. ޒަމާނީ ގިނަ ޕަވާ ބޭންކުތަކުގައި އޯވާޗާޖް ޕްރޮޓެކްޝަން ހުންނަ ނަމަވެސް، ފުލްކޮށް ޗާޖުވުމުން ވަގުތުން ނައްޓާލުމަށާއި، ރޭގަނޑު ނިދާއިރު ޗާޖަށް ޖަހާފައި ނުބެހެއްޓުމަށް ސަމާލުވާށެވެ.
- ޝޯޓް ސާކިޓް: ބެޓެރީގެ ޕޮޒިޓިވް އަދި ނެގެޓިވް އިލެކްޓްރޯޑްތައް ދިމާވުމުން އެތެރޭގެ ޝޯޓް ސާކިޓްތައް އުފެދެ އެވެ. މިއީ ގިނަފަހަރަށް އެތެރޭގެ ބަޔަކަށް ގެއްލުމެއް ވުމުން ނުވަތަ ފެނުގެ އަސަރުކުރުން ނުވަތަ ތަޅުދަނޑި، ފައިސާ ފޮތި ފަދަ ދަގަނޑު އެއްޗަކާ ކުއްލިއަކަށް ދިމާވުން ފަދަ ސަބަބުތަކާ ހުރެ މެދުވެރިވާ ކަމެކެވެ.
- ހަލާކުވެފައިވާ ބެޓެރީ: ޕަވާ ބޭންކު ވެއްޓުން ނުވަތަ އެހެން ގޮތަކުން ވިޔަސް ހަލާކުވުމުން އެތެރޭގެ ބައިތަކަށް ގެއްލުންވެ، ކޮންޓްރޯލް ނުކުރެވޭ ވަރަށް ހޫނުވާން މެދުވެރިވެ އެވެ. ޕަވާ ބޭންކު ވެއްޓިއްޖެނަމަ، ވަގުތުން އާ އެއްޗަކަށް ބަދަލުކުރާށެވެ. އެއީ އޭގެ އެތެރޭގެ އޮނިގަނޑަށް ބަދަލު އައިސް ނުރައްކަލެއް ކުރިމަތިވެދާނެތީ އެވެ.
- ނުރަނގަޅު ގޮތުގައި ބޭނުންކުރުމާއި ރައްކާކުރުން: ޕޯޓަބަލް ޗާޖަރެއް މާ ބޮޑަށް ހޫނު ނުވަތަ ތެއްކެއް ހުންނަ ތަނެއްގައި ބެހެއްޓުމުން އޭގެ ބެޓެރީ ސެލްތަކަށް ގެއްލުންވެއެވެ. ހަމައެހެންމެ، މާ ގިނައިރު ޗާޖުކުރުމާއި ނުގުޅޭ ޗާޖަރު ބޭނުންކުރުމަކީވެސް މައްސަލައެކެވެ. ބެޓެރީއަށް ލިބޭ މިފަދަ ގެއްލުންތަކުގެ ސަބަބުން މާބޮޑަށް ހޫނުވެ، އަލިފާނުގެ ނުރައްކާ ބޮޑުވެއެވެ.
- ކޮލިޓީ ދަށް ޕަވާ ބޭންކުތައް: އަގުހެޔޮ މާއްދާތަކާއި ދަށް ފެންވަރަށް ތައްޔާރުކޮށްފައި ހުންނަ ތަކެތީގެ ސަބަބުން ރެނދުލުމާއި، ލޫޒް ކަނެކްޝަންތައް އުފެދި، ރައްކާތެރިކަން ގެއްލެއެވެ. މިފަދަ ކޮލިޓީ ދަށް ތަކެތި ހަދާއިރު، ސޭފްޓީ ފީޗާސްތައް ނުހިމަނާ ނުވަތަ ދަށް ފެންވަރުގެ ބެޓެރީ ބޭނުންކޮށްގެން އަގު ހެޔޮކުރަން އުޅުމުގެ ސަބަބުން، އިތުބާރު ހުރި ބްރޭންޑްތަކާ އަޅާބަލާއިރު ނުރައްކާ އިންތިހާއަށް ބޮޑުވެއެވެ.
ޕަވާ ބޭންކަށް ނުރައްކާވެފައިވާކަމުގެ ނިޝާންތައް
ޕަވާ ބޭންކު ރަނގަޅު ހާލަތެއްގައި ހުރިތޯ ބެލުމަށް ގަވާއިދުން ޗެކްކުރުމަކީ ރަނގަޅު އާދައެކެވެ. ބެޓެރީ އަވަހަށް ހުސްވުން ނުވަތަ މަސައްކަތް ނުކުރުން ފަދަ ސާފުކޮށް އެނގެން ހުންނަ އަލާމާތްތަކުގެ އިތުރުން، ޕަވާ ބޭންކުގެ ބޭރުފުށުން ފެންނަ ބަދަލުތަކާއި އާދަޔާ ހިލާފު ވަސްތަކަށް ނުވަތަ އާދަޔާ ހިލާފު އަޑުތަކަށް ސަމާލުވާންޖެހެ އެވެ.
ޕަވާ ބޭންކުގައި އަލިފާން ރޯވުން ހުއްޓުވާނީ ކިހިނެއް؟
ތިމާއާއި އަނެކުންގެ ސަލާމަތަށްޓަކައި ޕަވާ ބޭންކާ ގުޅުންހުރި ހާދިސާތައް ހުއްޓުވުމަށް ދަސްކުރާށެވެ. މިއީ ޕަވާ ބޭންކު ގިނަ ދުވަހު ގެންގުޅުމަށްވެސް އެހީތެރިވެދޭނެ ކަމެކެވެ.
- އިތުބާރު ހުރި ބްރޭންޑްތައް ހިޔާރުކުރުން: ނަން ހިނގާ ކުންފުނިތަކުން އުފައްދާ، ރައްކާތެރިކަން ޓެސްޓްކޮށްފައިވާ މަތީ ފެންވަރުގެ ޕަވަރ ބޭންކު ހޯދާށެވެ. ފޭކު ނުވަތަ ބްރޭންޑެއް ނެތް ތަކެތި ގަތުމުން ދުރުހެލިވާށެވެ. އެއީ އޭގައި ބެޓެރީ މެނޭޖްމަންޓް ސިސްޓަމް އާއި، އޯވާޗާޖް ޕްރޮޓެކްޝަން ފަދަ ސޭފްޓީ ފީޗާސްތައް ނުހުންނާތީއެވެ.
- ރައްކާތެރިކަމާއެކު ޗާޖުކުރުން: ޕަވާ ބޭންކު ޗާޖުކުރާއިރު އަބަދުވެސް ލޮލަށް ފެންނަ ހިސާބެއްގައި ބާއްވާށެވެ. ބެލެހެއްޓުމެއް ނެތި، ހާއްސަކޮށް ރޭގަނޑު ނިދާއިރު ޗާޖަށް ޖަހާފައި ނުބަހައްޓާށެވެ. ފިނި އަދި ތެއް ކަމެއް ނެތް ތަނެއްގައި ޗާޖުކުރުމަށް ސަމާލުކަން ދޭށެވެ. އެއްފަހަރާ ގިނަ ޑިވައިސްތައް ޖަހައިގެން ބާރު ބޮޑު ވެސް ނުކުރާށެވެ. ރައްކާތެރިކަމެއްގެ ގޮތުން ކޮލިޓީ ރަނގަޅު ޗާޖިން ކޭބަލެއްވެސް ބޭނުންކުރާށެވެ. ޕަވާ ބޭންކު އެއްކޮށް ޗާޖުވުމުން ޕްލަގުން ނައްޓާލާށެވެ. މިއީ ބެޓެރީ ސެލްތަކަށް ލިބޭ ގެއްލުންތަކުން ސަލާމަތްކޮށްދީ، ބެޓެރީގެ ލައިފް ދަމަހައްޓައި، އަލިފާނުގެ ހާދިސާތަކުން ރައްކާތެރިކޮށްދޭނެ ކަމެކެވެ.
- ރައްކާތެރިކަމާއެކު ރައްކާކުރުން: ގަދަ ހޫނުން ސަލާމަތްކުރުމުގެ އިތުރުން، ބޭނުން ނުކުރާއިރުވެސް ފިނި، ހިކި ތަނެއްގައި ޕަވާ ބޭންކު ބާއްވާށެވެ. ސީދާ އަވިންނާއި ހިރަފުހުން ދުރުގައި ބާއްވާށެވެ. ހިރަފުސް ޖަމާވުމުން އޭގެ ބައިތަކަށް ގެއްލުންވެ، މަސައްކަތް ކުރުމަށް ބުރޫއަރައި، އަލިފާނުގެ ނުރައްކަލަކަށް ވެދާނެއެވެ. ޝޯޓް ސާކިޓްވުމުން ސަލާމަތްވުމަށްޓަކައި، ވަކި ދަބަހެއް ނުވަތަ ޕައުޗެއްގައި ޕަވާ ބޭންކު ރައްކާކުރުމަށް ވަރަށް ބޮޑަށް މުހިއްމެވެ.
- ބޭނުންނުކުރެވޭ ވަރުގެ ޕަވާ ބޭންކުތައް އަވަހަށް ބަދަލުކުރުން: ހަލާކުވެފައިވާކަމުގެ ނިޝާނެއް ފެންނަމުންދާނަމަ ވަގުތުން ޕަވާ ބޭންކު ބަދަލުކުރާށެވެ. ހަލާކުވެފައިވާ އެއްޗެއް ބޭނުންކުރުމަކީ ތިމާއާއި އަނެކުންގެ ފުރާނައަށް ނުރައްކާވެދާނެ ކަމެކެވެ.
މައުލޫމާތު: އެނާޖިއާ، ދަ ސްޓްރައިޓު ޓައިމް
