ހަނގުރާމަ ހުއްޓާލުމުގެ މަޝްވަރާތައް އިރާނުން ގަތަރުގައި އެ ގައުމުގެ މަންދޫބުންނާއެކު ކުރިއަށް ގެންދަނިކޮށް، އެމެރިކާގެ އަސްކަރިއްޔާއިން އިރާނުގެ މިސައިލް މަރުކަޒުތަކަށާއި ކަނޑުގެ އުޅަނދުފަހަރަށް ވަރުގަދަ ހަމަލާތަކެއް ދީފި އެވެ.
ހޮރްމޫޒް ކަނޑުއޮޅި ސަރަހައްދަށް އަމާޒުކޮށް މި ހަމަލާތައް ދިނުމަށް ފަހު އެމެރިކާއިން ބުނެފައި ވަނީ އަމިއްލަ ދިފާއުގައި ދިން ހަމަލާތަކެއް ކަމަށެވެ.
އެމެރިކާގެ އަސްކަރިއްޔާގެ ތަރުޖަމާނަކު ވިދާޅުވި ގޮތުގައި، އިރާނުގެ ދެކުނުގައި ހުރި މިސައިލް ފޮނުވާ ސައިޓްތަކަށާއި ކަނޑުގައި މައިން ވަޅުލުމަށް ބޭނުންކުރާ އުޅަނދުފަހަރަށް ހަމަލާދީ ވަނީ ނައްތާލާފަ އެވެ. މި ހަމަލާތަކާ ގުޅިގެން އިރާނުގެ ދެކުނުގެ އައްސޭރީގައި އޮންނަ ބަންދަރު އައްބާސްއިން ބާރުގަދަ ގޮވުންތަކެއްގެ އަޑު އިވިފައިވާ ކަމަށް އެ ގައުމުގެ މީޑިއާތަކުން ވަނީ ރިޕޯޓުކޮށްފަ އެވެ.
އިރާނުގެ ސަރުކާރާ ގުޅުންހުރި މީޑިއާތަކުން މި ހަމަލާތައް ސިފަކޮށްފައިވަނީ ހަނގުރާމަ ހުއްޓާލުމުގެ އެއްބަސްވުމާ ހިލާފަށް އެމެރިކާއިން ހިންގި އުދުވާނެއްގެ ގޮތުގަ އެވެ.
މި ހަމަލާތައް ދީފައިވަނީ އިރާނުގެ އިސް މަންދޫބުން ގަތަރަށް ވަޑައިގެން، އެމެރިކާއާއި އިޒްރޭލުން އިރާނާ ދެކޮޅަށް ކުރަމުންދާ ހަނގުރާމަ ނިމުމަކަށް ގެނައުމަށް ހުރި ހުރަސްތަކާ މެދު މަޝްވަރާ ކުރަމުން ދަނިކޮށެވެ.
އިރާނުގެ ފޮރިން މިނިސްޓްރީގެ ތަރުޖަމާނު ވިދާޅުވީ މަޝްވަރާތަކުގައި ކުރިއެރުންތަކެއް ލިބިފައިވީ ނަމަވެސް، އެއްބަސްވުމަކާ ހަމައަށް ވަރަށް އަވަހަށް އާދެވިދާނެ ކަމަށް އަދި ބެލެވެން ނެތް ކަމަށެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި، އެއްބަސްވުމަކަށް އައުމަށް ހުރި އެންމެ ބޮޑު ހުރަހަކީ އިރާނުގެ ނިއުކްލިއާ ޕްރޮގްރާމާ ގުޅޭ އިބާރާތްތަކާއި ދަތިކުރުމުގެ ފިޔަވަޅުތައް އުވާލުމާ މެދު އުފެދިފައިވާ ހިޔާލުތަފާތުވުންތަކެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ އިރާނާއެކު ވެވޭ އެއްބަސްވުމެއްގައި ސަރަހައްދީ ބާރުތައް ކަމަށްވާ ސައުދީ އަރަބިއްޔާ، ޕާކިސްތާން އަދި ތުރުކީވިލާތުން ބައިވެރިވާންޖެހޭނެ ކަމަށެވެ. އަދި އެ ގައުމުތަކުން އިޒްރޭލާއެކު ގުޅުން ގާއިމުކުރުމުގެ އަބްރަހަމް އެކޯޑްސްގައި ސޮއިކުރަންޖެހޭނެ ކަމަށްވެސް ޓްރަމްޕް ވަނީ ވިދާޅުވެފައެވެ.
