އިރާނުގެ ނިއުކްލިއާ މަޝްރޫއު އެއްކޮށް ހުއްޓާލުމުގެ ބަދަލުގައި، ވިހި އަހަރު ދުވަހުގެ މުއްދަތަށް އެ މަޝްރޫއު މެދުކަނޑާލުމަށް އެއްބަސްވާނަމަ އެކަން ގަބޫލުކުރައްވަން ތައްޔާރަށް ހުންނެވި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
މިއީ އިރާނުގެ ނިއުކްލިއާ ހަރަކާތްތައް ދާއިމީކޮށް ހުއްޓާލުމަށް މީގެ ކުރިން ޓްރަމްޕް ކުރައްވަމުން ގެންދެވި ޑިމާންޑްތަކަށް އައި ބޮޑު ބަދަލެކެވެ.
ޗައިނާގެ ރައީސް ޝީ ޖިންޕިންއާ އެކު ބޭއްވެވި ބައްދަލުވުމަށްފަހު އެއާފޯސް ވަންގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އިރާނުން ނިއުކްލިއާ މަސައްކަތްތައް ހުއްޓާލަންވާނީ 20 އަހަރަށް ކަމަށެވެ. މީގެ ކުރިން ޓްރަމްޕް ބާރުއަޅުއްވަމުން ގެންދެވީ އިރާނުން ޔުރޭނިއަމް މުއްސަނދިކުރުން ދާއިމީކޮށް ހުއްޓާލުމަށާއި، އެ ގައުމަށް ދުވަހަކުވެސް ނިއުކްލިއާ ހަތިޔާރެއް ނުލިބޭނެކަން ކަށަވަރުކުރުމަށެވެ. ނަމަވެސް، މަޝްރޫއު މެދުކަނޑާލުމުގެ މުއްދަތާ ގުޅޭގޮތުން ޓްރަމްޕް މިފަހަރު ދެއްކެވި ވާހަކަފުޅަކީ އޭނާގެ ފަރާތުން މިފަދަ މުއްދަތެއް ރަސްމީކޮށް އިވުނު ފުރަތަމަ ފަހަރެވެ.
ޓްރަމްޕް އިތުރަށް ވިދާޅުވީ އިރާނާ އެކު ކުރިއަށްދާ މަޝްރޫއުތަކުން އެދެވޭ ނަތީޖާއެއް ނުފެންނާތީ އޭނާގެ ކެތްތެރިކަން ކޮޅުންލަމުންދާ ކަމަށެވެ. އަދި އިރާނަށް ނިއުކްލިއާ ހަތިޔާރު ހޯދުމުގެ ފުރުސަތު ދީގެން ނުވާނެ ކަމަށާއި، މިހާރު ބަންދުކޮށްފައިވާ ހޮރްމޫޒް ކަނޑުއޮޅި އަލުން ހުޅުވަންޖެހޭނެ ކަމަށް އެމެރިކާ އާއި ޗައިނާއިން އެއްބަސްވާ ކަމަށްވެސް އޭނާ ވިދާޅުވިއެވެ. މި ކަނޑުއޮޅި ބަންދުކުރުމުގެ ސަބަބުން ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް އުފުލިފައެވެ.
ފެބްރުއަރީ މަހު 28 ފެށިގެން އިޒްރޭލާއި އެމެރިކާގެ ސިފައިން ދަނީ އިރާނަށް ވަރުގަދަ ވައިގެ ހަމަލާތަކެއް ދެމުންނެވެ. ނަމަވެސް މަޝްވަރާތަކަށް ފުރުސަތު ދިނުމުގެ ގޮތުން މިދިޔަ މަހުން ފެށިގެން އިއުލާނުކޮށްފައިވާ ހަމަލާބަދަލުކުރުން ހުއްޓާލުމުގެ އެއްބަސްވުމަށް ދެފަރާތުންވެސް އަންނަނީ އިހުތިރާމް ކުރަމުންނެވެ. މި މައްސަލައިގައި މެދުވެރިއެއްގެ ދައުރު އަދާކުރަމުންދަނީ ޕާކިސްތާނުންނެވެ.
މަޝްވަރާތައް ކުރިއަށްދިޔަ ނަމަވެސް، ދެ ގައުމުގެ ހުށަހެޅުންތަކުގައި ބޮޑެތި ފަރަގުތަކެއް ހުރިކަން ފާހަގަކުރެވެއެވެ. އިރާނުން ހުށަހަޅާފައިވަނީ ހުރިހާ ފަރާތްތަކަކުން ވަގުތުން ހަނގުރާމަ ހުއްޓާލުމަށާއި، އެމެރިކާއިން އިރާނުގެ ބަނދަރުތަކަށް ކުރިމަތިކޮށްފައިވާ ހުރަސްތައް ނައްތާލުމަށެވެ. މީގެ އިތުރުން އިރާނަށް ދެން ދުވަހަކުވެސް ހަމަލާއެއް ނުދޭނެކަމުގެ ޔަގީންކަން އެ ގައުމުން ބޭނުންވެއެވެ.
