ނޫސްވެރިކަމުގެ ހައްގު ގެއްލޭތީ ބާ ކައުންސިލުން ކަންބޮޑުވުން ފާޅުކޮށް ނޫސްވެރިންނަށް ހިލޭ ގާނޫނީ އެހީތެރިކަން ފޯރުކޮށްދެނީ

May 13, 2026, 7:28 PM
ބާ ކައުންސިލުގެ ރައީސް ހުސެއިން ސިރާޖް: ހައްގުތައް ހަނި ކުރަމުންދާތީ ކަންބޮޑުވުން ފާޅު ކުރި -- ފޮޓޯ: އަދަދު ފައިލް

ބާ ކައުންސިލުގެ ރައީސް ހުސެއިން ސިރާޖް: ހައްގުތައް ހަނި ކުރަމުންދާތީ ކަންބޮޑުވުން ފާޅު ކުރި -- ފޮޓޯ: އަދަދު ފައިލް

މޯލްޑިވްސް ބާ ކައުންސިލުން ރާއްޖޭގެ ނޫސްވެރިކަމުގެ މިނިވަންކަމާއި، ހިޔާލުފާޅުކުރުމުގެ މިނިވަންކަމުގެ އިތުރުން އަދުލު އިންސާފުގެ ނިޒާމުގެ ތެރެއިން ކަށަވަރުކޮށްދޭންޖެހޭ އަސާސީ ހައްގުތައް ހަނިވަމުންދާތީ އެކަމާ މެދު ކަންބޮޑުވުން ފާޅުކޮށްފިއެވެ.

ބާ ކައުންސިލުން ނެރުނު ނޫސްބަޔާނެއްގައި ބުނެފައިވަނީ، ފަހަކަށް އައިސް ރާއްޖޭގައި ހިނގަމުންދާ ކަންތައްތަކަށް ބަލާއިރު، ހިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމުގެ އިތުރުން، އިންސާފުވެރި ޝަރީއަތެއް ލިބުމުގެ ހައްގާއި ހުޅުވާލެވިފައިވާ އަދުލު އިންސާފުގެ ނިޒާމަކަށް ހުރަސްއެޅޭ ފަދަ ކަންތައްތަކެއް ފާހަގަކުރެވިފައިވާ ކަމަށެވެ.

މިގޮތުން ކްރިމިނަލް ކޯޓުގައި ހިނގަމުންދާ ޝަރީއަތްތަކާ ގުޅިގެން ކޯޓުގެ ހުރުމަތް ކެނޑި ކަމަށް ބުނެ ނޫސްވެރިން ޖަލަށްލުމާއި، ހިނގަމުންދާ މައްސަލަތަކާ ގުޅޭ ގޮތުން އާންމުކޮށް ވާހަކަ ދެއްކުން ހަނިކުރުމާއި، ގާނޫނީ ވަކީލުންގެ އެހީތެރިކަން ހޯދުމަށް ހުރަސްތަކެއް ކުރިމަތިވަމުންދާ ކަމުގެ ރިޕޯޓުތައް ލިބެމުންދާ ކަމަށް ބާ ކައުންސިލުން ފާހަގަކޮށްފައިވެ އެވެ.

ދައުލަތުގެ ބާރުތައް ބޭނުންކުރަންވާނީ ގާނޫނުއަސާސީ އާއި އިންސާފުވެރި ޝަރީއަތެއްގެ އުސޫލުތަކާއި، ރާއްޖޭގެ ގާނޫނުތަކުން ކަށަވަރުކޮށްދޭ އަސާސީ ހައްގުތަކާ އެއްގޮތްވާ ގޮތުގެ މަތިން ކަމަށް ވެސް އެ ކައުންސިލުން ހަނދާންކޮށްދީފައިވެ އެވެ.

ހިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމަކީ ޑިމޮކްރެޓިކް މުޖުތަމައެއްގެ ބިންގާ ކަމަށްވާއިރު، އެ ހައްގުތައް ހަނިކުރެވޭނީ ގާނޫނީ އިމުގެ ތެރެއިން، ކޮންމެހެން ބޭނުންތެރި ހާލަތްތަކުގައި، އަދި އެކަށީގެންވާ މިންވަރަކަށް ކަމަށް ބާ ކައުންސިލުން ބުނެ އެވެ.

ވަކިން ހާއްސަކޮށް، ކޯޓުގެ ހުރުމަތް ކެނޑިކަމަށް ބުނެ ފިޔަވަޅު އެޅުނު ނޫސްވެރިންނަށް، އަޑުއެހުންތަކުގެ ކުރިން ގާނޫނީ ވަކީލެއްގެ އެހީތެރިކަން ހޯދުމަށް އެކަށީގެންވާ ފުރުސަތު ދީފައިނުވާ ކަމަށް ބުނާ ރިޕޯޓުތަކާ މެދު ކައުންސިލުން ވަނީ ކަންބޮޑުވުން ފާޅުކޮށްފައެވެ.

މީގެ އިތުރުން، ގާނޫނީ ދާއިރާގެ ބޭފުޅުންނާއި، ކުރީގެ ފަނޑިޔާރުންނާއި، މަދަނީ ޖަމިއްޔާތަކުން ފާޅުކުރަމުންދާ ކަންބޮޑުވުންތަކަށް ބާ ކައުންސިލުން ވަނީ ތާއީދުކޮށްފައެވެ. މިފަދަ ހަރުކަށި ފިޔަވަޅުތަކުގެ ސަބަބުން ނޫސްވެރިކަމުގެ މިނިވަންކަމަށާއި، ހުޅުވާލެވިފައިވާ އަދުލު އިންސާފުގެ ނިޒާމަށް ބުރޫއަރައި، ދައުލަތުގެ މުއައްސަސާތަކަށް އޮންނަ އިތުބާރު ގެއްލިގެންދާނެ ކަމަށް އެ ކައުންސިލުން ދެކެ އެވެ.

މި މައްސަލަތަކާ ގުޅިގެން ބާ ކައުންސިލުން ވަނީ އެޓާނީ ޖެނެރަލްއަށާއި، ޕްރޮސިކިއުޓާ ޖެނެރަލްއަށާއި، ކްރިމިނަލް ކޯޓަށް ރަސްމީ ސިޓީ ފޮނުވާފަ އެވެ. އެ ސިޓީތަކުގައި، ގާނޫނުއަސާސީން ކަށަވަރުކޮށްދޭ ހައްގުތަކަށް އިހުތިރާމްކުރުމަށާއި، ގާނޫނީ ވަކީލުންގެ އެހީތެރިކަން ހޯދުމުގެ ހައްގު ކަށަވަރުކޮށްދިނުމަށް ވަނީ ގޮވާލާފަ އެވެ.

ގާނޫނީ އެހީތެރިކަން ބޭނުންވާ ނޫސްވެރިންނާއި ގާނޫނީ ވަކީލުންނަށް ބާ ކައުންސިލްގެ ޕްރޯ ބޯނޯ ކްލިއަރިން ހައުސް މެދުވެރިކޮށް އެހީތެރިކަން ފޯރުކޮށްދިނުމަށް އެ ކައުންސިލްގެ އެގްޒެކެޓިވް ކޮމިޓީން ވަނީ ނިންމާފަ އެވެ.

ބާ ކައުންސިލުން ވަނީ ދައުލަތުގެ ހުރިހާ މުއައްސަސާތަކުން ކުރާ މަސައްކަތްތަކަކީ ގާނޫނުއަސާސީ އާއި، އިންސާފުވެރި ޝަރީއަތެއްގެ އުސޫލުތަކާއި، ގާނޫނީ ދައުލަތެއްގެ ސިފަތަކާ އެއްގޮތަށް ކުރާ މަސައްކަތްތަކެއްކަން ކަށަވަރުކުރުމަށް އިލްތިމާސްކޮށްފަ އެވެ. 

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox