އަދަދު ނޫހުގެ ސީއީއޯ ހުސެއިން ފިޔާޒު މުސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއީ ދައުވާތައްކޮށްގެން އުޅޭ މައްސަލައިގައި ހިމެނޭ "އައިޝާ" ޑޮކިއުމެންޓްރީގެ ވާހަކަ ނުދައްކަން ކްރިމިނަލް ކޯޓުން އަމުރުކުރި ހަބަރު ލިޔުމުން އެއީ ކޯޓުގެ ހުރުމަތް ކެނޑުން ކަމަށް ނިންމައި ނޫސްވެރިޔާ ލީވާން އަލީ ނާސިރު 10 ދުވަހަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފި އެވެ.
މިއަދު ހެނދުނު 11:00 އަށް ކޯޓަށް ލީވާން ހާޒިރުވީ ވަކީލާކާ ނުލަ އެވެ. އޭނާ އެދުނީ ވަކީލެއް ހަމަޖެއްސުމަށް 10 ދުވަހުގެ މުއްދަތެއް ދިނުމަށެވެ.
ނަމަވެސް މައްސަލަ ބައްލަވާ ބެންޗުން ނިންމީ އެންމެ ދެ ގަޑިއިރު ލީވާނަށް ދިނުމަށެވެ. އެއާއެކު އޭނާ ކޯޓަށް ހާޒިރުވީ 14:00 އަށެވެ.
ދެންމެ ކޯޓުން ހުކުމް ކުރީ ހަބަރެއް ލިިޔެގެން އޭނާ ކުށްވެރިވެފައިވާ ކަމަށެވެ. އެ މައްްސަލައިގައި އޭނާ ކޯޓުގެ ހުރުމަތް ކެނޑި ކަމަށް ނިންމައި ޖަލަށް ހުކުމް ކުރީ 15 ދުވަހުގެ މުއްދަތަށެވެ.
އިއްޔެ ރައީސް އޮފީހުގައި ބޭއްްވި ނޫސްވެރިންގެ ބައްދަލުވުމުގައި މުހައްމަދު މުއިއްޒުއާ ސުވާލު ކުރުމުން މި ނޫހުގެ ނޫސްވެރިޔާ މުހައްމަދު ޝަހުޒާން ވެސް ކޯޓަށް ހާޒިރުކުރި އެވެ. އޭނާއަށް ވެސް ވަނީ ދެ ގަޑިއިރުގެ މުއްްދަތެއް ވަކީލެއް އައްޔަނުކުރަން ދީފަ އެވެ.
