އެމެރިކާއާއި އިރާނާ ދެމެދު ވަރުގަދަ ހަމަލާތަކެއް ބަދަލުކޮށްފައިވީ ނަމަވެސް، ދެ ގައުމުގެ ދެމެދުގައި ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުން އަދިވެސް ދެމިއޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ހޮރްމުޒް ކަނޑުއޮޅީގައި މިއަދު ހިނގި މި ކުރިމަތިލުންތަކާ ގުޅިގެން މަސްރަހު ނުތަނަވަސްވެފައިވާއިރު، އިރާނުން ވަނީ މިދިޔަ އޭޕްރީލް 7 ދުވަހު ވެވުނު އެއްބަސްވުމާ އެމެރިކާއިން ހިލާފުވެފައިވާ ކަމަށް ތުހުމަތުކޮށްފައެވެ.
އިރާނުގެ އަސްކަރިއްޔާއިން ބުނި ގޮތުގައި މިއަދުގެ ކުރިމަތިލުމަކީ ދުޝްމަނުންނާއި އިރާނުގެ ސިފައިންނާ ދެމެދު ބަދަލުކުރެވުނު ވަރުގަދަ ހަމަލާތަކެކެވެ. އިރާނުގެ ބަންޑާރަ އައްބާސް ސިޓީ ކައިރިން ބާރުގަދަ ގޮވުންތަކެއްގެ އަޑު އިވިފައިވާއިރު، ގަލްފުގެ އެންމެ ބޮޑު ރަށް ކަމަށްވާ ގޭޝްމްގެ ވިޔަފާރި ބަނދަރަކަށް އަމާޒުކޮށް ހަމަލާދީފައިވާ ކަމަށް އެ ގައުމުގެ ނޫސް އެޖެންސީތަކުން ރިޕޯޓުކުރެއެވެ.
އިރާނުގެ އަސްކަރީ ކޮމާންޑުން ބުނާ ގޮތުގައި އެމެރިކާއިން ވަނީ ހޮރްމުޒް ކަނޑުއޮޅިން ދަތުރުކުރި އިރާނުގެ ތެޔޮ ޓޭންކަރަކަށާއި، ޔޫއޭއީގެ ފުޖައިރާ ބަނދަރާ ދިމާލުން ކަނޑުއޮޅިއަށް ވަންނަން އުޅުނު އެހެން އުޅަނދަކަށް އަމާޒުކޮށް ހަމަލާދީފައެވެ. މި ހަމަލާތަކަށް ރައްދު ދިނުމުގެ ގޮތުން އިރާނުގެ ސިފައިން އެމެރިކާގެ އަސްކަރީ މަނަވަރުތަކަށް ހަމަލާދީ ބޮޑެތި ގެއްލުންތަކެއް ދީފައިވާ ކަމަށްވެސް އިރާނުން ދައުވާކުރެއެވެ.
މި ހާދިސާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ކަނޑުއޮޅީގައި އޮތް އެމެރިކާގެ ތިން މަނަވަރަކަށް ހަމަލާދިން ނަމަވެސް އެ އުޅަނދުތަކަށް އެއްވެސް ގެއްލުމެއް ލިބިފައިނުވާ ކަމަށެވެ. ނަމަވެސް އިރާނުގެ ތަންތަނަށް ބޮޑެތި ގެއްލުންތަކެއް ދީފައިވާނެ ކަމަށް އެމަނިކުފާނު ވިދާޅުވިއެވެ.
އޭބީސީ ނިއުސްއަށް ދެއްވި އިންޓަވިއުއެއްގައި ޓްރަމްޕް ވަނީ މި ހަމަލާތަކަކީ ކުޑަ ސަމާސާއެއްގެ ގޮތުގައި ސިފަކުރައްވައި، ހަނގުރާމަ ހުއްޓާލުމުގެ އެއްބަސްވުމާއި އިރާނާ ދެކޮޅަށް އެމެރިކާއިން އަޅާފައިވާ ބްލޮކޭޑް އަދިވެސް ދެމިއޮތް ކަމަށް ވިދާޅުވެފައެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ނެރުނު ބަޔާނެއްގައި ބުނެފައިވަނީ، އެމެރިކާގެ މަނަވަރުތައް ކަނޑުއޮޅިން ދަތުރުކުރަނިކޮށް އިރާނުން ދިން ހަމަލާތައް ހުއްޓުވައި، އަމިއްލަ ދިފާއުގައި ރައްދު ހަމަލާ ދީފައިވާ ކަމަށެވެ. އެމެރިކާގެ އެއްވެސް ވަސީލަތަކަށް ގެއްލުމެއް ލިބިފައިނުވާ ކަމަށާއި، އެމެރިކާއިން މަސްރަހު ގޯސްކުރަން ބޭނުންނުވި ނަމަވެސް އެ ގައުމުގެ ސިފައިންގެ ދިފާއުގައި ކޮންމެ ވަގުތަކުވެސް ތައްޔާރަށް އޮތް ކަމަށް ސެންޓްކޮމްއިން ބުންޏެވެ.
