މިއަދު ފާހަގަކުރާ ބައިނަލްއަގުވާމީ ނޫސްވެރިކަމުގެ މިނިވަންކަމުގެ ދުވަހާ ގުޅިގެން ރާއްޖޭގައި ނޫސްވެރިިކަމުގެ ހާލަތު އޮތްގޮތް ދައްކުވައިދިނުމަށް ނޫސްވެރިން ޖެހި ސަންދޯއް ފުލުހުން ގެންގޮސްފި އެވެ.
ރިޕޯޓާސް ވިތައުޑް ބޯޑާސް (އާރުއެސްއެފް) އިން ނެރުނު ޕްރެސް ފްރީޑަމް އިންޑެކްސްގައި 180 ގައުމުގެ ތެރެއިން ރާއްޖެ އޮތީ 108 ވަނައިގަ އެވެ. އެއީ މިދިޔަ އަހަރަށްވުރެ ހަތަރު ދަރަޖަ ފަހަތެވެ.
މިއަދު މެންދުރު ރައީސް އޮފީސް ކުރިމަތީގައި ނޫސްވެރިންގެ ޖަމިއްޔާއިން އިސްނަގައިގެން ވަނީ ހިމޭން އިހުތިޖާޖެއް ކޮށްފަ އެވެ. އެ އިހުތިޖާޖުގައި ވަނީ ނޫސްވެރިކަމުގެ މިނިވަންކަން ރާއްޖޭގައި ނެތްކަން ދައްކުވައިދިނުމަށް ސަންދޯކެއް ބަހައްޓާފަ އެވެ.
އެ ސަންދޯކުގެ ފަހަތުގައި އަނގަ މަތީގައި ޓޭޕު އަޅައިގެން ނޫސްވެރިން ތިއްބައި ވޭނެއްގައި އައިސް ފުލުހުން ވަނީ އެ ސަންދޯއް ހިފައިގެން ގޮސްފަ އެވެ. ފުލުހުންގެ ވޭނަށް ސަންދޯއް ފިޓުކުރީ ވަރަށް ހާލުންނެވެ.
ނޫސްވެރިންގެ ޖަމިއްޔާއިން ގޮތުގައި ރަމްޒީ ގޮތުން ބެހެއްޓި ސަންދޯއް ވެސް މި ސަރުކާރުން ދެކުނީ ގައުމީ ސަލާމަތަށް ހުރި ނުރައްކަލެއްގެ ގޮތުގަ އެވެ.
ފާއިތުވި އަހަރަކީ ނޫސްވެރިކަމުގެ މިނިވަންކަމަށް ހުރަސް އެޅުމަށް ސަރުކާރުން ގިނަ މަސައްކަތްތަކެއް ކުރި އަހަރެކެވެ. ވަކިން ހާއްސްކޮށް މީޑިއާ ކޮންޓްރޯލް ކުރުމަށް ގާނޫނެއް ފާސްކޮށް ކޮންޓްރޯލް ކޮމިޝަނެއް އުފައްދައި މީޑިއާތައް ހުއްޓުވޭނެ ގާނޫނީ އޮނިގަނޑެއް ވަނި އެކުލަވާލާފަ އެވެ
އޭގެ އިތުރުން، ސީދާ މުއިއްޒު ވަނީ އަދަދު ނޫހުގެ ސީއީއޯ ހުސައިން ފިޔާޒު މޫސާއަށް ގުޅުއްވައި އޭނާއަށާއި އަދަދުގެ ނޫސްވެރިންނަށް ހަރުކަށި ފިޔަވަޅު އަޅުއްވާނެކަމުގެ އިންޒާރު ދެއްވާފަ އެވެ. ފިޔާޒުއަށް ރައީސް މުއިއްޒު ފޯނުން ގުޅުއްވައި ބިރު ދެއްކެވީ މާޗު 14، 2025، ގެ އިރާކޮޅު 19:04 ގަ އެވެ.
އަދަދު ނޫހުގެ އިތުރުން ރާއްޖޭގެ އެހެން ބައެއް ނޫސްވެރިންނަށް މިދިޔަ އަހަރުގެ ތެރޭގައި މަރުގެ އިންޒާރުތައް ވެސް ލިބިފައިވެ އެވެ. އަދި ސީދާ ސަރުކާރުން އަންގައިގެން ނޫސްވެރިންގެ އަގުވައްޓާލުމަށާއި ބިރުދައްކައި ފަހަތަށް ޖެއްސުމުގެ އަމާޒުގައި ސޯޝަލް މީޑިއާގައި ކެމްޕޭން ހިންގާފައި އެބަހުއްޓެވެ. އެ ކެމްޕޭންތަކުގައި ސަރުކާރުގެ ސިޔާސީ މަގާމުތަކުގައި ތިބީ މީހުން ބައިވެރިވެފައިވެ އެވެ.
ފިޔާޒުއަށް ގުޅައި މުއިއްޒު އިންޒާރު ދެއްވިތާ އަހަރެއް ފާއިތުވި ފަހުން މި އަހަރުގެ އެޕްރީލް 27، ގެ ރޭގެ ވަގުތެއްގައި ފުލުހުން ފޮނުވައިގެން އަދަދު ނޫހުގެ އިދާރާ ވަނީ ރެއިޑުކޮށްފަ އެވެ. އެ ރެއިޑުގައި ގިނަ އަދަދެއްގެ އިލެކްޓްރޯނިކް ސާމާނު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
ފިޔާޒު އާއި އަދަދުގެ އެެޑިޓަރު ހަސަން މުހައްމަދުގެެ މައްޗަށް ޖިނާއީ ބޮޑު ތަހުގީގެއް މިހާރު ފުލުހުން އަންނަނީ ހިންގަމުންނެވެ. އެ ތަހުގީގު ހުއްޓާލައި އަދަދުއާ ދެކޮޅަށް އަޅަމުން އަންނަ ފިޔަވަޅުތައް ހުއްޓާލުމަށް އެތައް ބަޔަކު އަންނަނީ ގޮޮވާލަމުންނެވެ.
