އެތައް ބައެއްގެ ލެޔާއި ދާ އޮހުރުވައިގެން ހޯދި ނޫސްވެރިކަމުގެ މިނިވަންކަން، ރައީސުލްޖުމްހޫރިއްޔާ މުހައްމަދު މުއިއްޒުގެ ވެރިކަމުގައި މީގެ 18 އަހަރު ކުރީގައި އޮތް ބިވެރިކަމުގެ ތެރެއަށް ސޮއްސާލާފައިވާ ކަމަށް އެމްޑީޕީގެ ކުރީގެ ޗެއާޕާސަން، ފައްޔާޒް އިސްމާއިލް ވިދާޅުވެއްޖެ އެވެ.
ނޫސްވެރިކަމުގެ މިނިވަންކަމުގެ ދުވަހާ ގުޅުވައި އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ މިދިޔަ އަހަރު ފާސްކުރި މީޑިއާ ކޮންޓްރޯލް ގާނޫނުގެ ދަށުން އުފައްދާފައިވާ ކޮންޓްރޯލް ކޮމިޝަން މަސައްކަތް ކުރަނީ ސަރުކާރަށް ފާޑުކިޔާ ނޫސްތަކާއި މިނިވަން ނޫސްވެރިންނަށް ހުރަސްއެޅުމަށް ކަމަށެވެ.
"ސަރުކާރުގެ ނާގާބިލުކަމާއި ވައްކަމާއި ކޮްރަޕްޝަންގެ ވާހަކަތައް ރިޕޯޓުކުރާ ނޫސްވެރިންނަށް ފުރައްސާރަ އާއި އިންޒާރުތައް ދަނީ ކުރިމަތިވަމުން. ނޫސްވެރިންނަށް ދައުލަތުން އަދަބުދިނުން ނިމުމަކަށް އަންނަންޖެހޭ،" ފައްޔާޒް ވިދާޅުވި އެވެ.
ފައްޔާޒް ވަނީ މީޑިއާ ކޮންޓްރޯލް ގާނޫނު އުވާލައި ނޫސްވެރިން އަމިއްލައަށް ރެގިއުލޭޓު ކުރެވޭނެ ނިޒާމެއް ގާއިމުކުރުމަށް ހިތްވަރު ދިނުމަށް ގޮވާލައިފަ އެވެ. އަދި، ހިޔާލުފާޅުކުރުމުގެ މިނިވަންކަމަށް ހުޅުވިފައިވާ މާހައުލެއް ގާއިމު ކުރުމަށް ވެސް އޭނާ ގޮވައިލެއްވި އެވެ.
އެއްވެސް ނޫސް އިދާރާއެއް ބަންދުކޮށްފާނެ ކަމުގެ މިނިވަންކަމުގެ ތެރޭގައި ހިންގަން ޖެހިގެން ނުވާނެ ކަމަށާއި ސަރުކާރުގެ ފަރާތުން ނޫސްވެރިންނަށް ބިރުދެއްކުމެއް ކުރިމަތިވެގެން ނުވާނެ ކަމަށް ފައްޔާޒް ވިދާޅުވި އެވެ.
"ސަރުކާރު ޒިންމާދާރު ކުރުވުމަށް އޮތް ހަމައެކަނި މަގަކީ މިނިވަން ނޫސްވެރިކަން، އަޅުގަނޑުމެން މި ތިބީ އިސް ސަފުގައި މަސައްކަތް ކުރަމުންދާ ހުރިހާ ނޫސްވެރިންނާއެކު ސާބިތުކަމާއެކު،" ފައްޔާޒް ވިދާޅުވި އެވެ.
މިއަދު ފާހަގަކުރާ ބައިނަލްއަގުވާމީ ނޫސްވެރިކަމުގެ ދުވަހާ ކުރިމަތިލާއިރު، އަދަދު ނޫހަށް ފުލުހުން ވަދެގަނެ، އެ ނޫހުގެ ގިނަ އާލާތްތައް ވަނީ ހިފަހައްޓައިފަ އެވެ. އަދި، އެ ނޫހުގެ ސީއީއޯ، ހުސެއިން ފިޔާޒު މޫސާ އާއި މެނޭޖިން އެޑިޓަރު، ހަސަން މުހައްމަދުގެ ޕާސްޕޯޓު ފުލުހުން ވަނީ ހިފަހައްޓައިފަ އެވެ. އެކަމާ ގުޅިގެން ގިނަ ބަޔަކު ދަނީ ސަރުކާރަށް ފާޑުކިޔަމުންނެވެ.
