އިނގިރޭސިވިލާތުގެ އެންއެޗްއެސް ހެލްތު ސާވޭއިން ދައްކާ ގޮތުގައި އެ ގައުމުގެ އާބާދީގެ ގާތްގަނޑަކަށް ދެބައިކުޅަ އެއްބައި މީހުންނަކީ ކޮލެސްޓްރޯލް މަތި މީހުންނެވެ. ކޮލެސްޓްރޯލް މަތިވުމަކީ އާންމުކޮށް އޭގެ އަލާމާތްތައް ފެންނަ ކަމަކަށް ނުވާތީ، ގިނަ ބަޔަކަށް އެކަން ނޭނގި އޮވެ، ހިތުގެ ބަލިތަކާއި ސްޓްރޯކް ފަދަ ނުރައްކާތެރި ސިއްހީ މައްސަލަތަކަށް މަގުފަހި ވެ އެވެ.
ކޮލެސްޓްރޯލަކީ ފުރަމޭއިން އުފައްދާ، އަދި ބައެއް ކާނާގެ ބާވަތްތަކުން ލިބޭ ތެލުގެ މާއްދާއެކެވެ. ހަށިގަނޑުގެ ސެލްތައް ދުޅަހެޔޮކޮށް ބެހެއްޓުމަށާއި، ހޯރމޯންތަކާއި ވިޓަމިން ޑީ އުފެއްދުމަށް ހަށިގަނޑަށް ކޮލެސްޓްރޯލް ބޭނުން ވެ އެވެ. ނަމަވެސް، ލޭގެ ތެރޭގައި ދައުރުވާ "ނޮން-އެޗްޑީއެލް" ނުވަތަ ނުރަނގަޅު ކޮލެސްޓްރޯލް އިތުރުވުމުން ލޭހިނގާ ހޮޅިތަކުގެ ފާރުގައި ސަރުބީ ހަރުލައި، ލޭ ދައުރުވުމަށް ހުރަސް އެޅެ އެވެ. ލޭގައި ކޮލެސްޓްރޯލް މަތިވުމަށް އެންމެ ބޮޑަށް ބާރުއަޅަނީ ކާނާގައި ހިމެނޭ ސެޗުރޭޓެޑް ފެޓް ނުވަތަ ނުރަނގަޅު ސަރުބީ އެވެ.
ކޮލެސްޓްރޯލް ދަށްކުރުމަށްޓަކައި އެންމެ މުހިންމު ކަމަކީ ކާނާގައި ބޭނުންކުރާ ސަރުބީގެ ބާވަތްތަކަށް ސަމާލުވުމެވެ. ބަޓަރު، ގީ، އަދި އެއްގަމު މަހުގެ ސަރުބީ ފަދަ ތަކެތީގައި ގިނަ އަދަދަކަށް ސެޗުރޭޓެޑް ފެޓް ހުރެ އެވެ. މިފަދަ ތަކެތީގެ ބަދަލުގައި އެވޮކާޑޯ، ޒައިތޫނި ތެޔޮ، މަސްމަހާާމެހި، އަދި ނަޓްސް ފަދަ އަންސެޗުރޭޓެޑް ފެޓް ހިމެނޭ ބާވަތްތައް ބޭނުންކުރުމަކީ ކޮލެސްޓްރޯލް ދަށްކުރުމަށް އެހީތެރިވެދޭ ކަމެކެވެ. އިނގިރޭސިވިލާތުގެ ސަރުކާރުން ލަފާދެނީ ފިރިހެނަކު ދުވާލަކު 30 ގްރާމަށް ވުރެ ގިނައިން އަދި އަންހެނަކު 20 ގްރާމަށް ވުރެ ގިނައިން ސެޗުރޭޓެޑް ފެޓް ބޭނުން ނުކުރުމަށެވެ.
މީގެ އިތުރުން، ފައިބަރު ގިނަ ކާނާ ބޭނުންކުރުމަކީ ކޮލެސްޓްރޯލް ކޮންޓްރޯލް ކުރުމަށް ވަރަށް މުހިންމު ކަމެކެވެ. ހާއްސަކޮށް އޯޓްސް އާއި ބާލީގައި ހިމެނޭ "ބީޓާ-ގްލޫކަން" ނަމަކަށް ކިޔާ ފައިބަރަކީ ހަށިގަނޑަށް ކޮލެސްޓްރޯލް ދަމައިގަތުން ހުއްޓުވައިދޭ މާއްދާއެކެވެ. ދުވާލަކު ތިން ގްރާމްގެ ބީޓާ-ގްލޫކަން ހަށިގަނޑަށް ލިބޭނެހެން އޯޓްސް ނުވަތަ ބާލީ ބޭނުންކުރުމުން ކޮލެސްޓްރޯލްގެ މިންވަރު ދަށްކޮށްދެ އެވެ. ހަމައެއާއެކު، ތަރުކާރީ އާއި މޭވާ އަދި އެކި ބާވަތުގެ މުގަކީ ވެސް ފައިބަރުން މުއްސަނދި، ސިއްހަތަށް ފައިދާހުރި ބާވަތްތަކެވެ.
ކޮލެސްޓްރޯލް މަތި މީހުންނަށް ހާއްސަކޮށް ތައްޔާރުކޮށްފައިވާ "ޕްލާންޓް ސްޓެނޯލްސް" ނުވަތަ "ސްޓެރޯލްސް" އެކުލެވޭ ކާނާ ބޭނުންކުރުމުން ވެސް ނުރަނގަޅު ކޮލެސްޓްރޯލްގެ މިންވަރު 7 އިން 10 އިންސައްތައާ ދެމެދުގެ މިންވަރަކަށް ދަށްކުރެވޭކަން ދިރާސާތަކުން ދައްކަ އެވެ. ނަމަވެސް މިއީ ދުޅަހެޔޮ ކާނާގެ ބަދަލުގައި ބޭނުންކުރާ އެއްޗެއް ނޫނެވެ.
ކާނާއަށް ގެންނަ ބަދަލުތަކުގެ އިތުރުން، ހަށިގަނޑު ހަރަކާތްތެރިކޮށް ބެހެއްޓުމާއި، ދުންފަތުގެ އިސްތިއުމާލު ކުރުމުން ދުރުހެލިވުމަކީ ވެސް ކޮލެސްޓްރޯލް ކޮންޓްރޯލް ކުރުމަށް ކޮންމެހެން ބޭނުންތެރި ކަންކަމެވެ. ބައެއް ހާލަތްތަކުގައި ޑޮކްޓަރުގެ އިރުޝާދުގެ މަތިން ބޭސް ބޭނުންކުރަން ޖެހުނު ކަމުގައި ވިޔަސް، ދާއިމީ ގޮތެއްގައި ކާނާގެ އާދަތައް ރަނގަޅު ކުރުމަކީ ދިގު މުއްދަތުގެ ސިއްހީ ފައިދާ ލިބޭނެ ކަމެކެވެ.
ނޯޓު: ކާނާގެ ޒަރީއާއިން ހަށިގަނޑުގައި ހުންނަ ކޮލެސްޓްރޯލްގެ މިންވަރު ދަށްކުރެވޭނެ ގޮތްތަކާ ގުޅޭގޮތުން ޓައި އިބިޓޯޔޭ ލިޔުއްވާފައިވާ މި ރިޕޯޓަކީ ބީބީސީ ފުޑްގައި ޝާއިއުކޮށްފައިވާ މައުލޫމާތުތަކެއްގެ މައްޗަށް ބިނާކޮށް ތައްޔާރުކޮށްފައިވާ ލިޔުމެކެވެ.
