ދައުލަތުގެ ކުންފުނިތަކުގެ ނަޒާހަތްތެރިކަން އިތުރުކޮށް ހިންގުން ހަރުދަނާކުރުމަށްޓަކައި އެންޓި ކޮރަޕްޝަން ކޮމިޝަން (އޭސީސީ) އިން ޕްރައިވަޓައިޒޭޝާން އެންޑް ކޯޕަރޭޓައިޒޭޝަން ބޯޑު (ޕީސީބީ) ގެ ރައީސް، މުހައްމަދު އަނަސްއާ މަޝްވަރާކޮށްފި އެވެ.
އެކްސްގައި އޭސީސީން ކުރި ޕޯސްޓެއްގައި ބުނީ އެ ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައި ވަނީ ދައުލަތުގެ ޕްރޮކިއުމަންޓް އުސޫލުތަކާއި ގަވާއިދުތަކަށް މުވައްޒަފުން ހޭލުންތެރިކުރުވުމާއި އެ އުސޫލުތައް ތަންފީޒުކުރުމާ ގުޅޭގޮތުން ކަމަށެވެ.
އެ މަޝްވަރާތަކުގެ ތެރެއިން ޕީސީބީގެ ގައިޑްލައިންތައް ހޭލުންތެރިކުރުވުމުގެ ޕްރޮގްރާމުތަކުގެ ތެރޭގައި ހިމެނުމަށް ވަނީ ނިންމާފަ އެވެ. މީގެ އިތުރުން މިހާރު ކުރިއަށްދާ ތަމްރީނު ޕްރޮގްރާމްތަކުގެ ތެރެއިން މި އުސޫލުތަކަށް މުވައްޒަފުން އަހުލުވެރިކުރުވުމަށް ޚާއްސަ އިސްކަމެއް ދިނުމަށް ވެސް ދެ ފަރާތުން އެއްބަސްވެފައިވާ ކަމަށް އޭސީސީން ބުންޏެވެ.
ކޮރަޕްޝަނަށް މަގުފަހިވާ ކަންކަން މަދުކުރުމަށްޓަކައި ޕްރޮކިއުމަންޓް އަދި ފައިނޭންސް ދާއިރާގައި މަސައްކަތްކުރާ މުވައްޒަފުންނަށް މަޖުބޫރު އިންޑަކްޝަން ޕްރޮގްރާމްތަކެއް ތައާރަފުކުރުމަށްވެސް މި ބައްދަލުވުމުގައި ވަނީ ނިންމާފަ އެވެ.
އޭސީސީން ގޮސް ސަރުކާރު ކުންފުނިތަކުގެ ބެލެނިވެރި ފަރާތާ ބައްދަލުކުރިއިރު، މި ސަރުކާރުގެ ތެރޭގައި ހިންގާފައިވާ ކަމަށް ތުހުމަތުކުރެވޭ ކޮރަޕްޝަންތައް ގޮސް ގުޅެނީ އެސްއޯއީތަކާ އެވެ. ނަމަވެސް އެ ކޮމިޝަނަށް މިއިން މައްސަލައެއް ބަލައި، ނޫނީ މި ނޫން އެހެން މައްސަލަތަކެއްގެ ތަހުގީގުތައް ނިންމާ، ޒިންމާވާ ބަޔަކަށް ފިޔަވަޅު އަޅާ ތަނެއް ނުފެނެ އެވެ.
