ގއ. ކޫއްޑޫ ކައިރީގައި މޫދަށް އެރި އުޅުނު ސްޕެއިންގެ ޓޫރިސްޓަކަށް މިޔަރެއް ދިން ހަމަލާތަކުގައި އޭނާގެ އެއް ފައި ބުރިކޮށްލަންޖެހިއްޖެ އެވެ.
ފުލުހުން މިރޭ ބުނީ މި ހާދިސާ ރިޕޯޓްކޮށްފައިވަނީ އޭޕްރީލް 11 ވީ ހޮނިހިރު ދުވަހުގެ މެންދުރުފަހުގެ ވަގުތެއްގައި ކަމަށެވެ. މި ހާދިސާގައި އަނިޔާވެފައިވަނީ ސްޕެއިންއަށް ނިސްބަތްވާ ފިރިހެން ފަތުރުވެރިއަކަށެވެ.
މިޔަރުގެ މި ހަމަލާގައި އޭނާގެ ދެ ފަޔަށް ބޮޑެތި ޒަހަމްތަކެއް ލިބިފައިވާއިރު، ހާދިސާއަށްފަހު ފުރަތަމަ ފަރުވާ ދީފައިވަނީ ގއ. އަތޮޅު ހޮސްޕިޓަލުގެ އައި.ސީ.ޔޫގައެވެ.
ނަމަވެސް، ހާލަތު ސީރިއަސްވުމުގެ ސަބަބުން އިތުރު ފަރުވާއަށް އޭނާ މާލެ ގެނައެވެ.
ލިބިފައިވާ ފުން ޒަހަމްތަކުގެ ސަބަބުން، ޑޮކްޓަރުން ވަނީ އޭނާގެ އެއް ފައި ބުރިކޮށްލާފައި ކަމަށް ފުލުހުން ބުންޏެވެ.
މި ހާދިސާއާ ގުޅިގެން ބަލަންޖެހޭ ކަންކަން ފުލުހުން ދަނީ ތަހުގީގު ކުރަމުންނެވެ.
އަދި މިފަދަ ހާލަތްތަކުގައި ފުރިހަމަކުރަންޖެހޭ އިޖުރާއީ ކަންކަމާއި، ފަތުރުވެރިޔާއަށް ފޯރުކޮށްދޭންޖެހޭ އެހީތެރިކަން ފޯރުކޮށްދިނުމުގެ މަސައްކަތް ކަމާބެހޭ އިދާރާތަކާ ގުޅިގެން ކުރަމުންދާ ކަމަށް ފުލުހުން ބުނެފައިވެއެވެ.
