ރާއްޖޭގެ ގައުމީ ފުޓްބޯޅަ ޓީމުން މިދިޔަ އަހަރުގެ ސާފް ސުޕަ ކަޕް ކާމިޔާބު ކުރުމާއި ގައުމީ ފުޓްސަލް ޓީމުން މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ހޯދުމާ ގުޅިގެން މި ދެ ޓީމަށް އެއް މިލިޔަން ރުފިޔާގެ ބޯނަހެއް ދިނުމަށް ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ނިންމަވައިފި އެވެ.
ދައުލަތުގެ މީޑިއާ، "ޕީއެސްއެމް" އަށް ދެއްވި އިންޓަވިއުއެއްގައި ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވީ، ރައީސް މުއިއްޒު ނިންމަވާފައިވަނީ ހުރިހާ ކުޅުންތެރިންނާއި އޮފިޝަލުން ހިމެނޭ ގޮތަށް މުޅި ޓީމަށް މި ބޯނަސް ދިނުމަށް ކަމަށެވެ.
މިއީ، މިދިޔަ އަހަރު އޮކްޓޫބަރު މަހު ރައީސް، މުއިއްޒު އާއި ފުޓްބޯޅަ ޓީމު، ލެމަންގްރާސް ސިޓްރޯންގައި ބޭއްވި ބައްދަލުވުމުގައި، ނިންމެވި ނިންމެވުމަށް ކަމަށް މިނިސްޓަރު ރާފިއު ވަނީ ވިދާޅުވެފަ އެވެ.
ސައުތު އޭޝިއަން ސުޕަ ކަޕްގައި ހަތަރު ގައުމު ކުޅެން ނިންމި ނަމަވެސް އެންމެ ފަހުން މުބާރާތުގައި ކުޅުނީ ރާއްޖެ އާއި ލަންކާ އެކަންޏެވެ. އެހެންވެ، ދެ މެޗު ކުޅެފައި ޗެމްޕިއަން ކަނޑައެޅީ އެގްރިގޭޓުންނެވެ. ރާއްޖޭން ފުރަތަމަ މެޗު 3-0 އިން މޮޅުވިއިރު، ދެ ވަނަ މެޗު ނިމުނީ 1-1 އިން އެއްވަރުވެގެންނެވެ. ސާފް އިން މުޅިން އަލަށް ބާއްވާ ފުޓްސަލް މުބާާރާތުގެ ޗެމްޕިއަންކަން، ގައުމީ ފިރިހެން ފުޓްސަލް ޓީމުން ކާމިޔާބުކުރީ ބާކީ މެޗެއް އޮއްވައި، ފުރަތަމަ ކުޅުނު ފަސް މެޗުން މޮޅުވެގެންނެވެ.
ސާފްގެ ފުރަތަމަ ފުޓްސަލް ޗެމްޕިއަންޝިޕްގެ ޗެމްޕިއަނުންނަށް އިނާމް ފައިސާ އެއް ދޭ ގޮތަށް ސާފް އިން ކަނޑައަޅާފައި ނެތެވެ. އަދި، ސްރީ ލަންކާ ފުޓްބޯޅަ ފެޑެރޭޝަނުން އިންތިޒާމްކުރި ސައުތު އޭޝިއަން ސުޕަ ކަޕް ކާމިޔާބުކުރި ރާއްޖޭގެ ޓީމަށް ވެސް އިނާމް ފައިސާއެއް ލިބޭ ގޮތަށް ކަނޑައަޅާފައި ނުވެ އެވެ.
