ރައީސް މުހައްމަދު މުއިއްޒަށް ތުހުމަތު ކުރެވޭ ކޮރަޕްޝަންގެ މައްސަލަތަކުގެ ތަހުގީގު ކުރިއަށްދާ ގޮތް ހާމަ ކުރަން އެންޓި ކޮރަޕްޝަން ކޮމިޝަނުން ދެކޮޅު ހަދައިފި އެވެ.
ހައުސިން މިނިސްޓަރު އަދި މާލޭގެ މޭޔަރުގެ މަގާމުގައި މުއިއްޒު ހުންނެވި ދުވަސްވަރު މުއިއްޒު ހިންގެވި ކަމަށް ޝައްކު ކުރެވޭ 20 އަށް ވުރެ ގިނަ މައްސަލަ އޮތީ އޭސީސީ އަށް ހުށަހަޅައިފަ އެވެ. އެ މައްސަލަތައް ބަލަމުންދާ ކަމަށް އޭސީސީ އިން ވަނީ މީގެ ކުރިން ބުނެފަ އެވެ.
އެކަމަކު، އެ މައްސަލަތަކުގެ ތަހުގީގު ކުރިއަށްދާ ގޮތާމެދު ސުވާލު ކުރުމުން އޭސީސީ އިން ބުނީ ވަކިވަކި މައްސަލަތަކުގެ ތަފުސީލު ހާމަ ކުރެވެން ކަމަށެވެ.
ފެބްރުއަރީ 13، 2022، ގައި އޭސީސީން އާންމު ފަރާތަކަށް ދީފައިވާ ޖަވާބުގައި ބުނެފައިވާ ގޮތުން، އޭރު ބަލަމުންދިޔަ މައްސަލަތަކުގެ ތެރޭގައި މުއިއްޒު ހައުސިން މިނިސްޓަރުކަމުގައި ހުންނެވިއިރުގެ ގިނަ މައްސަލަތަކެއް ހިމެނެ އެވެ. އޭގެ ތެރޭގައި ހިޔާ ފުލެޓު ލިސްޓާ ބެހޭ މައްސަލަތަކެއް ވެސް ހިމެނެ އެވެ.
އެ ގޮތުން ހިޔާ މަޝްރޫއު އެންމެ އަގުބޮޑު ޕްރޮޕޯސަލް ހުށަހެޅި ކުންފުންޏާ ހަވާލުކުރެއްވި ކަމަށް ބުނާ މައްސަލައަކާއި ފުލެޓު ލިސްޓުގައި އޮޅުވާލި ކަމަށް ބުނާ މައްސަލައެއްގެ އިތުރުން ވަޒީރު ކަމުގައި ހުންނެވި ދުވަސްވަރު އަމިއްލަ މަންފާއަށް މަޝްރޫއުތައް ކުންފުނިތަކަށް ދިން މައްސަލައެއް ވެސް ހިމެނެ އެވެ.
މީގެ އިތުރުން މުއިއްޒު މިނިސްޓަރުގެ މަގާމުގައި ހުންނެވިއިރު، ބޭރު ކުންފުނިތަކަކުން އެމަނިކުފާނުގެ އަމިއްލަ އެކައުންޓަށް ގިނަ އަދަދެއްގެ ފައިސާ ޖަމާކުރި މައްސަލައެއް ވެސް މި ނޫހުން 2023 ވަނަ އަހަރު ވާނީ ފެންމަތިކޮށްފަ އެވެ.
މުއިއްޒު ވިދާޅުވީ ބޭރު ކުންފުންޏަކުން އެމަނިކުފާނުގެ އެކައުންޓަށް ޖަމާވީ އެމަނިކުފާނުގެ ރޯހައުސްއެއް ކުއްޔަށް ދީގެން ލިބެން ޖެހޭ ފައިސާ ކަމަށެވެ.
