ރައީސް މުހައްމަދު މުއިއްޒު ހަތަރު އަތޮޅަކަށް ކުރައްވާ ދަތުރުގެ ތެރެއިން ވަޑައިގަންނަވާ ރަށްރަށުގެ މަތިން އެމްއެންޑީއެފް އެއާކޯގެ ޑްރޯން ދުއްވަން ފަށައިފި އެވެ.
ދަތުރުގެ ތެރެއިން މުއިއްޒު މިހާރު ހުންނެވީ މ. ކޮޅުފުށީގަ އެވެ. މިވަގުތު ސިފައިންގެ ޑްރޯން އޮތީ ކޮޅުފުށީގެ ހުޅަނގުން 16،500 ފޫޓު މަތީގަ އެވެ. ޑްރޯން ދުއްވަމުން ގެންދަނީ ސަވައިލެންސަށް އާންމުކޮށް ދުއްވާ ޕެޓާންތަކަށެވެ.
ނ. މާފަރު އެއާޕޯޓުން ނައްޓާލީ މިއަދު ހެދުނު 6:00 ހާއިރު ކަމަށެވެ. ގަޑިއިރެއްހާއިރުގެ ދަތުރަކަށްފަހު ޑްރޯން ގޮސްފައިވަނީ މ. އަތޮޅަށެވެ. ރައީސް ރޭ ހުންނެވި މުލީ ކައިރިން ގޮސް ޑްރޯން ބޮޅު އަޅަން ފަށާފައިވަނީ ކޮޅުފުށީގަ އެވެ.
މުއިއްޒު ހުންނަވާ ރަށްރަށުގެ މަތިން ޑްރޯން ދުއްވާ ސަބަބެއް އެމްއެންޑީއެފް އަކުން ނުބުނެ އެވެ. މީގެ ކުރިން ވެސް މުއިއްޒުގެ ދަތުރަކާއި ގުޅުވާ ރަށްރަށުގެ މަތިން ޑްރޯން ދުއްވާފައިވެ އެވެ.
މ. އަތޮޅު މަތިން އެމްއެންޑީއެފް ގެ ޑްރޯން ދުއްވަނީ ---- ފޮޓޯ: ފްލައިޓު ރާޑަރު
ފެބްރުއަރީ މަހު ދ. އަތޮޅަށް މުއިއްޒު ކުރެއްވި ދަތުރާއި ގުޅުވާ ޑްރޯން ދުއްވީ ރައީސްގެ ސެކިއުރިޓީ ބެލެހެއްޓުމަށް ސިފައިން ކުރިއަށް ގެންދާ އޮޕަރޭޝަނުގެ ދަށުން ކަމަށް އޭރު މައުލޫމާތު ލިބުނެވެ.
ރައީސް މުއިއްޒުގެ ވެރިކަމުގެ ކުރީކޮޅު ތުރުކީގެ އަސްކަރީ ކުންފުންޏަކުން މި ޑްރޯންތައް ގަތުމަށް ދައުލަތުގެ ސަޕްލިމެންޓަރީ ބަޖެޓުން 37 މިލިއަން ޑޮލަރު ހޭދަކުރި އެވެ. އަދި މިއީ ރާއްޖޭގެ ބިޔަ އިގުތިސޯދީ ސަރަހައްދު ބެލެހެއްޓުމުގެ ގާބިލުކަން ވަރުގަދަކުރަން ގެނައި ޑްރޯންތަކެއް ކަމަށް ސަރުކާރުން ތަކުރާރުކޮށް ބުނެފައިވެ އެވެ.
ޑްރޯން ދުއްވުމަށް ހިނގާ ހަރަދުގެ އެއްވެސް ތަފުސީލެއް މިހާތަނަށް އެމްއެންޑީއެފް ނުވަތަ ޑިފެންސް މިނިސްޓްރީން އާންމުކޮށްފައެއް ނުވެ އެވެ.
