ރަށު ކައުންސިލުތަކަށް ބަޖެޓު ދޭ އިރު ރަށުގެ އާބާދީއަށް ބެލުމުގެ އިތުރުން ރަށުގެ ބޮޑު މިނަށް ބަލާފައި ބަޖެޓު ކަނޑައަޅާ ގޮތަށް ބަދަލު ކުރަން ސަރުކާރުން ނިންމައިފި އެވެ.
ރަށުގެ ބޮޑު މިނަށް ބަލާފައި ބަޖެޓު ކަނޑައެޅޭނެ ގޮތަށް ބަދަލު ކުރައްވާނޭ ކަމަށް ވިދާޅުވީ ރައީސް މުހައްމަދު މުއިއްޒެވެ. އެމަނިކުފާނު ވިދާޅުވީ އެ ބަދަލު ގެންނާނީ އަންނަ އަހަރުގެ ބަޖެޓު ފާސް ކުރުމުގެ ކުރިން ކަމަށެވެ.
"އެހެން ކަމުން، ބްލޮކް ގްރާންޓުގެ ފިސްކަލް ފޯމިއުލާ މިހާރު ކަނޑައަޅުއްވާފައިވާ ގޮތުން، އެ ކައުންސިލްތަކަށް ގެއްލުންވާތީ ފިސްކަލް ފޯމިއުލާ މުރާޖާކުރުމުގައި ރަށުގެ ބޮޑުމިނަށް ރިއާޔަތްކުރެވޭ ގޮތަށް ބަދަލުކޮށް، 2026 ވަނަ އަހަރުގެ ބަޖެޓު ހުށަހަޅާއިރު މި ބަދަލާ އެކު ހުށަހެޅުމަށް ވާނީ ނިންމާފައި،" މުއިއްޒު ވިދާޅުވި އެވެ.
އަންނަ އަހަރުގެ ބަޖެޓު ފާސް ކުރުމުގެ ކުރިން، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް ލިބޭ ފައިސާގެ އަދަދު ބޮޑު ކުރައްވާނެ ކަމަށް ވެސް މުއިއްޒު ވިދާޅުވި އެވެ. އެމަނިކުފާނު ވިދާޅުވީ ކައުންސިލަށް ލިބޭ ބަޖެޓުގެ ފަސް ޕަސެންޓު، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް ދިނުމުގެ ބަދަލުގައި ބަޖެޓުގެ 10 ޕަސެންޓު ދޭންޖެހޭ ގޮތަށް ގާނޫނު އިސްލާހު ކުރައްވާނެ ކަމަށެވެ.
އޭގެ އިތުރުން، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ބަޖެޓުން އެ ކޮމިޓީތަކުގެ މެންބަރުންނަށް ރޯދަ އެލަވަންސް ދިނުމުގެ ބަދަލުގައި، ކައުންސިލުގެ ބަޖެޓުން ރޯދަ އެލަވަންސް ލިބޭ ގޮތަށް ހަމަޖައްސަވާނެ ކަމަށް ވެސް މުއިއްޒު ވިދާޅުވި އެވެ.
titledesc
