ވަގުތީ ގޮތުން ބަންދުކުރި ފުވައްމުލައް އެއާޕޯޓު 48 ގަޑިއިރަށްފަހު މިއަދު ހުޅުވައިފި އެވެ.
އަދަދު އަށް އެނގިފައިވާ ގޮތުގައި ފުވައްމުލައް އެއާޕޯޓު އަލުން ހުޅުވާފައި ވަނީ އެ އެއާޕޯޓުގެ އަލިފާން ނިއްވާ އުޅަނދަށް ދިމާވި މައްސަލަ ހައްލު ކުރުމަށްފަހު އެވެ. ފަޔާ ޓްރަކެއް ނެތި އެއާޕޯޓު ހިންގުމަކީ ހުއްދަ ކަމެއް ނޫނެވެ.
ގާތްގަނޑަކަށް 14،000 އެއްހާ މީހުން ދިރިއުޅޭ ފުވައްމުލަކުގެ އެއާޕޯޓުގެ އޮޕަރޭޝަންސް ސެޕްޓެމްބަރު 1، އިން ފެށިގެން ހުއްޓުމުން އެތައް ބަޔަކަށް އޭގެ ސަބަބުން އަސަރުކުރި އެވެ.
އެގޮތުން ފަތުރުވެރިންނާއި ގިނަ އަދަދެއްގެ ދިވެހިންނަށް މާލެ ނާދެވި ފުވައްމުލަކުގައި ތާށިވި އެވެ. ބައެއް މީހުން ރާއްޖެއިން ބޭރަށް ދާން ވެގެން އޮތް ފްލައިޓް ވެސް އޭގެ ސަބަަބުން ކެޓި އެވެ.
ފުވައްމުލަކު މޭޔަރު އިސްމާއިލް ރަފީގު އަދަދު އާ ވާހަކަ ދައްކަވަމުން ވިދާޅުވީ، ބަލަންޖެހޭ މިންވަރަށް ބަލާ ނަމަ ދިމާނުވާނެ ފަދަ މައްސަލައެއް ދިމާވެގެން އެއާޕޯޓު ހުއްޓުނީތީ ކަންބޮޑުވާ ކަމަށެވެ. އަދި އެފަދަ މައްސަލައެއް ދިމާނުވާނެ ގޮތަކަށް މަސައްކަތް ކުރުމަށް ސަރުކާރާއި އެއާޕޯޓު ހިންގާ އެމްއޭސީއެލްއާ ވާހަކަ ދައްކަވާފައިވާ ކަމަށް ވެސް ވިދާޅުވި އެވެ.
"މިކަހަލަ ކަމެއް ދިމާނުވާނެ ގޮތަކަށް ކަންކަން ރާވައި، އެފަދަ ކަމެއް ކުރިމަގުގައި ދިމާނުވާނެކަން ޔަގީން ކުރަންޖެހޭ. އެއާޕޯޓު ކުންފުންޏާ ވެސް ސަރުކާރާ ވެސް އަޅުގަނޑުމެން ވާހަކަ ދައްކައިފިން،" ރަފީގް ވިދާޅުވި އެވެ. "ފަޔާ ޓްރަކަކީ ކުރިން ވެސް މައްސަލަ ޖެހިފައި ހުރި އުޅަނދެއް."
ފުވައްމުލަކަށް މި ދުވަސްވަރު ވަރަށް ގިނަ އަދަދެއްގެ ގެސްޓުން އާދެ އެވެ. ދުވާލަކު އާންމުކޮށް ދެ ފްލައިޓު އެ ރަށަށް ދަތުރު ކުރާއިރު ކޮންމެ ފްލައިޓެއް ވެސް މިހާރު އޮންނަނީ ފުރިފައި ކަމަށް މޭޔަރު ވިދާޅުވި އެވެ.
ފުވައްމުލަކަކީ އަރައިފޭބުން އުނދަގޫ ރަށެކެވެ. ރަށް އުފެދިފައިވާ ގޮތުން ދޯނިފަހަރުގައި ރަށާ ގާތް ކުރުމަކީ ވަރަށް ނުރައްކާތެރި ކަމެކެވެ. ފުވައްމުލަކުގައި ބަނދަރު ހެދި ފަހުން ވެސް، ރަށަށް އަރަން އުޅުނު އެތައް ބަޔަކު ހިތާމަވެރި އެކި ހާދިސާތަކުގައި ވަނީ ނިޔާވެފަ އެވެ. ފުވައްމުލަށް ހުޅުވިގެންދިޔައީ 2011 ވަނަ އަހަރު އެ ރަށުގެ އެއާޕޯޓު އިފުތިތާހު ކުރުމުންނެވެ.
