މިނިވަން މީޑިއާ ނެތިކޮށްލަން ސަރުކާރުން ފަހަތުގައި އޮވެގެން ރައްޔިތުންގެ މަޖިލީހަށް ހުށަހަޅާފައިވާ ބިލު ބޭރުކޮށްލަން ރިޕޯޓާސް ވިތައުޓް ބޯޑާސް (އާރުއެސްއެފް) އިން ވެސް ގޮވާލައިފި އެވެ.
އެ ޖަމިއްޔާއިން މިއަދު ނެރުނު ބަޔާނެއްގައި، އެ ބިލަކީ ރާއްޖޭގެ ނޫސްވެރިން އަދި ނޫސްވެރިކަމުގެ ޖަމިއްޔާތަކާއި މުއައްސަސާތަކުގެ މަޝްވަރާއެއް ނެތި ފަރުމާކޮށް ހުށަހެޅި ބިލެއްކަން ވަނީ ފާހަގަކޮށްފަ އެވެ. އަދި އެ ބިލުގެ ސަބަބުން ރާއްޖޭގެ ޑިމޮކްރަސީއަށް ސީދާ ގޮތުން ނުރައްކާވާ ކަމަށް ވެސް އާރުއެސްއެފް އިން ބުނެފައިވެ އެވެ.
"މި ބިލަކީ ރާއްޖޭގައި އޮތް ނޫސްވެރިކަމުގެ މިނިވަންކަމަށް ސީދާކޮށް ދެވޭ ހަމަލާއެއް. ސަރުކާރުގެ ބާރު އޮންނާނެހެން އުފެދޭ ކޮމިޝަނަކަށް ނުހައްގު އެތައް ބާރެއް ދިނުމުން ހިތްވަރު ލިބިގެންދާނީ ސެންސާޝިޕަށް،" ރިޕޯޓާސް ވިތައުޓް ބޯޑާސް ގެ ދެކުނު އޭޝިއާ ޑެސްކުގެ ހެޑް ސީލިއާ މާސިއާ ވިދާޅުވެފައިވެ އެވެ.
ކޯޓު އަމުރަކާ ނުލައި ޓީވީ ޗެނަލްތަކާއި ނޫސްތަކުގެ އޮފީސްތަކަށް ވަނުމުގެ ބާރު ބިލު ފާސްވެއްޖެ ނަމަ ފުލުހުންނަށް ލިބޭނެ އެވެ. އެކަމާމެދު ވެސް އާރުއެސްއެފް އިން ކަންބޮޑުވުން ފާޅު ކުރި އެވެ. މަޖިލީހާއި ސަރުކާރަށް އެ ޖަމިއްޔާއިން ގޮވާލީ މީޑިއާތަކުގެ މިނިވަން އަދި ސެލްފް ރެގިއިލޭޓަރީ ނިޒާމެއް ގާއިމުކުރުމަށެވެ.
އާރުއެސްއެފް ގެ އިތުރުން، ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އަދި ނޫސްވެރިންގެ ހައްގުތަކަށް ވަކާލާތުކުރާ ބައިނަލްއަގްވާމީ ޖަމިއްޔާ އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން ވެސް ވަނީ ގޮވާލައިފަ އެވެ.
މިނިވަން މީޑިއާ ނެތިކޮށްލާ ބިލުގައި ބުނެފައި ވަނީ ބިލަށް އަމަލު ކުރަން ފެށުމާއެކު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި ކޮމިޝަނެއް އުފައްދަންޖެހޭ ކަމަށެވެ. އެ ކޮމިޝަން އުފެދުމުން މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އުވޭނެ އެވެ.
މީޑިއާ އެންޑް ބްރޯޑްކާސްޓިން ކޮމިޝަނުގައި ތިބޭނީ ހަތް މެންބަރުން ކަމަށް ބިލުގައި ބުނެ އެވެ. އޭގެ ތެރެއިން ތިން މެންބަރުންނަކީ ރައީސުލްޖުމްހޫރިއްޔާ އައްޔަން ކުރާ މެންބަރުންނެވެ. އަނެއް ހަތަރު މެންބަރުންނަކީ މީޑިއާތަކުގެ ފަރާތުން އިންތިހާބު ކުރާ މެންބަރުންނެވެ. އެފަދަ އިންތިހާބެއްގައި ބައިވެރިވެވޭނީ ވުޖޫދުވިތާ ފަސް އަހަރުވެފައިވާ މީޑިއާތަކަށެވެ.
މީޑިއާ ރެގިއުލޭޓު ކުރަން އެކުލަވާލާ ކޮމިޝަނެއްގައި ރައީސުލްޖުމްހޫރިއްޔާ އައްޔަން ކުރާ މެންބަރުންތަކެއް ތިބެންޖެހޭ ސަބަބެއް އެ ބިލުގައި ބަޔާންކޮށްފައެއް ނުވެ އެވެ. އަދި ބިލުގައިވާ ގޮތުން ކޮމިޝަނުގެ ރައީސް އައްޔަން ކުރަންޖެހެނީ ރައީސުލްޖުމްހޫރިއްޔާ އެވެ.
މި ބިލު ބޭރުކޮށްލަން ރާއްޖޭގެ ނޫސްވެރިންނާއި ޖަމިއްޔާތަކުން އަދި ސިޔާސީ ޕާޓީތަކުން ގޮވާލަމުން ދަނިކޮށް، ސަރުކާރުން އިއްޔެ ވަނީ އެ ބިލު ބޭރުކޮށްލަން ޖެހޭ ސަބަބެއް ނެތް ކަމަށް ބުނެފަ އެވެ.
ބަންޑާރަ ނައިބު އަހުމަދު އުޝާމް މިހެން ވިދާޅުވީ، މޯލްޑިވްސް ޖާނަލިސްޓު އެސޯސިއޭޝަން (އެމްޖޭއޭ) އިން ރައީސް މުހައްމަދު މުއިއްޒުއާ ބައްދަލުކުރައްވައި ބިލު އިސްލާހުކުރުމުގެ ބަދަލުގައި އެ ބިލު ބޭރުކޮށްލަން ބޭނުންވާ ކަމަށް ނޫސްވެރިން ޑިމާންޑު ކުރި ފަހުން ރައީސް އޮފީހުގައި ނޫސްވެރިންނާ ބައްދަލުކުރައްވަމުންނެވެ.
"އަޅުގަނޑުމެންނަށް ގަބޫލުކުރެވެނީ، އަޅުގަނޑަށް ގަބޫލުކުރެވެނީ، އަޅުގަނޑުމެންގެ އޮޕީނިއަންއަކީ މިހާރު މި ހުށަހަޅާއި އޮތް ބިލު އިތުރަށް ދިރާސާކުރުމަށް ފަހު ރަނގަޅުކޮށްގެން ކުރިއަށް ދެވިދާނެ ކަމަށް. އަޅުގަނޑެއް ގަބޫލެއް ނުއެއް ކުރަން ބިލު އަނބުރާ ނަގަން ޖެހޭނެ ކަމަކަަށް،" އުޝާމް ވިދާލުވި އެވެ.
