ބައެއް ނޫސްވެރިން ރައީސް އޮފީސް ދޮރުމަތީގައި ހުންނަ މީޑިއާ ފެންޑާގައި މިއަދު މަސައްކަތް ކުރަން ފަށައިފި އެވެ.
ހެނދުނު 7:30 އިން ފެށިގެން ރައީސް އޮފީސް ދޮރުމަތީގައި ނޫސްވެރިން ތިބިއިރު، ރައީސް މުހައްމަދު މުއިއްޒު މަސައްކަތަށް އޮފީހަށް ވަޑައިގެންނެވީ 8:15 ގަ އެވެ.
ކާރުކޮޅުގައި މުއިއްޒު އޮފީހަށް ވަޑައިގެން ގަޑީގައި ނޫސްވެރިން ރައީސަށް ގޮވި އެވެ. އެކަމަކު ނޫސްވެރިންނަށް އެއްވެސް އިޖާބައެއް ނުދެއްވައި މުއިއްޒު ވަނީ ކާރުކޮޅުގައި އޮފީހަށް ވަދެވަޑައިގެންފަ އެވެ.
މީޑިއާތައް ނެތިކޮށްލާ ބިލަށް އިއްޔެ މަޖިލީހުގައި ބަހުސް ކުރަމުންދިޔައިރު ނޫސްވެރިން ވަނީ މަޖިލިސް ދޮށުގައި އިހުތިޖާޖުކޮށްފަ އެވެ. އޭގެއިތުރުން ބިލު ބަލައިގަންނަން ފާސްކުރީމަ ނޫސްވެރިން ވަނީ ރައީސް އޮފީހާއި މުލީއާގޭ ދޮށުގައި ވެސް މުޒާހަރާ ކޮށްފަ އެވެ.
ބިލާ ގުޅިގެން ނޫސްވެރިންގެ ހުރި ކަންބޮޑުވުންތައް އަޑުއެއްސެވުމަށް މުއިއްޒުއާ ބައްދަލުކުރަން ތަކުރާރުކޮށް އެދެމުންދިޔަ ނަމަވެސް، މިހާތަނަށް ވެސް މުއިއްޒު ނޫސްވެރިންނާ ބައްދަލުކުރައްވާފައެއް ނުވެ އެވެ.
ސަރުކާރުން އަޑީގައި ތިބެގެން ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ލައްވައި ހުށަހެޅުއްވި މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލު މަޖިލީހަށް ހުށަހެޅުއްވީ މީޑިއާތަކާ އެއްވެސް މަޝްވަރާ ކުރުމެއް ނެތި އެވެ.
މިނިވަން މީޑިއާ ނެތިކޮށްލާ ބިލުގައި ބުނެފައި ވަނީ ބިލަށް އަމަލު ކުރަން ފެށުމާއެކު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި ކޮމިޝަނެއް އުފައްދަންޖެހޭ ކަމަށެވެ. އެ ކޮމިޝަން އުފެދުމުން މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އުވޭނެ އެވެ.
ބިލުން އުފެދޭ މީޑިއާ އެންޑް ބްރޯޑްކާސްޓިން ކޮމިޝަނުގައި ތިއްބަވާނީ މީޑިއާތަކުން އައްޔަންކުރާ ހަތަރު މެންބަރުންނާއި ރައީސުލްޖުމްހޫރިއްޔާ އައްޔަނުކުރައްވާ ތިން މެންބަރުންނެވެ. އެ ކޮމިޝަންގައި ރައީސް އައްޔަންކުރައްވާ އެއްވެސް މެންބަރަކު ހުންނަން ޖެހޭނެ ކަމަށް ނޫސްވެރިން ގަބޫލެއް ނުކުރައްވަ އެވެ.
