މިނިވަން މީޑިއާ ނައްތާލުމަށް ސަރުކާރުން ފަހަތުގައި އޮވެގެން ހުށަހެޅި ބިލުގައި އެކަށްވެސް އޮތީ ހައްގުތަށް ހަނިކުރުމުގެ ވާހަކަތައް ކަމަށާއި މަޖިލީހުގެ ކޮމިޓީއަކުން އެ ބިލު އިސްލާހު ކުރެވޭނެ ކަމަށް ގަބޫލު ނުކުރައްވާ ކަމަށް "ދައުރު" ނޫހުގެ މެނޭޖިން އެޑިޓަރު އަހުމަދު ޒާހިރު (ހިރިގާ) ވިދާޅުވެއްޖެ އެވެ.
ރާއްޖޭގެ ތަޖުރިބާކާރު ނޫސްވެރިން އެ ބިލު އަނބުރާ ގެންދިޔުމަށް ގޮވާލައި މިއަދު ބޭއްވި ނޫސްވެރިންގެ ބައްދަލުވުމެއްގައި ހިރިގާ މިފަދައިން ވިދާޅުވީ، ބިލާއި ގުޅޭގޮތުން ރައީސް މުހައްމަދު މުއިއްޒު ދެއްކެވި ވާހަކައަށް ރައްދު ދެއްވަމުންނެވެ.
އެގޮތުން، ބިލުގެ އެންމެ މާއްދާއެއް އިސްލާހުކޮށްގެން ހައްގުތަށް ކަށަވަރުނުވާނެ ކަމަށާއި މި މައްސަލައިގެ ހައްލަކީ ބިލު ބޭރުކޮށްލުން ކަމަށް ހިރިގާ ވިދާޅުވި އެވެ. ހދ. އަށް ކުރައްވަމުން ގެންދަވާ ދަތުރުގެ ތެރެއިން ރަށެއްގައި ހުންނަވާ މުއިއްޒު ވަނީ ބިލުން އަލަށް ހަދާ ކޮމިޝަނުގެ ރައީސް އައްޔަން ކުރުމުގެ ބާރު އެމަނިކުފާނަށް އޮތް އޮތުން ބަދަލުކުރަން މަޖިލިސް މެންބަރުންނަށް އަންގަވާނެ ކަމަށް ވިދާޅުވެފަ އެވެ.
"ދެން ބިލުގަ ހުރި އެއްވެސް ވާހަކައެއް ރައީސް ވިދާޅެއް ނުވޭ ދެއްތޯ. އެއަށްވުރެ މާ ބޮޑަށްށޭ، މި މުޅި ބިލުން އޮތީ ހައްގުތައް ހަނިކޮށްފަ. އެހެންވީމަ މުޅި ބިލު ކޮށާ މަށައިގެން މަޖިލީހުގެ ކޮމިޓީއަކަށް އެކަން ކުރެވޭނެ ކަމަކަށް އަޅުގަނޑުމެން ގަބޫލެއް ނުކުރަން،" ހިރިގާ ވިދާޅުވި އެވެ.
މީޑިއާތައް ރެގިއުލޭޓް ކުރުމާއި ދެކޮޅު ނޫންކަން ފާހަގަކުރައްވާ ހިރިގާ ވަނީ މިފަދަ ބިލެއް ފަރުމާ ކުރަން ޖެހޭނީ ބޭރުގެ ފަންނީ މީހުންގެ އެހީއާއެކު ކަން ފާހަގަކުރައްވާފަ އެވެ. އަދި، މިހާރު އޮތް ބިލާއެކު ކުރިއަށް ދެވޭނެ އެއްވެސް މަގެއް ނެތްކަން އޭނާ ވަނީ ތަކުރާރުކޮށް ފާހަގަކުރައްވާފަ އެވެ.
މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލުގެ ނަމުގައި ބިލެއް ހުށަހެޅުއްވީ އެފަދަ ބިލެއް މީގެ ކުރިން ވެސް ހުށަހެޅުއްވި ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރެވެ. ނޫސްވެރިންނާ އެއްވެސް މަޝްވަރާއެއް ކުރުމެއްނެތި ހުށަހެޅި މި ބިލަށް ވެރިކަންކުރާ ޕީއެންސީގެ މަޖިލިސް މެންބަރުންނާއި ސަރުކާރުގެ ވެރިން ދަނީ ސީދާކޮށް އަދި ނުސީދާކޮށް ތާއީދުކުރަމުންނެވެ.
މަޖިލީހުގައި މިހާރު ބަހުސް ފަށާފައިވާ އެ ބިލް އަނބުރާ ގެންދިޔުމަށް، މޯލްޑިވްސް މީޑިއާ ކައުންސިލް (އެމްއެމްސީ) އަދި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ އިތުރުން ގިނަ އަދަދެއްގެ ނޫސްވެރިން ވަނީ ގޮވާލައިފަ އެވެ. އަދި ބިލް އަނބުރާ ގެންދިޔުމަށް އެންމެ ބޮޑު އިދިކޮޅު ޕާޓީ، އެމްޑީޕީން ވެސް ވަނީ ގޮވާލާފަ އެވެ.
މީޑިއާ ނެތިކޮށްލާ ބިލަށް ފާޑުކިޔުން އަމާޒުވަމުން ދަނިކޮށް ހިތަށް އަންނަހާ އެއްޗެއް ބުނެ، ލިޔުމަކީ އޮތް މިނިވަންކަމެއް ނޫން ކަމަށް މުއިއްޒު ކުރިން ވިދާޅުވުމަށް ފަހު، ރޭ ހދ. ނޮޅިވަރަންފަރުގައި ވިދާޅުވީ ބިލުން އުފެދޭ ކޮމިޝަންގެ ރައީސަކަށް، ރައީސުލްޖުމްހޫރިއްޔާ އައްޔަންކުރާ މެންބަރެއް ހުންނަ ގޮތަށް އޮތުމުގެ ބަދަލުގައި އިސްލާހުކުރާއިރު ކޮމިޝަނުގެ މެންބަރުން ވޯޓުލައިގެން ރައީސް ހޮވޭ ގޮތަށް ބަދަލުކުރަން ޕީއެންސީ މެންބަރުންނަށް އަންގަވާފައިވާ ކަމަށެވެ.
މީޑިއާ ކޮންޓްރޯލް ކުރަން މުއިއްޒު ބޭނުން ނުވާ ކަމަށް ވިދާޅުވި ނަމަވެސް، ބިލް ބޭރު ކުރަން ނޫސްވެރިން ގޮވާލާ ގޮވާލުމަށް އިޖާބަ ދެއްވައި، އެ ބިލާ ދެކޮޅުމަށް އެ މަނިކުފާނު ބަހެއް ވިދާޅެއް ނުވެ އެވެ. އަދި އެ މަނިކުފާނުގެ ޕީއެންސީން ވެސް ބިލާ ދެކޮޅުކަން ހާމައެއް ނުކުރެ އެވެ.
