މިނިވަން މީޑިއާ ނައްތާލުމަށް ސަރުކާރުން ފަހަތުގައި އޮވެގެން ހުށަހެޅި ބިލަކީ ނޫސްވެރިކަމުގެ މިނިވަންކަމަށް އޮތް ވަރަށް ބޮޑު ނުރައްކަލެއް ކަމަށް ވިދާޅުވެ އެ ބިލު އަނބުރާ ގެންދިޔުމަށް ރާއްޖޭގައި މީޑިއާގެ މިނިވަންކަން ނޯންނާނެ ކަމަށް ރާއްޖޭގައި ފާހަގަކޮށްލެވޭ ސީނިއާ ނޫސްވެރިއެއް ކަމަށްވާ އަހުމަދު ޒާހިރު (ހިރިގާ) ވިދާޅުވެއްޖެ އެވެ.
އެ ބިލު ހުށަހެޅުއްވީ އަމިއްލަ މެންބަރެއްގެ ގޮތުގައި ތުޅާދޫ ދާއިރާ ތަމްސީލު ކުރައްވަމުން ގެންދަވާ އަބްދުލްހަންނާނު އަބޫބަކުރު އެވެ. އޭނާ އެ ބިލު ހުށަހެޅި ނޫސްވެރިންނާ އެއްވެސް މަޝްވަރާއެއް ކުރުމެއް ނެތި އެވެ.
އެކްސްގައި ލިޔުއްވި ތުރެޑެއްގައި "ދައުރު" ގެ މެނޭޖިން އެޑިޓަރުކަން ކުރައްވާ ހިރިގާ ވިދާޅުވީ އަމިއްލަ ތަޖުރިބާގެ އަލީގައި، މީޑިއާގެ ރެގިއުލޭޓަރީ ނިޒާމަށް ބަދަލުތަކެއް ގެންނަން ޖެހޭ ކަމަށެވެ. އެެހެން ނަމަވެސް، ބިލުގައި އޮތް ގޮތަށް ސަރުކާރުގެ ނުފޫޒު ފޯރުވޭ ރައީސުލްޖުމްހޫރިއްޔާ އައްޔަންކުރާ މެންބަރުންތަކެއް ތިބޭ ކޮމިޝަނެއް އުފެއްދުމަކީ ހައްލެއް ނޫން ކަމަށް "ހަވީރު" ނޫހުން ނޫސްވެރިކަމުގެ ކެރިއަރު ފެއްޓެވި ޒާހިރު ލިޔުއްވި އެވެ.
"އަޅުގަނޑު އަބަދުވެސް ތާއީދުކުރަނީ ސެލްފް ރެގިއުލޭޓަރީ ފްރޭމްވޯކެއްގެ ދަށުން މީޑިއާ އިންޑަސްޓްރީ ރެގިއުލޭޓް ކުރާ ގޮތަށް، މިއީ ޑިމޮކްރެޓިކް ގިނަ ގައުމުތަކުގައި އާންމުކޮށް ކަން ކުރާ ގޮތް،" ނޫސްވެރިކަން ކުރިއަރުވައި، ނޫސްވެރިން ތަރައްގީ ކުރެއްވުމަށް ގިނަ މަސައްކަތްތަކެއް ކުރައްވާފައިވާ ޒާހިރު ވިދާޅުވި އެވެ.
ހަންނާން ހުށަހަޅާފައި އޮތް ބިލުގައި އޮތީ ނޫސްވެރިންގެ މަސައްކަތަށް ހުރަސް އެޅޭ، ސަރުކާރު ޖަވާބުދާރީ ކުރުވުމުގައި އޮތް ނޫސްވެރިންގެ ދައުރަށް ބުރޫއަރާ ފަދަ ރެގިއުލޭޓަރީ ނިޒާމެއް ގާއިމުކުރާ ގޮތަށް ކަމަށެވެ.
މީޑިއާތައް ޖޫރިމަނާ ކުރުމާއި ލައިސަންސް ސަސްޕެންޑް ކުރުން ފަދަ ފިޔަވަޅުތަކަކީ މާ ބިރުވެރި މާހައުލެއް އުފިދިގެންދިޔުމަށް މެދުވެރިވާނެ ފިޔަވަޅުތަކެއް. މި ބިލަކީ ރާއްޖޭގެ ނޫސްވެރިކަމުގެ މިނިވަންކަމަށް އޮތް ވަރަށް ބޮޑު ނުރައްކަލެއް ކަމަށް ވާތީ، އެ ބިލާ އަޅުގަނޑު ވަރަށް ބޮޑަށް ދެކޮޅު، އެ ބިލު ވަގުތުން އަނބުރާ ގެންދިއުމަށް ގޮވާލަން،" ސަން އޮންލައިންގެ ޗީފް އެޑިޓަރުކަން ވެސް ކުރެއްވި ޒާހިރު ވިދާޅުވި އެވެ.
އެ ބިލު އަނބުރާ ގެންދިޔުމަށް ގިނަ އަދަދެއްގެ ނޫސްވެރިންނާއި، މޯލްޑިވްސް މީޑިއާ ކައުންސިލް (އެމްއެމްސީ)، މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)، އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އަދި ރާއްޖޭގެ ބައެއް މަދަނީ ޖަމިއްޔާތަކުން ވަނީ ގޮވާލާފަ އެވެ.
މިނިވަން މީޑިއާ ނެތިކޮށްލާ ބިލުގައި ބުނެފައި ވަނީ ބިލަށް އަމަލު ކުރަން ފެށުމާއެކު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި ކޮމިޝަނެއް އުފައްދަންޖެހޭ ކަމަށެވެ. އެ ކޮމިޝަން އުފެދުމުން މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އުވޭނެ އެވެ.
މީޑިއާ އެންޑް ބްރޯޑްކާސްޓިން ކޮމިޝަނުގައި ތިބޭނީ ހަތް މެންބަރުން ކަމަށް ބިލުގައި ބުނެ އެވެ. އޭގެ ތެރެއިން ތިން މެންބަރުންނަކީ ރައީސުލްޖުމްހޫރިއްޔާ އައްޔަން ކުރާ މެންބަރުންނެވެ. އަނެއް ހަތަރު މެންބަރުންނަކީ މީޑިއާތަކުގެ ފަރާތުން އިންތިހާބު ކުރާ މެންބަރުންނެވެ. އެފަދަ އިންތިހާބެއްގައި ބައިވެރިވެވޭނީ ވުޖޫދުވިތާ ފަސް އަހަރުވެފައިވާ މީޑިއާތަކަށެވެ.
މީޑިއާ ރެގިއުލޭޓު ކުރަން އެކުލަވާލާ ކޮމިޝަނެއްގައި ރައީސުލްޖުމްހޫރިއްޔާ އައްޔަން ކުރާ މެންބަރުންތަކެއް ތިބެންޖެހޭ ސަބަބެއް އެ ބިލުގައި ބަޔާންކޮށްފައެއް ނުވެ އެވެ. އަދި ބިލުގައިވާ ގޮތުން ކޮމިޝަނުގެ ރައީސް އައްޔަން ކުރަންޖެހެނީ ރައީސުލްޖުމްހޫރިއްޔާ އެވެ.
ބިލުގައިވާ ގޮތުން ބޮޑެތި ބާރުތަކެއް އަލަށް އުފައްދާ ކޮމިޝަނަށް ލިބޭނެ އެވެ. އޭގެ ތެރޭގައި، 100،000 ރުފިޔާއާ ހަމައަށް މީޑިއާތައް ޖޫރިމަނާ ކުރުމާއި މައްސަލައެއް ބަލައި ނުނިމެނީސް ވެސް ވަގުތީ ގޮތުން ރަޖިސްޓްރީ ބާތިލު ކުރުން ހިމެނެ އެވެ. އަދި ފަހުން ކޯޓަށް ގޮސްގެން ވެސް ނޫހެއްގެ ރަޖިސްޓްރީ ބާތިލު ކުރެވިދާނެ ކަމަށް ބުނެފައިވެ އެވެ.
އޭގެ އިތުރުން، ކޮމިޝަނުން މައްސަލައެއް ބަލަމުންދަނިކޮށް، ނޫސް ވެބްސައިޓެއް ބްލޮކް ކުރުން ނުވަތަ ޓީވީގެ ބްރޯޑްކާސްޓު ހުއްޓުވަން އެންގުމުގެ ބާރު ވެސް ކޮމިޝަނަށް ލިބޭނެ އެވެ.
