ހިއުމަން ރައިޓްސް ކޮމިޝަން (އެޗްއާރްސީއެމް) އަށް ވެސް ކުރިން ސިފައިންގޭގައި މަސައްކަތް ކުރެއްވި ބޭފުޅަކު އައްޔަނު ކުރެއްވުމަށް ރައީސް މުހައްމަދު މުއިއްޒު އިއްޔެ ފޮނުވައިފި އެވެ.
އެޗްއާރްސީއެމްގެ ދެ މެންބަރެއްގެ ދައުރު ހަމަވާތީ މަޖިލީހަށް މުއިއްޒު ފޮނުއްވި ދެ ނަމުގެ ތެރޭގައި ހިމެނޭ ކުރިން ސިފައިންގޭގައި މަސައްކަތް ކުރެއްވި ބޭފުޅަކީ ހ. ސޯސަން، މުހައްމަދު ފާރިސް ތޯހާ އެވެ.
ފާރިސް ތޯހާ ވަނީ ސިފައިންގެ ދަށުން ކުރިން ހިންގަމުންދިޔަ ފުލުހުންގެ މުއައްސަސާގައި 1992 ވަނަ އަހަރުން ފެށިގެން 1997 ގެ ނިޔަލަށް އިންވެސްޓިގޭޝަން އޮފިސަރު (އައިއޯ) ގެ މަގާމު އަދާކުރައްވައިފަ އެވެ.
މީގެއިތުރުން 1997 އިން ފެށިގެން 2004 ގެ ނިޔަަލަށް ސިފައިންގޭގައި އިންސްޓްރަކްޓާ ވެޕަންސް އޮފިސަރެއްގެ ގޮތުގައި ތޯހާ ފާރިސް މަސައްކަތް ކުރެއްވި އެވެ.
އޭނާ ސިފައިންގެއިން ވަކިވެ މޯލްޑިވްސް މެރިން ކޮންޓްރެކްޓިން ކޮމްޕެނީ އަދި ސަންޓްރެވަލްސް އެންޑް ޓުއާސްގައި މަސައްކަތް ކުރެއްވި އެވެ. އެއަށްފަހު އިނގިރޭސިވިލާތުގައި ވެސް އެކި ވަޒީފާތައް އަދާކުރައްވާފައިވެ އެވެ.
މި ސަރުކާރުގައި އެސްއޯއީތަކުގެ ވެރިންނަށް ސިފައިންނާއި ފުލުހުންގެ ކުރީގެ އިސްވެރިން އައްޔަން ކޮށްފައިވާތީ އެކަމަށް އާންމު ރައްޔިތުންގެ ފާޑުކިޔުން ވަނީ އަމާޒުވެފަ އެވެ.
އެސްއޯއީތަކުގެ ވެރިންނަށް ތިއްބަވާ ކުރީގެ ސިފައިންނާއި ފުލުހުންގެ ތެރޭގައި ހިމެނެނީ ފެނަކައިގެ އެމްޑީ މޭޖާ ރިޓަޔާޑް މުހައްމަދު ނަޖާހު، އެޗްޑީސީގެ އެމްޑީ، ބްރިގޭޑިއާ ޖެނެރަލް ރިޓަޔާޑް އަލީ ޒުހައިރު، އެމްޓީސީސީ ސީއީއޯ، ފުލުހުންގެ ކުރީގެ ޑެޕިއުޓީ ކޮމިޝަނަރު އަހްމަދު ސައުދީ އެވެ.
މީގެއިތުރުން އިމިގްރޭޝަން ކޮންޓްރޯލާގެ މަގާމަށް ހަމަޖައްސާފައި ވަނީ ކުރީގެ ކޮމިޝަނާ އޮފް ޕޮލިސް އަހުމަދު ފަސީހު އެވެ.
އެޗްއާރްސީއެމްއަށް މިހާރު އައްޔަން ކުރަން މަސައްކަތް ކުރާ ތޯހާ ވަނީ، ވިލާ ކޮލެޖުން ލޯ އިން މާސްޓާސް ޑިގްރީ ހާސިލްކޮށްފަ އެވެ. އަދި އޭނާ ވަނީ ޔޫތު މިނިސްޓްރީގައި މީގެ ކުރިން އެކްޒެކެޓިވް ކޯޑިނޭޓަރުގެ މަގާމު އަދާކުރުމުގެ އިތުރުން ނެޝަނަލް ސެންޓާ ފޯ ދަ އާޓްސްގެ ހެޑްގެ މަގާމު ވެސް އަދާކޮށްފަ އެވެ.
އެޗްއާރްސީއެމަށް އައްޔަނުކުރަން ފާރިސް ތޯހާގެ އިތުރުން ދެން މުއިއްޒު ހުށަހެޅުއްވީ މ. ޕޮޕީ، މުހައްމަދު ޝަފީގް މަހްމޫދު އެވެ. އެ ދެ ބޭފުޅުންގެ އިތުރުން އިތުރު ބޭފުޅެއްގެ ނަމެއް މުއިއްޒު މަޖިލީހަށް ހުށަހަޅުއްވާފައެއް ނުވެ އެވެ.
ރައްޔިތުންގެ މަޖިލީހުގެ ރިޔާސަތުން އެ ދެ ބޭފުޅުންގެ ނަން ތަޅުމުގައި އިއްޔެ އިއްވުމަށްފަހު، އެ ނަންތައް ދިރާސާކުރުމަށް ހިއުމަން ރައިޓްސް އެންޑް ޖެންޑާ ކޮމިޓީއަށް ވަނީ ފޮނުވައިފަ އެވެ.
އެޗްއާރްސީއެމްގެ ދެ މެންބަރެއްގެ ދައުރު ހަމަވާތީ އެ މަގާމުތަކަށް ކުރިމަތިލުމަށް ރައީސް އޮފީހުން ދެ ފަހަރެއްގެ މަތިން ހުޅުވާލި އެވެ. ފުރަތަމަ ހުޅުވާލީ ޖޫން 24، ގަ އެވެ. ދެވަނަ ފަހަރަށް އަލުން މެންބަރުން ކަމަށް ކުރިމަތިލާން ޖުލައި 16، ގައި ހުޅުވާލި ސަބަބެއް ރައީސް އޮފީހުން ހާމައެއް ނުކުރެ އެވެ.
މި ނޫހަށް އެނގިފައިވާ ގޮތުގައި އެޗްއާރްސީއެމްގެ މެންބަރު ކަމަށް ޖޫން 24، ގައި ހުޅުވާލުމުން ބައެއް ބޭފުޅުން ކުރިމަތިލި އެވެ. އޭގެ ތެރޭގައި އެޗްއާރްސީއެމްގެ ކުރީގެ މެންބަރަކާއި މިހާރުގެ މެންބަރެއް ވެސް ހިމެނޭ ކަމަށް މައުލޫމާތު ލިބެ އެވެ.
އެޗްއާރްސީއެމްގެ ނައިބު ރައީސް މޫމިިނާ ވަހީދު އަދި މެންބަރު އާމިނަތު ޝިފާތު އަބްދުއްރައްޒާގުގެ މެންބަރުކަމުގެ ދައުރު އަންނަ ސެޕްޓެމްބަރު 8، ގައި ހަމަވާނެ އެވެ.
