ސަރުކާރު އޮފީސްތަކާއި ސަރުކާރު ހިއްސާވާ ކުންފުނިތަކުން ކަރަންޓު ބިލަށް ދައްކަންޖެހި ނުދައްކާވާ ފައިސާ 661 މިލިއަން ރުފިޔާއަށް އަރާފައިވާ ކަމަށް އިތުބާރު ހުރި މަސްދަރުތަކުން ބުނެފި އެވެ.
އަދަދު އާ ވާހަކަ ދެއްކި މަސްދަރުތަކުން ބުނީ ސަރުކާރު އޮފީސްތަކާއި އެސްއޯއީތަކުން ނުދައްކާ ހުރި ބިލުތަކަށް 661,609,624 ރުފިޔާ އަރާފައިވާ ކަމަށެވެ. ބައެއް އެސްއޯއީތަކުން މިލިއަނުން ސްޓެލްކޯއަށް ފައިސާ ދައްކަންޖެހިފައިވާ ކަމަށްވެ އެވެ. އޭގެ ތެރޭގައި ޕަބްލިކް ސާވިސް މީޑިއާ ހިމެނެ އެވެ.
ބިލަށް ދައްކަންޖެހޭ ފައިސާގެ އިތުރުން، ސަރުކާރުން ސްޓެލްކޯއަށް ދޭންޖެހޭ ސަބްސިޑީ ފައިސާ ވެސް ނުދޭ ކަމަށްވެ އެވެ. އެކެމަކު، ސްޓެލްކޯއިން އާންމުންނަށް ބިލު ކުރަނީ ސަބްސިޑީ ރޭޓެއްގަ އެވެ. އޭގެ ސަބަބުން ވެސް ސްޓެލްކޯއަށް ބޮޑެތި ގެއްލުންތަކެއްވެ އެވެ.
ސަރުކާރުން ސްޓެލްކޯއަށް ލިބެންޖެހޭ ފައިސާ 661 މިލިއަން ރުފިޔާއަށް އެރި އިރު، މާލެ ސަރަހައްދުން މިފަހުން ކަރަންޓު ކެނޑެން ދިމާވާ މައިގަނޑު ސަބަބަކީ ވެސް ފައިސާގެ މައްސަލަ އެވެ. ކަރަންޓު ކެނޑެނީ ސްޓެލްކޯގެ ތެޔޮ ޓޭންކުތަކަށް ބަރާބަރަށް ތެޔޮ ނޭޅިގެންނެވެ.
ޓޭންކުތަކަށް މިހާރު ތެޔޮ އަޅަނީ ދުވަހުން ދުވަހަށް، އެ ދުވަހަކަށް ބޭނުންވާ މިންވަރެއްގެ ތެލެވެ. އެހެންވެ، ތެލުގައި ހުންނަ ކުނޑިތައް ޓޭންކުގެ ފުލުގައި ހަމަޖެހިލުމަށް ވަގުތެއް ނުލިބެ އެވެ. އޭގެ ސަބަބުން، ކުނޑިތައް ފިލްޓަރަށް ޖަމާވެ، ޖަނަރޭޓަރުތަކާ ހަމައަށް ތެޔޮ ދިޔުން މެދުކެނޑެ އެވެ.
ޖޫން 1، އަދި އޭގެ ފަހުން މިދިޔަ ހޮނިހިރު ދުވަހު ވެސް މާލެ އާއި ހުޅުމާލެއިން ކަރަންޓު ދިޔައީ ފިލްޓަރުތައް ބްލޮކުވުމުން ކަމަށް މި ނޫހާ ވާހަކަ ދެއްކި މަސްދަރުތަކުން ޔަގީންކޮށްދެ އެވެ.
މާލެ، ހުޅުމާލެ އަދި ހުޅުލެއިން ޖޫން 1، ގައި ކަރަންޓު ކެނޑުނު މައްސަލަ ސީރިއަސް ކަމެއްގެ ގޮތުގައި ތަހުގީގު ކުރަން ރައީސް މުހައްމަދު މުއިއްޒު އޮތީ އަންގަވައިފަ އެވެ.
"މުޅި މާލެ، ހުޅުމާލެ އަދި ހުޅުލެ ހިމެނޭހެން ކަރަންޓު ގޮސްފައިވާ މައްސަލަ ސީރިއަސް މައްސަލައެއްގެ ގޮތުގައި ބެލުމަށް ކަމާބެހޭ ފަރާތްތަކުގައި ދަންނަވައިފިން. އަދި މިފަދަ ކަމެއް ތަކުރާރު ނުވާނޭހެން ކަރަންޓުގެ ހިދުމަތުގެ ކަންކަން އިންތިޒާމް ކުރަން ކުރަންޖެހޭ ހުރިހާ ކަމެއް ސަރުކާރުން ކުރާނެ ވާހަކަ ދަންނަވަން،" މުއިއްޒު ވިދާޅުވި އެވެ.
ނަމަވެސް މިދިޔަ ހޮނިހިރު ދުވަހު ފުލުހުން ބުނީ އެ މައްސަލައިގައި އަދި އެއްކުރެވުނީ އިބްތިދާއީ ހޯދުންތަކާއި މައުލޫމާތުތައް އެކަނި ކަމަށެވެ.
"2025 ޖޫން 1 ވަނަ ދުވަހު ގްރޭޓާ މާލެ ސަރަހައްދުން ކަރަންޓް ކެނޑުނު މައްސަލައާ ގުޅިގެން ފުލުހުން ކުރަމުންދާ ތަހުގީގުގެ އިބްތިދާއީ ހޯދުންތަކާއި މައުލޫމާތު ވަނީ އެއްކުރެވިފައި. އަދި މި މައުލޫމާތައް ބަލައި ފުލުހުން މި މައްސަލަދަނީ އިތުރަށް ތަހުގީގު ކުރަމުން،" އެ މެސެޖުގައި ފުލުހުން ބުންޏެވެ.
