ރައީސް މުހައްމަދު މުއިއްޒު މާދަމާ ބ. އަތޮޅަށް ވަޑައިގަންނަވާ ގޮތަށް ހަމަޖެހިއްޖެ އެވެ.
އެކި މަސްދަރުތަކުން އަދަދު އަށް ކަށަވަރު ކުރެވިފައިވާ ގޮތުގައި މުއިއްޒު ބ. އަތޮޅަށް މާދަމާ ފަށްޓަވާ ދަތުރުގައި އެ އަތޮޅުގެ ހުރިހާ ރަށަކަށް ވަޑައިގެންނެވުމަށް ވަނީ ހަމަޖެހިފަ އެވެ.
ބ. އަތޮޅުގެ ރަށްރަށުން އަންނަނީ މުއިއްޒުއަށް މަރުހަބާ ކިޔުމަށް އެ ރަށްތައް ޒީނަތްތެރިކޮށް، އެކި ހަރަކާތްތައް ހިންގުމަށް ތައްޔާރުވަމުންނެވެ.
މި ދަތުރަކީ ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި، އަތޮޅުތަކާ، ރަށްތަކާ، އަދި ސިޓީތަކުގެ ލޯކަލް ކައުންސިލުތަކާ ބައްދަލުކުރެއްވުމަށް މުއިއްޒު ކުރިޔަށްގެންދަވާ ސިލްސިލާ ދަތުރުތަކުގެ ތެރޭގައި ހިމެނިގެން ކުރައްވާ ދަތުރެއް ކަމަށް ވެސް ވަނީ މައުލޫމާތު ލިބިފަ އެވެ.
މުއިއްޒު އެންމެ ފަހުން އަތޮޅުތަކަށް ކުރައްވާ ދަތުރުގައި ވަޑައިގެންނެވީ ޖުލައި 21، ގައި ނ. އަތޮޅަށެވެ. މިގޮތުން ނ. އަތޮޅުގެ 13 ރަށަކަށް މުއިއްޒު ވަޑައިގަތެވެ.
ލޯކަލް ކައުންސިލް އިންތިހާބު ބޯމަތިވެފައިވާ ދަނޑިވަޅުގައި މުއިއްޒު ރަށްރަށަށް ސަރުކާރުގެ ހަރަދުގައި ވަޑައިގަންނަވާތީ އެކަމާ ބައެއް ފަރާތްތަކުން ދަނީ ސުވާލު އުފައްދަމުންނެވެ.
ވެރިކަމުގެ ފަސް އަހަރުގައި ރާއްޖޭގައި މީހުން ދިރިއުޅޭ ހުރިހާ ރަށަކަށް ދެ ފަހަރެއްގެ މަތިން ދަތުރު ކުރެއްވުމަކީ މުއިއްޒުގެ ރިޔާސީ ވައުދެކެވެ. މިދިޔަ އަހަރު ވެސް މުއިއްޒު ވަނީ ގިނަ ރަށްތަކަށް ވަޑައިގެން ކައުންސިލްތަކާއި ރައްޔިތުންނާ ބައްދަލު ކުރައްވާފަ އެވެ.
މީހުން ދިރިއުޅޭ ހުރިހާ ރަށަަކަށް ދެވަނަ ފަހަރަށް ދަތުރުކުރަން 2027 ގަައި ފަށާނެ ކަމަށް މުއިއްޒު ކުރިން ވިދާޅުވެފައިވެ އެވެ.
