ކޮލަމްބޯ، ސްރީ ލަންކާ (އޮގަސްޓް 5) - ފަލަސްތީނަށް ސަޕޯޓްކޮށް އުފާފާޅުކުރި ސްރީ ލަންކާ ގައުމީ ފުޓްބޯޅަ ޓީމުގެ ކުޅުންތެރިޔާ، މުހައްމަދު ތިލްހާމް، 2000 ޑޮލަރުން ޖޫރިމަނާ ކުރަން އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އިން ނިންމައިފި އެވެ.
މިދިޔަ ޖޫން މަހު 10 ވަނަ ދުވަހު، ލަންކާ އިން ކޮލަމްބޯގައި ޗައިނީސް ޓައިޕޭއާ ދެކޮޅަށް ކުޅުނު މެޗުގައި ލަނޑު ޖެހުމަށް ފަހު، 19 އަހަރުގެ ތިލްހާމް އުފާފާޅުކުރިއިރު، ޖޯޒީގެ ދަށުން ލައިގެން ހުރި ޓީޝާޓެއް ދައްކާލިއިރު، އޭގައި ހިތެއް ކުރަހާފައި، ލިޔެފައިވަނީ، "ޕްރޭ ފޯ ފްރީ ފަލަސްތީނު" މިހެނެވެ.
މިކަމާ ގުޅިގެން، އޭއެފްސީގެ ގަވާއިދުގެ ތެރެއިން މައްސަލަ ބަލައި، ތިލްހާމަށް ބޮޑު ޖޫރިމަނާއެއް އައުމުގެ ފުރުސަތު އޮތެވެ. އެހެން ނަމަވެސް، އޭއެފްސީއާ މަޝްވަރާކޮށް، ސްރީ ލަންކާ ފުޓްބޯޅަ ފެޑެރޭޝަނުން ވަނީ ލުއި އަދަބަކުން، ތިލްހާމްގެ މައްސަލަ ނިންމާލަން އެއްބަސްވުމަކަށް އަތުވެފަ އެވެ.
ޖޫރިމަނާ ފައިސާ ދެއްކުމަށް ތިލްހާމަށް ދީފައި އޮތީ އެއް މަހުގެ މުހުލަތެވެ.
އިޒްރޭލުން ފަލަސްތީނަށް އަރައި ދެމުން އަންނަ ލާއިންސާނީ ހަމަލާތައް ކުށްވެރިކޮށް، އެކި ޓީމުތަކުންނާއި ވަކިވަކި ކުޅުންތެރިން ޝުއޫރުފާޅުކުރުމުން، އެކި އެސޯސިއޭޝަންތަކާއި ފެޑެރޭޝަންތަކުން ފިޔަވަޅު އަޅައިފައި އެބަހުއްޓެވެ.
މިދިޔަ އަހަރުގެ އޭޕްރީލް މަހު، ފަލަސްތީނު އެފްއޭ އިން ވަނީ އިޒްރޭލް ސަސްޕެންޑް ކުރަން ފީފާ އަށް ހުށަހަޅައިފަ އެވެ. މިދިޔަ އަހަރު، ތައިލެންޑްގެ ބެންކޮކްގައި ކުރިއަށްދިޔަ ފީފާ ކޮންގްރެސްގައި، ޖޯޑަންގެ ފުޓްބޯޅަ އެސޯސިއޭޝަނުން ވަނީ ފަލަސްތީނުން އިޒްރޭލު ސަސްޕެންޑް ކުރަން ހުށަހަޅާފައިވާ ޕްރޮޕޯސަލަށް ތާއީދުކޮށްފަ އެވެ.
ފީފާ އިން އަންނަނީ އިސްރޭލާ މެދު ފިޔަވަޅު އެޅުމުގެ ކުރިން ގާނޫނީ ލަފާ ހޯދަން ޖެހޭ ކަަމަށް ބުނެ، އެކަމަށް ވަގުތުތަކެއް ނަގަމުންނެވެ. ގިނަ ގައުމުތަކުން ތުހުމަތުކުރާ ގޮތުގައި މިއީ، ފީފާ އިން ގަސްދުގައި މި ކަމަށް ފިޔަވަޅެއް ނާޅައި، ކުރިއަށްދާން ބޭނުންކުރާ އުކުޅެކެވެ.
އިޒްރޭލް ފުޓްބޯޅަ އެސޯސިއޭޝަނުން ވެސް ވަނީ މި ކަމުގައި ފީފާ އިން ރަނގަޅަށް ވިސްނާފައި ކަންކަން ނިންމަން ޖެހޭ ކަމަށް ބުނެފަ އެވެ
