ދިވެހި ސީރީޒް "ހިންތާ" އަންނަ ބުރާސްފަތި ދުވަހު މީޑިއާނެޓުގެ ވީޑިއޯކްލަބް ހިދުމަތަށް ރިލީޒް ކުރުމަށް ތައްޔާރުވެއްޖެ އެވެ.
ރާޒުވާ ކުޅިގަނޑަކާއި، ލިޔެކިޔުންތަކަކާއި، ދަންފުޅިއަކާއި ސިއްކައެއް މި ޓީޒާ އިން ފެނިގެންދާ ހިންތާގެ ޓީޒާ ނޮވެމްބަރު 23، ގައި މީސް މީޑިއާއަށް ދޫކޮށްލުމުން ސީރީޒްގައި ވާނުވާ ނޭގުނަސް ގިނަ ބައެއްގެ ޝައުގުވެރިކަން އެ ސީރީޒްއަށް އުފެދިގެން ގޮސްފައިވެ އެވެ.
ޓީޒާއަށް ފަހު، ސީރީޒްގެ ބައެއް މަންޒަރުތައް ބެލުންތެރިންނަށް ދޫކޮށްލާފައިވާއިރު، އިއްޔެ ވަނީ ސީރީޒްގެ ޓްރެއިލާ ވެސް އާންމުކޮށްފަ އެވެ.
ކޯޕަރޭޓް ތްރިލާ އެއްކަމަށްވާ، އެ ސީރީޒްގައި ފެނިގެންދަނީ ޔުމްނާ އާއި ޝިޔާޒްގެ ވާހަކައެވެ. ކާމިޔާބު ދެ ވިޔަފާރިވެރިންނެވެ. އުފާވެރި ކައިވެންޏެއްގައި ދިރިއުޅެމުން އަންނަ ދެމަފިރިންނެވެ.
ވިޔަފާރީގެ މާހައުލުގައި ދިމާވާ ހާދިސާތަކާ އެކު އެ ދެމަފިރިންގެ ކައިވެނީގެ ހަޔާތުގައި ދިމާވާ ތަފާތު އެކިއެކި ކަންކަން އެ ސީރީޒްގައި ފެނިގެންދެ އެވެ.
ހިންތާ ސީރީޒްގެ ލީޑު ރޯލުން ފެނިގެންދާނީ ޔުމްނާގެ ރޯލުން އާއިޝަތު ރާއިޝާ އަދި ޝިޔާޒްގެ ރޯލުން ސާމީ ހުސެއިން އެވެ. މިއީ ރާއިޝާ (ރާއި) ވީޑިއޯކްލަބްގެ ސީރީޒްއަކުން ފެނިގެންދާ ފުރަތަމަ ފަހަރެވެ.
ސީރީޒްގައި ޝިޔާޒްގެ ރޯލުން ފެނިގެންދާ ސާމީ، ލީޑް ރޯލަކުން ފެނިގެންދާ މިއީ ފުރަތަމަ ފަހަރެވެ. މީގެ ކުރިން ސާމީ ކުޅެފައިވާ ރޯލުތަކާއި ހިލާފަށް މި ސީރީޒްގައި ސާމިގެ އެކްޓިންގްގެ މޮޅުކަން ޓްރެއިލާ ބަލާލުމުންވެސް ފެނިގެންދެ އެވެ.
މީގެ އިތުރުން ފިލްމީ ދާއިރާގައި މަޝްހޫރު ނަންތައް ކަމުގައިވާ ހަސަން މަނިކު، މުހައްމަދު މަނިކު، އިފްނާޒް ފިރާގް، ރަޝްފާ ފާރޫގް އަދި ތާތި އާދަމް ވެސް އެކި ރޯލުތަކުން ފެނިގެންދާނެ އެވެ.
ޖުމްލަ 10 އެޕިސޯޑްގެ މައްޗަށް އެކުލެވޭ އެ ސީރީޒް މީޑިއާނެޓުގެ ކަސްޓަމަރުންނަށް އެމްޓީވީ ސާވިސް މެދުވެރިކޮށް ރާއްޖޭގެ ކޮންމެ ތަނެއްގައި ހުރެގެން ވެސް ބެލޭނެ އެވެ. އަދި އެމްއެސް ގްލޯބަލް އާއި އެމްއެސް ޑީޖިޓަލް ގްލޯބަލް މެދުވެރިކޮށް ރާއްޖެއިން ބޭރުގައި އުޅޭ މީހުންނަށް ވެސް އެ ސީރީޒް ބެލޭނެ އެވެ.
އެމް އޮރިޖިނަލްސް ބޭނާގެ ދަށުން ތައްޔާރުކުރާ މި ސީރީޒްއަކީ "އެއްކާފް" ގެ ޕްރޮޑަކްޝަނެކެވެ. ވީޑިއޯކްލަބުން ފެނިގެންދިޔަ ކާމިޔާބު އަދި މަގްބޫލު ސީރީޒް "ގަރީނާ" އަދި ފިލްމު "މަރިޔަމް" އަކީ އެއްކާފްގެ ޕްރޮޑަކްޝަނެކެވެ.
ހިންތާ ސީރީޒް ޑައިރެކްޓް ކުރަނީ މަޝްހޫރު ޑައިރެކްޓަރު އަދި އެކްޓަރު ރަވީ ފާރޫގު ކަމަށްވާއިރު، އަޒްހަރުގެ ރޯލުން އޭނާ އެ ސީރީޒުން ފެނިގެންދެ އެވެ. މިއީ އެމް އޮރިޖިނަލްސް ބެނާގެ ދަށުން ތައްޔާރުކުރާ ސީރީޒްއެއްގައި ރަވީގެ ފުރަތަމަ ޑައިރެކްޝަނެވެ.
މި ސީރީޒްގެ ވާހަކަ ތައްޔާރުކޮށްފައިވަނީ "މަރިޔަމް"، "ގަރީނާ"، "ބީވީމާ" ފަދަ ފުރިހަމަ ސްކްރީންޕްލޭތައް ލިޔެފައިވާ މޮޅު ލިޔުންތެރިޔާ އަހްމަދު ޒަރީރު އެވެ.
"ރޯލީމޭ" ސީރީޒްއާއެކު 2024 ވަނަ އަހަރު ނިންމާލުމަށްފަހު 2025 ވަނަ އަހަރު ވީޑިއޯކްލަބްއިން ގެނެސްދޭ ފުރަތަމަ ސީރީޒްއަކަށް ވެގެންދާނީ "ހިންތާ" އެވެ.
މި އަހަރު މުޅިން އާ ދިވެހި ފިލްމާއި ޑްރާމާ އަދި އެހެން ގައުމުތަކުގެ ފިލްމާއި ސީރީޒް މީޑިއާނެޓުގެ ވީޑިއޯކްލަބުން ބެލުންތެރިންނާއި ހަމައަށް ގެނެސްދިނުމަށް ހަމަޖެހިފައިވާ ކަމަށް މީޑިއާނެޓުން ބުންޏެވެ.
