ލަންޑަން (ޖެނުއަރީ 13) - ކުޅުންތެރިއަކު މަދުކޮށް ކުޅެން ޖެހުނު ނަމަވެސް ޕެނަލްޓީ ޖަހައިގެން އާސެނަލް 5-3 އިން ބަލިކޮށް، އެ ޓީމު ކަޓުވާލުމަށް ފަހު، އެންމެ ފަހުގެ ޗެމްޕިއަން، މެންޗެސްޓާ ޔުނައިޓެޑުން އެފްއޭ ކަޕްގެ އަނެއް ބުރުން ޖާގަ ހޯދައިފި އެވެ.
މެޗުގެ 61 ވަަނަ މިނިޓްގައި ޔުނައިޓެޑުގެ ޑިއޯގޯ ޑަލޮޓް އަށް ދެ ވަނަ ރީނދޫ ކާޑާ އެކު، ރަތް ކާޑު ދެއްކި މި މެޗުގައި ޕެނަލްޓީ ޖަހަން ޖެހުނީ ދެ ޓީމު 1-1 އިން އެއްވަރުވެގެންނެވެ.
އާސެނަލްގެ ދަނޑު އެމިރޭޓްސް ސްޓޭޑިއަމްގައި ޔުނައިޓެޑުން ލީޑުނެގީ 52 ވަނަ މިނިޓްގައި ބްރޫނޯ ފެނާންޑޭސް ޖެހި ގޯލުންނެވެ. މިއީ، އަލެހަންދްރޯ ގާނާޗޯ ދިން ބޯޅައަކުން ފެނާންޑޭސް ޖެހި ގޯލެކެވެ.
ޔުނައިޓެޑްގެ ޑަލޯ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކީ އާސެނަލްގެ މިކޭލް މެރީނޯ އަށް ކުރި ފައުލަކަށެވެ. ޑަލޯ އަށް ރަތް ކާޑު ދެއްކުމުން، ޔުނައިޓެޑްގެ ކުޅުންތެރިއަކު މަދުވިތާ ދެ މިނިޓް ފަހުން، އާސެނަލުން އެއްވަރުކުރީ، 63 ވަނަ މިނިޓްގައި ގަބްރިއަލް މަގާޅައެސް ޖެހި ގޯލުންނެވެ.
އާސެނަލަށް ލީޑުނަގައިދޭން މެޗުގެ 70 ވަަނަ މިނިޓްގައި މާޓިން އޮޑެގާޑް ރަނުގެ ފުރުސަތެއް ނަގާލި އެވެ. އާސެނަލްގެ ކައި ހަވާޓްޒް އަށް ޔުނައިޓެޑްގެ އޭރިއާތެރެއިން ހެރީ މެގުއާ ފައުލުކުރި ކަމަށް ބަލައި، ޕެނަލްޓީއެއް ދޭން ނިންމުމުން ދެ ޓީމުގެ މެދުގައި ހަމަނުޖެހުން ބޮޑުވި އެވެ. މައްސަލަ ބޮޑުވި މި ޕެނަލްޓީ އޮޑެގާޑް ފޮނުވާލުމުން ޔުނައިޓެޑްގެ ކީޕަރު، އަލްޓޭ ބަޔިންދީރު ވަނީ މަތަކޮށްފަ އެވެ.
ކުޅުންތެރިއަކު މަދުކޮށް ކުޅެ ވެސް ޔުނައިޓެޑުން ވަނީ މެޗު ޕެނަލްޓީއާ ހަމައަށް ގެންގޮސްފަ އެވެ. ޔުނައިޓެޑުން ފަސް ޕެނަލްޓީ ވެސް ކާމިޔާބުކުރިއިރު، އާސެނަލުން ނާކާމިޔާބުވީ ހަވާޓްޒްގެ ޕެނަލްޓީއެވެ. އޭނާ ފޮނުވާލި ޕެނަލްޓީ ކީޕަރު ބަޔިންދީރު ވަނީ މަތަކޮށްފަ އެވެ. ޔުނައިޓެޑަށް ޕެނަލްޓީތައް ކާމިޔާބުކޮށްދިނީ، ފެނާންޑޭސް، އަމަދު ޑިއާލޯ، ލެނީ ޔޯރޯ، ލިސަންދްރޯ މާޓިނޭޒް އަދި ޖޯޝުއާ ޒާކްޒީ އެވެ. އާސެނަލްގެ ޕެނަލްޓީތައް ކާމިޔާބުކުރީ، އޮޑެގާޑް، ތޯމަސް ޕާޓޭ އަދި ޑެކްލަން ރައިސް އެވެ.
ޔުނައިޓެޑުން ހަތަރު ވަނަ ބުރުގައި ކުޅޭނީ ލެސްޓާ ސިޓީއާ އެވެ.
