އާދީއްތަ ދުވަހު ދެކުނު ކޮރެއާގެ މުއާން އިންޓަނޭޝަނަލް އެއާޕޯޓަށް އެމެޖެންސީކޮށް ޖައްސަން އުޅުމުގެ ތެރޭގައި މަތިންދާބޯޓެއް ވެއްޓުނީ ލޭންޑިން ގިއަރުގެ މައްސަލައެއް ދިމާވެގެން ކަމަށް އޮފިޝަލުން ބުނެފި އެވެ.
މީހުން ސަލާމަތް ކުރުމަށް ހަރަކާތްތެރިވާ ޓީމުން އެންމެ ފަހުން ލަފާކުރި ގޮތުގައި ބޯޓުން ސަލާމަތް ކުރެވުނު ދެ މީހުން ފިޔަވައި އޭގައި ތިބި އެހެން އެންމެން ވަނީ މަރުވެފަ އެވެ. ސަލާމަތް ކުރި މީހުންގެ ތެރޭގައި ހިމެނެނީ ޕަސެންޖަރަކާއި ކްރޫ މެމްބަރެކެވެ.
ދެކުނު ކޮރެއާގެ ޔޮންހެޕް ނިއުސް އެޖެންސީން ބުނީ ލަފާކުރެވޭ ގޮތުގައި 181 މީހުންނާ އެކު ދަތުރުކުރި ބޯޓު ވެއްޓެން މެދުވެރިވީ ލޭންޑިން ގިއަރުގެ މައްސަލައެއް ދިމާވެގެންނެވެ.
ބެންކޮކުން ފުރި ޖޭޖޫ އެއާގެ ބޯޓު ވެއްޓުނީ އާދީއްތަ ދުވަހުގެ ހެނދުނު ދެކުނު ކޮރެއާގެ ގަޑިން 9:07 ގައި މުއާން އިންޓަނޭޝަނަލް އެއާޕޯޓުގެ ރަންވޭއަށް ތިރިކުރި ފަހުން ފެންސެއްގައި ޖެހިގެންނެވެ.
އެއާޕޯޓުގެ އޮފިޝަލުން ބުނީ އެމެޖެންސީކޮށް ފްލައިޓް ޖައްސަން މަސައްކަތް ކުރީ ލޭންޑިން ގިއަރުގެ މައްސަލައެއް ދިމާވެގެން ކަމަށާއި ފުރަތަމަ ފަހަރު ތިރިކުރަން އުޅެ ފެއިލްވީ ކަމަށެވެ.
ރަންވޭގައި ބޯޓު ޖެއްސުމަށް ފަހު އޭގެ ދުވެލި މަޑުނުކުރެވި އެއާޕޯޓުގެ ބޭރު ސަރަހައްދުގައި ހުރި ސްޓްރަކްޗާތަކުގައި ބޯޓު ޖެހުނީ ކަމަށް އޮފިޝަލުން ބުންޏެވެ.
އޭގެ ސަބަބުން ބޯޓަށް ބޮޑެތި ގެއްލުންތަކެއް ލިބި، އަލިފާން ރޯވި އެވެ.
މަންޒަރު ދުށް ފަރާތްތަކާ ހަވާލަދީ ޔޮންހެޕް ނިއުސް އެޖެންސީން ބުނީ ބޯޓުގެ ފުރޮޅު ފަދަ ލޭންޑިން ގިއަރުގެ ބައިތައް މަސައްކަތް ނުކުރި ކަމަށެވެ. ބެލެވޭ ގޮތުގައި އެހެން ދިމާވީ ވައިގެ ތެރެއިން ދަތުރުކުރަމުން ދަނިކޮށް ދޫންޏެއް ބޯޓުގައި ޖެހިގެންނެވެ.
