މިދިޔަ ނޮވެމްބަރު 7، ގައި ހިޔާ ފްލެޓްގެ އެޕާޓްމަންޓެއްގައި މީހަކު ރަހީނުކުރި މައްސަލައާ ގުޅިގެން ހައްޔަރުކުރި 12 މީހުން ދޫކޮށްލައި، އެ މީހުންގެ މައްޗަށް ދައުވާ ކުރަން ޕްރޮސެކިއުޓާ ޖެނެރަލް އޮފީސް (ޕީޖީ) އަށް ފޮނުވައިފި އެވެ.
ފުލުހުން ބުނީ އެ މައްސަލައާ ގުޅޭ ތަހުގީގު ނިންމައި ދައުވާ ކުރުމަށް ޕީޖީއަށް ފޮނުވީ މިދިޔަ ހޮނިހިރު ދުވަހު ކަމަށެވެ. ފުލުހުން ބުނީ މި އެންމެން ވެސް ދޫކޮށްލީ ހުޅުމާލެ ކޯޓުން ކަމަށެވެ.
ރަހީނުކުރި މައްސަލައިގައި ހިޔާގެ އެޕާޓްމަންޓަށް ފުލުހުން ވަތް އިރު، އެތަނުގެ އެތެރޭގައި ތިބި މީހުން ތިބީ ރަހީނު ކުރި މީހާގެ އިނގިލި ބުރިކޮށްލަން ތައްޔާރުވެގެން ކަމަށް އެ ހިދުމަތުން ބުނެފައިވެ އެވެ. ނަމަވެސް ފުލުހުން ވަނީ އޭނާ ސަލާމާތް ކޮށްފަ އެވެ.
ހިޔާ ފްލެޓް ހިމެނޭ ސަރަހައްދުގައި ކުށް ކުރުން އިތުރުވެގެންްދާތީ ފުލުހުން ވަނީ އެ ސަރަހައްދުގައި ސެކިއުރިޓީ އިތުރުކޮށް، ފުލުހުން ވެސް އިތުރުކޮށްފަ އެވެ.
މީގެ ކުރިން މާލޭގައި މީހަކު ރަހީނުކޮށް އިނގިލި ބުރިކޮށްލާފައިވެ އެވެ. އެ މައްސަލައާ ގުޅިގެން ވެސް ފުލުހުން ބަޔަކު ހައްޔަރުކޮށް، ތަހުގީގު ހިންގާފައިވެ އެވެ.
