ދެކުނު ކޮރެއާއިން އުފެއްދީ އުނަގަނޑުން ތިރި ވާގިނެތިފައިވާ މީހުން ހިނގަން ބޭނުންކުރާނެ ރޮބޮޓެއް

އުނަގަނޑުން ތިރި ވާގިނެތިފައިވާ މީހުންނަށް، އެ އެއްޗެއް ބޭނުންކޮށްގެން ހިނގައިބިނގައި ސިޑިތަކުން ވެސް އެރޭ ފެންވަރުގެ ލުއި ރޮބޮޓެއް، ކޮރެއާގެ ސައިންސްވެރިން އުފައްދައިފި އެވެ.

ކޮރެއާ އިންސްޓްޓިއުޓް އޮފް ސައިންސް އެންޑް ޓެކްނޮލޮޖީ (ކޭއޭއައިއެސްޓީ)ގެ އެގްޒޯސްކެލެޓަން ލެބޯޓްރީގެ ސައިންސްވެރިންނާ ހަވާލާދީ ރޮއިޓާސް ބުނިގޮތުގައި އުނަގަނޑުން ތިރި ވާގިނެތިފައިވާ މީހުން ހިނގަން ބޭނުންކުރާނެ ރޮބޮޓެއް އުފެއްދީ، އެ ފަދަ މީހުންނަށް ކޮންމެ ދުވަހެއްގެ ދިރިއުޅުމުގައި ކުރަން ޖެހޭ ހުރިހާ ކަމަކަށް ވެސް ބޭނުންކުރެވޭނެ ރޮބޮޓެއް އުފައްދަން ކުރިއަށް ގެންދާ މަޝްރޫއެއްގަ އެވެ.

އެގޮތުން އުފެއްދި ފުރަތަމަ ޕްރޮޓޯޓައިޕް ޓެސްޓްކުރީ، އެ މަޝްރޫއު ކުރިއަށް ގެންދާ ސައިންޓިސްޓުންގެ ޓީމުގައި ހިމެނޭ، އުނަގަނޑުން ތިރި ވާގިނެތިފައިވާ ސައިންޓިސްޓް ކިމް ސިއުން ވޮން އެވެ. ރޮބޮޓް ޕްރޮޓޯޓައިޕް ބޭނުންކޮށްގެން އޭނާ ގަޑިއަކު ދެ މޭލު ބާރު މިނުގައި ހިންގަވައި، ސިޑިއަކުން ވެސް އެރުއްވި އެވެ.

"އަޅުގަނޑު ކޮންމެ ތާކު އިނަސް، އެއަށް [ރޮބޮޓް އަށް] އަޅުގަނޑު ގާތަށް އާދެވޭނެ، އަދި ފުރޮޅުލީ ގޮނޑީގައި އިނަސް، ގައިގައި ހަރުކޮށްލައި، އަޅުގަނޑު ތެދުވެ ހިނގަން މަގުފަހިކޮށްދޭނެ، މިއީ މީގެ އެންމެ ތަފާތު ސިފަޔަކީ،" ކިމް ރޮއިޓާސް އަށް ވިދާޅުވެފައި ވެ އެވެ.

ރޮބޮޓް އުފެއްދި ޓީމްގެ އެހެން މެންބަރެއް ކަމަށްވާ ޕާކް ޖިއޮންސޫ ރޮއިޓާސްއަށް ބުނެފައިވާ ގޮތުގައި އެ އުފެއްދުމުގެ ހިޔާލު އައީ "އަޔަންމޭން" ފިލްމު ބަލައިގެންނެވެ.

"އަޔަން މޭން ބަލާފައި އަޅުގަނޑު ހިތަށް އެރީ ހަގީގީ ދިރިއުޅުމުގައި ރޮބޮޓަކުން މީހުންނަށް އެހީތެރިވުން އެއީ ވަރަށް ރަނގަޅު ހިޔާލެކޭ،" ޕާކް ޖިއޮން ރޮއިޓާސްއަށް ވިދާޅުވެފައި ވެ އެވެ.

"ވޯކްއޮން ސޫޓް އެފް 1"ގެ ނަން ދީފައިވާ އެ ރޮބޮޓް އުފައްދާފައި ވަނީ ޓައިޓޭނިއަމާއި އެލުމިނިއަމް ބޭނުންކޮށްގެންނެވެ. އޭގެ ބަރުދަނަކީ 50 ކިލޯ އެވެ. އިންސާނުންގެ ހުޅުތައް މަަސައްކަތްކުރާ ގޮތަށް، އޭގެ ހުޅުތައް މަސައްކަތް ކުރުވުމަށް ޓަކައި 12 މޯޓަރު ހުރެ އެވެ.

ނުވެށްޓި ތެދަށް ހުރުމަށް ޓަކައި އެ ރޮބޮޓްގެ ފައިތިލަޔާއި މަތީ ބައިގައި ސެންސަރުތައް ހުރެ އެވެ. އެއީ ސުކުންތެއްގެ ތެެރޭގައި 1،000 ސިގްނަލް ލިބިގަނެވޭ ފަދަ ސެންސަރުތަކެކެވެ. އަދި ރޮބޮޓްގެ ލޮލުގެ ގޮތުގައި މަސައްކަތްކުރަން ހަރުކޮށްފައިވާ ލެންސްތަކަކީ ވަށައިގެންވާ މާހައުލު ރަނގަޅަށް ދިރާސާކޮށް، ސިޑީތަކުގެ އުސްމިނާއި އެފަދަ އެހެން މައުލޫމާތުތައް އެއްކުރާ ލެންސްތަކެކެވެ.