ލަންޑަން (ޑިސެމްބަރު 20) - އިނގިރޭސި ލީގު ކަޕްގެ ކުއާޓާ ފައިނަލުގައި ރޭ މެންޗެސްޓާ ޔުނައިޓެޑް 4-3 އިން ބަލިކޮށް، އެ ޓީމު ކަޓުވާލި ޓޮޓެންހަމް ހޮޓްސްޕާސް ސެމީ ފައިނަލުގައި އެންމެ ފަހުގެ ޗެމްޕިއަން، ލިވަޕޫލާ ދެކޮޅަށް ކުޅެން ޖެހިއްޖެ އެވެ.
އަނެއް ސެމީ ފައިނަލުގައި އާސެނަލުން ކުޅޭނީ ނިއުކާސަލް ޔުނައިޓެޑާ އެވެ. ސެމީ ފައިނަލް ކުޅޭނީ ދެ ލެގަށެވެ.
ޓޮޓެންހަމް ހޮޓްސްޕާސް ސްޓޭޑިއަމްގައި ރޭ ކުޅުނު މެޗުގައި އެ ޓީމުން ލީޑުނެގީ ފުރަތަމަ ހާފުގައި ޑޮމިނިކް ސޮލާންކޭ ޖެހި ގޯލުންނެވެ. ދެ ވަނަ ހާފު ފަށައިގެން ލަސްތަކެއް ނުވެ، ޔުނައިޓެޑްގެ ފަހަތުން ހެދުނު ގޯހެއްގެ ފައިދާނަަގައި، ޑޭޖާން ކުލުސެވްސްކީ ވަނީ ޓޮޓެންހަމްގެ ލީޑުުޅާކޮށްދީފަ އެވެ. އަދި އޭގެ ފަހުން، ލިބުނު ފުރުސަތެއްގައި ސޮލާންކޭ ވަނީ ޓޮޓެންހަމްގެ ތިން ވަނަ ގޯލު ޖަަހައިފަ އެވެ.
ޔުނައިޓެޑްގެ ކޯޗު ރުބެން އަމޮރިމް ގެނައި ބަދަލުތަކާ އެކު، އެ ޓީމުން އެޓޭކުގައި ކުޅެން ފެށި ބޯޅަތައް ގިނަވެ، އޭގަ ތަފާތު ދެއްކި އެވެ. ޓޮޓެންހަމްގެ ގޯލްކީޕަރު، ފްރޭޒާ ފޮސްޓާ ހެދި ދެ ގޯހެއްގެ ފައިދާނަގައި، ޓޮޓެންހަމް ކޮޅަށް ޔުނައިޓެޑްގެ ލަނޑުތައް ޖެހީ، ބަދަލެއްގެ ގޮތުގައި ކުޅެން އެރި ދެ ކުޅުންތެރިން ކަމަށްވާ، ޔޯސުއާ ޒާކްޒީ އާއި އަމަދު ޑިއާލޯ އެވެ.
އަމަދު ވަނީ ނަތީޖާ ހަމަހަމަކޮށްދޭން ރަނގަޅު ހަަމަލާއެއް ފޮނުވާލައިފަ އެވެ. އެކަމަކު، ކީޕަރު ފޮސްޓާ އެ ބޯޅަ މަތަކުރި އެވެ.
ޓޮޓެންހަމް އިން އަނެއްކާ ވެސް ދެ ގޯލުގެ ލީޑެއް ނެގީ، ސޮން ހެއުން މިން ކޯނަރަކުން ވައްދާލި ގޯލުންނެވެ. މި ގޯލު ޖެހީ ފައުލެއް ކޮށްގެން ކަމަށް ޔުނައިޓެޑްގެ ގޯލު ރޭ ބެލެހެއްޓި ތުރުކީގެ ކީޕަރު، އަލްޓޭ ބަޔިންދީރު އެޕީލް ކުރި ނަމަވެސް ރެފްރީ ނިންމީ ގޯލަކަށެވެ.
އިތުރު ވަގުތުގައި ޔުނައިޓެޑްގެ ޖޯނީ އެވާންްސް ގޯލެއް ޖެހި ނަމަވެސް، އެ ޓީމު މުބާރާތުގައި ދެމި އޮތުމަށް މާ ބޮޑު ކަމެއް ދެން ނުކުރެވުނެވެ.
