ޕްރާގް، ޗެކް ރިޕަބްލިކް (ޑިސެމްބަރު 13) - ޔުއެފާ ޔޫރޮޕާ ލީގުގައި ރޭ މެންޗެސްޓާ ޔުނައިޓެޑުން ފަހަތުން އަރައި ޗެކް ރިޕަބްލިކްގެ ވިިކްޓޯރިއާ ޕްލެޒެން އަތުން 2-1 އިން މޮޅުވިއިރު، ޓޮޓެންހަމް ހޮޓްސްޕާސް އިން 1-1 އިން ރޭންޖާސްއާ އެއްވަރުކޮށްފި އެވެ.
ވިކްޓޯރިއާ ޕްލެޒެން އިން ލީޑުނެގީ، ދެ ވަަނަ ހާފުގެ ކުރީކޮޅުގައި ޔުނައިޓެޑްގެ ކީޕަރު، އަންދްރޭ އޮނާނާ އަށް ހެދުނު ގޯހެއްގެ ފައިދާނަގަ އެވެ. މިއީ، ކުރިން ޕްރިމިއާ ލީގުގައި ބާންލީ އަށް ކުޅުނު ފޯވާޑް މަޓޭޔާ ވީޑްރާ ޖެހި ގޯލެކެވެ.
ޔުނައިޓެޑް މޮޅުކޮށްދިނީ ބަދަލަކަށް ކުޅެން އެރި ޑެންމާކްގެ ފޯވާޑް ރަސްމުސް ހޮއިލުންޑް ޖެހި ގޯލުތަކުންނެވެ. މި މުބާރާތުގައި ހޮއިލުންޑް މި ވަނީ ފަސް ގޯލު ޖަހައިފަ އެވެ.
ރުބެން އަމޮރިމް، ޔުނައިޓެޑްގެ ކޯޗުކަމާ ހަވާލުވި ފަހުން އެ ޓީމުން ޔޫރޮޕާ ލީގުގައި ކުޅުނު ދެ މެޗުން ވެސް މޮޅުވެފައިވާއިރު، ޔުނައިޓެޑް ވަނީ ހަ މެޗުން 12 ޕޮއިންޓް ހޯދައި، ހަތް ވަނަ އަށް އަރައިފަ އެވެ. ޔޫރޮޕާ ލީގުގެ ލީގު ބުރުގެ ގަދަ އަށް ޓީމަށް ގަދަ 16 ބުރުގެ ސީދާ ޖާގަ ލިބޭއިރު، ޔުނައިޓެޑް މިހާރު ވަނީ އެ ޖާގަ ހޯދުމުގެ ފުރުސަތު ބޮޑުކޮށްފަ އެވެ.
އަށް ވަަނައިގައި އޮތް ޓޮޓެންހަމް އާއި ނުވަ ވަނައިގައި އޮތް ރޭންޖާސް ކުޅުނު މެޗު ދިޔައީ ފޯރިގަދަކޮށެވެ. އެ ގޮތުން، ދެ ވަނަ ހާފު ފެށިތާ 81 ސިކުންތު ތެރޭގައި ރޭންޖާސް އަށް ލީޑުނަގައިދިނީ ހަމްޒާ އިގަމާނޭ އެވެ. ރޭންޖާސްގެ ވާދަވެރި ސެލްޓިކްގެ ކުރީގެ ކޯޗު އަންގޭ ޕޮސްޓެކޮގްލޫ ކޯޗުކޮށްދޭ ޓޮޓެންހަމް އިން އެއްވަރުކުރި ލަނޑު ޖެހީ މެޗުގެ ފުރިހަމަ ވަގުތު ހަމަވާން 15 މިނިޓަށް ވެފައި ހުއްޓަ އެވެ. މެޗުގެ 75 ވަނަ މިނިޓްގައި މި ލަނޑު ޖެހީ، ޑޮމިނިކް ސޮލާންކޭ ދިން ބޯޅައަކުން ޑޭޖާން ކުލުސެވްސްކީ އެވެ.
