ލަންޑަން (ޑިސެމްބަރު 3) - ދުނިޔޭގެ އެންމެ ގިނަ ދުވަސްވީ އެއް ފުޓްބޯޅަ މުބާރާތް، އިނގިރޭސި އެފްއޭ ކަޕްގެ ތިން ވަނަ ބުރުގައި މުބާރާތުގެ އެންމެ ކާމިޔާބު ދެ ޓީމު، މެންޗެސްޓާ ޔުނައިޓެޑާއި އާސެނަލް ބައްދަލުކުރަން ޖެހިއްޖެ އެވެ.
އަންނަ މަހުގެ 11 ވަނަ ދުވަހު، އެފްއޭ ކަޕްގެ ތިން ވަނަ ބުރުގެ ކުޅުން ފެށޭއިރު، ގިނަ ބަޔެއްގެ ސަމާލުކަން އަމާޒުވެފައިވަނީ، އާސެނަލް ދަނޑުގައި ޔުނައިޓެޑާ ކުޅޭ މެޗެވެ. އެންމެ ފަހުގެ ޗެމްޕިއަން، ޔުނައިޓެޑުން 13 ފަހަރު އެފްއޭ ކަޕް ކާމިޔާބުކޮށްފައިވާއިރު، އާސެނަލުން ވަނީ 14 ފަހަރު މި މުބާރާތް ކާމިޔާބުކޮށްފަ އެވެ.
އާސެނަލާއި ޔުނައިޓެޑުން މީގެ ކުރިން ވަނީ އެފްއޭ ކަޕްގައި ގިނަ ފަހަރުތަކެއް މަތިން ބައްދަލުކޮށްފަ އެވެ. އިނގިރޭސި ޕްރިމިއާ ލީގުގައި އަންނަ ބުރާސްފަތި ދުވަހުގެރޭ، އާސެނަލުން ޔުނައިޓެޑާ ދެކޮޅަށް ކުޅޭނެ އެވެ.
އެފްއޭ ކަޕްގެ ތިން ވަނަ ބުރަކީ ޕްރިމިއާ ލީގާއި ޗެމްޕިއަންޝިޕްގެ 44 ޓީމާއި ދަށް ޑިވިޝަނާއި، އެއްވެސް ޑިވިޝަނަކަށް ނިސްބަތްނުވާ 20 ޓީމު ވާދަކުރާ ބުރެވެ.
ތިން ވަނަ ބުރުގެ އެހެން މެޗުތަކަށް ބަލާއިރު، ލިވަޕޫލުން ބައްދަލުކުރާނީ ތިން ވަނަ ޑިވިޝަނުގެ އެކްރިންޓަން ސްޓޭންލީއާ އެވެ. މެންޗެސްޓާ ސިޓީން ކުޅެނީ ތިން ވަނަ ޑިވިޝަނުގެ ސަލްފޯޑްއާ އެވެ. އަދި ޗެލްސީން ނުކުންނާނީ ތިން ވަނަ ޑިވިޝަނުގެ މޯކޭމްބްއާ ދެކޮޅަށެވެ.
