ޗައިނާގެ ނޫސްވެރިއެއް ކަމަށްވާ ޑޮންގް ޔޫޔޫ، ގައުމަށް ގައްދާރުވުމުގެ ކުށް ސާބިތުވާ ކަމަށް އެ ގައުމުގެ ކޯޓަކުން ކަނޑައަޅައި އޭނާ ހަތް އަހަރު ދުވަހަށް ޖަލަށް ލައިފި އެވެ.
ޔޫޔޫ ޖަލަށްލީކަން ހާމަކޮށް، އޭނާގެ އާއިލާއިން ނެރުނު ބަޔާނެއްގައި އެ ހުކުމް ސިފަކުރީ ބޮޑު ބޭއިންސާފެއްގެ ގޮތުގަ އެވެ.
ޗައިނާގެ ކޮމިއުނިސްޓް ޕާޓީން ހިންގާ ގުއާންމިން ޑެއިލީގެ އެޑިޓަރެއްގެ ގޮތުގައި މަސައްކަތްކުރަމުން އައި، އުމުރުން 62 އަހަރުގެ ޔޫޔޫ ހަތް އަހަރަށް ޖަލަށްލާން، ބެއިޖިންގެ ނަމްބާ ޓޫ އިންޓަމީޑިއޭޓް ޕީޕަލްސް ކޯޓުން ހުކުމް ކުރީ އިއްޔެގެ ވަގުތެއްގަ އެވެ. ޔޫޔޫގެ އާއިލާއިން ނެރުނު ބަޔާނަކާ ހަވާލާދީ ބައިނަލްއަގުވާމީ ނޫސް އެޖެންސީތަކުން ބުނީ އޭނާ ގައުމަށް ގައްދާރުވިކަމަށް އެ ކޯޓުން ކަނޑައެޅީ ޖަޕާނުގެ ޑިޕްލޮމޭޓުންތަކަކާ އެކު ކުރިން ބޭއްވި ބައްދަލުވުމަކާ ގުޅުވައިގެންނެވެ.
ބަޔާނުގައި ޔޫޔޫގެ އާއިލާއިން ބުނިގޮތުގައި އޭނާއަށް އިއްވި ހުކުމުގައި ޖާސޫސީ ޖަމާއަތެއްގެ ގޮތުގައި ސިފަކޮށްފައިވާ ޑިޕްލޮމޭޓުންނަކީ ޖަޕާނުން ޗައިނާއަށް ކަނޑައަޅާފައިވާ ސަފީރުގެ މަގާމުގައި ކުރިން ހުންނެވި ހީޑިއޯ ޓަރޫމީއާއި ޝަންހާއީގައި މިހާރު ވެސް ހުންނެވި ޗީފް ޑިޕްލޮމޭޓް މަަަސަރޫ އޮކާޑާ ވެސް ހިމެނިވަޑައިގަންނަވާ ގޮތުން ޖަޕާނުގެ ޑިޕްލޮމޭޓުންނެވެ.
ޔޫޔޫއަށް ހުކުމްކުރި އިރު ޗައިނާގެ ފުލުހުން ވަނީ ކޯޓުގެ ސަލާމަތީ ކަންތައްތައް ވަރުގަދަކޮށް އާއްމުންނަށް ކައިރިނުވެވޭ ގޮތް ހަދައިފަ އެވެ. އެ ސަރަހައްދުގައި އެވަގުތު ތިބި ނޫސްވެރިން ވެސް ދުރަށްދާން ފުލުހުން އެންގި އެވެ.
ޗައިނާ ފުލުހުން ޔޫޔޫ ހައްޔަރުކުރީ ޖަޕާނުގެ ޑިޕްލޮމޭޓުންނާ އެކު މެންދުރުގެ ކެއުމެއްގައި އިންދާ 2022 ވަނަ އަހަރު އެވެ.
އޭނާއަށް އިއްވީ ބޭއިންސާފު ހުކުމެއް ކަމަށް އާއިލާއިން ބުނާ އިރު އޭނާ މިނިވަން ކުރަން ގޮވާލައި، ބައިނަލް އަގުވާމީ ބައެއް ޖަމިއްޔާ ޖަމާއަތްތަކުން ވެސް ވަނީ ބަޔާންތައް ނެރެފަ އެވެ.
