ޖުލައި 24، ގައި މއ. މަސްފަން ގެއަށް ދިވެހި ފިރިހެނަކު ވައްދައި އެ މީހާއަށް ބިރު ދައްކައި އޮރިޔާން ކުރުމުގެ އިތުރުން އަނިޔާ ކުރުމަށް ފަހު އެ މީހާ އަތުން ފޭރުނު ތިން މީހެއްގެ މައްޗަށް ކްރިމިނަލް ކޯޓުން ޖަލު ހުކުމެއް އިއްވައިފި އެވެ.
އެ މައްސަލައިގައި ފޭރުނު މީހާގެ ބޭންކް އޮފް މޯލްޑިވްސް (ބީއެމްއެލް) އެކައުންޓުން 45،000ރ. ފޭރުނެެވެ. އެގޮތުން ކޭޝް ކާޑު އަތުލައި ޕިން ކޯޑު ހޯދުމަށްފަހު 25،000ރ. އަދި އިންޓަނެޓް ބޭންކިންއިން 20،000ރ. ފޭރުނެވެ.
އެ މައްސަލައިގައި ތިން ދައުވާއެއް ސާބިތުވެ ޖަލަށްލުމަށް ހުކުމް ކުރީ:
- އާއިޝަތު، މއ. މަސްފަން، 43.
- މުހައްމަދު ރީހާން، މއ. މަސްފަން، 27.
- ޝަފީގު އިބްރާހިމް، ސޯމާ، ސ. ހިތަދޫ، 35.
އެ ތިން މީހުންގެ މައްޗަށް ކުރީ ފޭރުމުގެ ދައުވާ، އެނގިހުރެ ހުއްދަނޫން ގޮތުގައި މައުލޫމާތު ހޯދުން އަދި އަނިޔާއެއް ދިނުމުގެ މައްސަލަ އެވެ. އެ ތިން މައްސަލައަށް ވެސް ދައުވާކުރި ތިން މީހުން ވަނީ އިއުތިރާފްވެފަ އެވެ.
އޭގެތެރެއިން އެނގިހުރެ ހުއްދަ ނޫން ގޮތުގައި މައުލޫމާތު ހޯދި މައްސަލައިގައި އެ ތިން މީހުންގެ މައްޗަށް އިއްވީ ހަތަރު މަހާއި 24 ދުވަހުގެ ޖަލު ހުކުމެކެވެ. އަދި އަނިޔާ ދިން މައްސަލައިގައި އެ ތިން މީހުންނަށް އިއްވީ 18 ދުވަހުގެ ޖަލު ހުކުމެކެވެ.
އޭގެއިތުރުން ފޭރުމުގެ މައްސަލައިގައި އެ ތިން މީހުންގެ މައްޗަށް ނުވަ މަހާއި 18 ދުވަހުގެ ޖަލު ހުކުމެއް އިއްވި އެވެ.
ބަންދުގެ މުއްދަތު ކެނޑުމަށްފަހު ފޭރުމުގެ މައްސަލައިގައި އާއިޝަތު ޖަލު ހުކުމް ތަންފީޒު ކުރަން ކަނޑައަޅާފައި ވަނީ ފަސް މަހާއި 24 ދުވަސް ކަމަށްވާއިރު، ރީހާންގެ މައްޗަށް އިއްވީ ފަސް މަހާއި 23 ދުވަހުގެ ހުކުމެކެވެ. އަދި ޝަފީގުގެ މައްޗަށް އިއްވީ އަށް މަހާއި 18 ދުވަހުގެ ޖަލު ހުކުމެކެވެ.
