ބްރުސެލްސް، ބެލްޖިއަމް (ނޮވެމްބަރު 15) - ޔުއެފާ ނޭޝަންސް ލީގު އޭގައި ރޭ ކުޅުނު މެޗުތަކުގައި ނެރުނު ނަތީޖާތަަކަށް ފަހު ކުއާޓާ ފައިނަލުން އިޓަލީ އާުއި ފްރާންސުން ޖާގަހޯދައިފި އެވެ.
ލީގު އޭގެ ގްރޫޕް ދޭއްގައި ރޭ އިޓަލީން ވަނީ ރަށުންބޭރުގައި ބެލްޖިއަމް އަތުން 1-0 އިން މޮޅުވެފަ އެވެ. މި ގްރޫޕްގެ އަނެއް މެޗުން އިޒްރޭލާ ކުޅެގެން ފްރާންސް ވަނީ 0-0 އިން އެއްވަރުވެފަ އެވެ.
ގްރޫޕްގެ އެއް ވަނައިގައި އިޓަލީ އޮތީ ފަސް މެޗުން 13 ޕޮއިންޓާ އެކު އެވެ. ދެ ވަނައިގައި އޮތް ފްރާންސަށް ފަސް މެޗުން ވަނީ 10 ޕޮއިންޓް ލިބިފަ އެވެ. މި ދެ ޓީމަށް ގްރޫޕްގެ ގަދަ ދޭއް ކަށަވަރުވެ، ކުއާޓާގެ ޖާގަ ވަނީ ޔަގީންވެފަ އެވެ. މި ގްރޫޕްގެ ތިން ވަނައިގައި އޮތީ ފަސް މެޗުން ހަތަރު ޕޮއިންޓާ އެކު އެވެ. ފުލުގައި އޮތް އިޒްރޭލަށް ފަސް މެޗުން ލިބިފައިވަނީ އެއް ޕޮއިންޓެވެ.
ބެލްޖިއަމް ދަނޑުގައި ކުޅެގެން އިޓަލީން މި މެޗުން ކާމިޔާބުކުރީ މެޗުގެ ކުރީކޮޅުގައި ލަނޑު ޖަހައިގެންނެވެ. މެޗުގައި ފެނިގެންދިޔަ ހަމައެކަނި ގޯލު ޖެހީ 11 ވަނަ މިނިޓްގައި ސަންޑްރޯ ޓޮނާލީ އެވެ. މިއީ ޖިއޮވާނީ ޑި ލޮރެންޒޯ ހުސްކޮށްލާފައި ދިން ބޯޅައަކުން ޓޮނާލީ ޖެހި ގޯލެކެވެ. ނަތީޖާ ހަމަހަމަކުރަން ކުރި މަސައްކަތުގައި، ބެލްޖިއަމްގެ ވައުޓް ފައެސް ބޮލުން ޖެހި ބޯޅައެއް ވަނީ ދަނޑިއަށް އަމާޒުވެފަ އެވެ.
ފްރާންސުން އިޒްރޭލް ކޮޅަށް 24 ހަމަަލާ ފޮނުވާލިއިރު، އިޒްރޭލްގެ ގޯލްކީޕަރު ޑެނިއަލް ޕެރެޓްޒް ވަނީ ފްރާންސުން ފޮނުވާލި އަށް ހަަމަލާއެއް ހުއްޓުވައިފަ އެވެ.
އަންނަ އަހަރު މާޗް މަހު ކުޅޭ ނޭޝަންސް ލީގުގެ ކުއާޓާ ފައިނަލުގެ ޖާގަ ޔަގީންކޮށްފައިވަނީ، އެންމެ ފަހުގެ ޗެމްޕިއަން، ސްޕެއިނާއި ޖަރުމަނެވެ.
ލީގު އޭ އަށް ޕްރޮމޯޓްވާން އިންގްލެންޑަށް މުހިންމު މޮޅެއް
ނޭޝަންސް ލީގުގެ ލީގު ބީގެ ދެ ވަނަ ގްރޫޕްގައި އިންގްލެންޑުން ވަނީ ރަށުންބޭރުގައި ކުޅުނު މެޗުގައި 3-0 އިން ގްރީސް ބަލިކޮށްފަ އެވެ. މީގެ މަހެއްހާ ދުވަސް ކުރިން ގްރީސް އިން ވަނީ ވެމްބްލީގައި، 2-1 އިން އިންގްލެންޑް ބަލިކޮށްފަ އެވެ. އެކަމަކު، އެތަންސްގައި ރޭ ކުޅުނު މެޗުގައި އިންގްލެންޑް ފެނުނީ ތަފާތު ރޫހެއްގައި ކުޅެ ނަތީޖާ ނެރުނުތަނެވެ.
އިންގްލެންޑް ޓީމަށް ރޭގެ މެޗުގައި ލީޑުނަގައިިދިނީ ހަތް ވަނަ މިނިޓްގައި އޮލީ ވަޓްކިންސް އެވެ.
އިންގްލެންޑުން ފަހު ދެ ގޯލު ޖެހީ ދެ ވަނަ ހާފުގަ އެވެ. އެ ގޮތުން، މެޗުގެ 78 ވަނަ މިނިޓްގައި އިންގްލެންޑްގެ ދެ ވަނަ ގޯލަކީ ގްރީސްގެ ކީޕަރު، އޮޑީސިއަސް ވްލަޝޯޑިމޯސް އަތުން ބައިކޮޅަށް ވަން ގޯލެކެވެ.
މެޗުގައި އިންގްލެންޑްގެ ފަހު ގޯލު ޖެހީ، 83 ވަނަ މިނިޓްގައި ކާޓިސް ޖޯންސް އެވެ. މިއީ، އިންގްލެންޑްގެ ގައުމީ ޓީމަށް އޭނާ ޖަހައިދިން ފުރަތަަމަ ގޯލެވެ.
މި ނަތީޖާއާ އެކު، މި ގްރޫޕްގެ އެއް ވަނައިގައި އިންގްލެންޑް އޮތީ ފަސް މެޗުން 12 ޕޮއިންޓް ހޯދައި، ދެ ވަަނައިގައި އޮތް ގްރީސް އަށް ވެސް ފަސް މެޗުން 12 ޕޮއިންޓް ލިބުނު ނަމަވެސް ލަނޑުގެ ތަފާތުންނެވެ. ގްރޫޕްގެ އެއް ވަނަ އަށް ލީގު އޭގެ ސީދާ ޕްރޮމޯޝަނެއް ލިބޭނެ އެވެ. ދެ ވަނަ އަށް ދާ ޓީމެއް ޖެހޭނީ ލީގު އޭ އަށް ޕްރޮމޯޓްވާން ޕްލޭއޮފެއް ކުޅޭށެވެ.
މި ގްރޫޕްގެ ތިން ވަނައިގައި އޮތީ، ފިންލެންޑް އަތުން 1-0 އިން މޮޅުވި އަޔަލެންޑް އެވެ. އަޔަލެންޑަށް ފަސް މެޗުން ހަ ޕޮއިންޓް ލިބިފައިވާއިރު، ފަސް މެޗު ކުޅެގެން ފުލުގައި އޮތް ފިންލެންޑަށް އަދި ޕޮއިންޓެއް ނުލިބެ އެވެ.
