ރައީސް ޑރ. މުހައްމަދު މުއިއްޒުގެ ވެރިކަމުގައި ގޭންގު ކުށްތަކަށް ދާއިމީ ނިމުން ގެނައުމަށް ގާނޫނުތައް އިސްލާހުކޮށް އެންމެ ހަރުކަށި ފިޔަވަޅު އަޅާނެ ކަމުގެ އިންޒާރު ހޯމްލޭންޑު ސެކިއުރިޓީ މިނިސްޓަރު އަލީ އިހުސާން ދެއްވައިފި އެވެ.
ހިޔާ 9 ވަނަ ޓަވަރުގެ އެޕާޓްމެންޓެއްގައި ރަހީނުކޮށްގެން ގެންގުނު ދިވެއްސަކު ސަލާމަތްކޮށް، 12 މީހަކު ހައްޔަރުކުރުމަށް ފަހު، ރޭ ދަންވަރު މިނިސްޓަރު އިހުސާން ބައެއް މީޑިއާތަކަށް ދެއްވި އިންޓަވިއެއްގައި ވިދާޅުވީ ދިވެހިރައްޔިތުންގެ ސަލާމަތާއި ރައްކާތެރިކަމަކީ އަދުގެ ސަރުކާރަށް ވަރަށް މުހިއްމު ކަމެއް ކަމަށާއި އެއީ ރައީސް ޑރ. މުހައްމަދު މުއިއްޒު އެއްވެސް ވަރަކަށް ދޫދެއްވާނެ ކަމެއް ނޫން ކަމަށެވެ.
"ކުށްކުރާ ފަރާތްތަކާ ދޭތެރޭގައި ގާނޫނުގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅާނަން،" އޭނާ ވިދާޅުވި އެވެ.
ބައެއް އެޕާޓްމެންޓުތަކަކީ ކުށުގެ ހާލިތަކެއްކަން ފާހަގަ ކުރައްވައި، އިހުސާން ވިދާޅުވީ އެ ތަންތަން ކުއްޔަށް ހިފައިގެން ތަކުރާރުކޮށް ކުށްކުރާކަން ފާހަގަ ކުރެވޭނެ ނަމަ ގާނޫނުގެ ތެރެއިން އެ ތަންތަން ދައުލަތަށް ނެގޭ ކަމަށް ވާނަމަ ގަނާގަނެ ކަމަށެވެ. އަދި ހިޔާ ޓަވަރުތަކުގައި ހުރި އެފަދަ ތަންތަނުގެ ވެރިންނާ ވާހަކަ ދައްކާނެ ކަމަށް އޭނާ ވިދާޅުވި އެވެ.
ގޭންގު ކުށްތައް އިތުރުވެގެން ދިޔައީ ގާނޫނުތައް ހުރި ގޮތުންކަން އިހުސާން ވިދާޅުވި އެވެ.
"ރާއްޖޭގައި ގާނޫނުތައް ހެދިގެން އައިއިރުގައި ކުށްކުރާ ފަރާތަށް ރައްކާތެރިކަން ހޯދަ ދިނުމަށްޓަކައި ކުށްކުރާ ފަރާތް ސަލާމަތްކުރުމަށްޓަކައި ހެދެން އޮތް ހުރިހާ ގާނޫނެއް ހަދައިގެން އަޅުގަނޑުމެން މިތިބީ، އަޅުގަނޑުމެންނާ ހިސާބަށް އައިއިރު،" އޭނާ ވިދާޅުވި އެވެ.
ކުށުގެ މާހައުލުން މީހުން ދުރުކުރުމަށްޓަކައި ކުށަށް ނުދާނެ ގޮތަކަށް ގާނޫނު ބައްޓަން ކުރުމުގެ އެހާ ބޮޑު ވިސްނުން އޮތްކަން ކުރިން ފެންނަން ނެތް ކަމަށާއި ހަރުކަށި ފިޔަވަޅު އެޅޭ ގޮތަށް ގާނޫނުތައް އިސްލާހު ކުރަނީ އެހެންވެ ކަމަށް އިހުސާން ވިދާޅުވި އެވެ.
މިސާލެއްގެ ގޮތުގައި އޭނާ ނެންގެވީ ގޭންގު ކުށްތަކާ ގުޅޭ ގާނޫނާއި މަސްތުވާތަކެއްޗާ ބެހޭ ގާނޫނެވެ. އެ ދެ ގާނޫނު އިސްލާހުކޮށް، ތަކުރާރުކޮށް ކުށްކުރާ ތަންތަން ގާނޫނުގެ ތެރެއިން ދައުލަތަށް ނެގުމަކީ އަމާޒު ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން ފުރަތަމަ ވެސް މި ބަލަން، ދެކެން ބޭނުންވާ ދުވަހަކީ މި ހުށަހަޅާ ގާނޫނު ވުޖޫދަށް އައިސް އަމަލީ ސިފަ ގެންނަން އަޅުގަނޑުމެން ބޭނުންވާ ދުވަސް. އެއީ އަޅުގަނޑު ދަންނަވާނީ މިހާރު މި އުފެދިފައި އޮތް ކުށުގެ މާހައުލު ހައްލު ކުރުމަށް އެޅޭނެ އެންމެ ބޮޑު ފިޔަވަޅު،" އިހުސާން ވިދާޅުވި އެވެ.
"މިކަމަށް ހައްލެއް ލިބޭނެ އަޅުގަނޑުމެން މި ގާނޫނުތަކަށް ގެންނަ ބަދަލުން."
އިތުރު ތަފްސީލެއް އޭނާ ނުދެއްވަ އެވެ.
މިހާރު ވެސް ކުށުގެ މާހައުލު އޮތް މިންވަރުން ފުލުހުންނަށް ކަންކަން ކުރެވޭނެ ވަރަށް ގާނޫނުގެ ތެރެއިން ލިބެންޖެހޭ ބާރާއި ހަތިޔާރު ހުރި ކަމަށް ވެސް އިހުސާން އެއްބަސްވެވަޑައިގަތެވެ. ނަމަވެސް، ބައެއް ގާނޫނުތައް ހުރި ގޮތުން ވަރަށް ފަސޭހަ ކަމާއެކު ކުށްކުރާ މީހުން ދޫވެގެން ދާކަން ވެސް އޭނާ ވިދާޅުވި އެވެ.
ކުށް ނުކުރާ މީހަކާމެދު ނުހައްގުން ފިޔަވަޅު އެޅިގެން ނުވާނެ ކަމަށާއި އެ ރައްކާތެރިކަން ވެސް އޮންނަން ޖެހޭނެ ކަމަށް އިހުސާން ވިދާޅުވި އެވެ. އަދި އިންސާނީ ހައްގުތައް ވެސް ރައްކާތެރިވާންޖެހޭނެ ކަމަށް ވެސް އޭނާ ވިދާޅުވި އެވެ.
"އެހެން ނަމަވެސް އަޅުގަނޑަށް ހީވަނީ އަޅުގަނޑުމެންގެ ގައުމުގައި ތަންކޮޅެއް ފުޅާވެފަހެން މިއޮތީ. އެ ވީވީނުން ގޮސް ތަކުރާރުކޮށް އެންމެގެ ލޯމަތީގައި ކުށްކުރާ މީހާ ވެސް ކުޑަކުޑަ އިދާރީ ކުށެކޭ ކިޔާފައި ނުވަތަ ނަގަންޖެހޭ ދިމާލަކުން ނުނެގުމުގެ ފިޔަވަޅެކޭ ކިޔާފައި އެމީހާ ކުށްނުކުރާ ކަމަށް ހަދާފައި އެ މީހާ މުޖުތަމައުގެ ތެރެއަށް އެބަ ދޫވޭ،" އިހުސާން ވިދާޅުވި އެވެ.
