އާއްމުންގެ މެދުގައި ވެސް މަގުބޫލު ރިއަލިޓީ ޝޯއެއް ކަމަށްވާ "ޝާކް ޓޭންކްސް"ގެ 16 ވަނަ ސީޒަން މިއަދު ހިޓްސް ނައު ޗެނަލުގައި ޕްރިމިއާ ކުރަން ހަމަޖެހިއްޖެ އެވެ.
މިއަދުން ފެށިގެން ކޮންމެ ބުރާސްފަތި ދުވަހެއްގެ ހަވީރު 05:00 ގައި މީޑިއާނެޓްގެ ޗެނަލް "ހިޓްސް ނައު"އިން އެ ޝޯ ދުރަށް ދެއްކުމަށް ވަނީ ހަމަޖެހިފަ އެވެ.
"ޝާކް ޓޭންކްސް"އަކީ އެ ޝޯގެ ބައިވެރިން ވާދަވެރި މާހައުލެއްގައި ވިޔަފާރީގެ މަޝްވަރާތައްކޮށް އެންމެ ރަނގަޅު ހިޔާލެއް ގެންނަ ފަރާތެއް މޮޅުވާ ގޮތަށް ފަރުމާ ކުރެވިފައިވާ ރިއަލިޓީ ޝޯ އެކެވެ.
އެ ޝޯގެ 15 ސީޒަން މިހާތަނަށް ކާމިޔާބު ކަމާއެކު ނިންމާލެވިފައިވާއިރު އެއިން ކޮންމެ ސީޒަނެއްގައި ވެސް ބައިވެރިންނަށް ތަނަވަސް ފުރުސަތުތަކެއް ފަހިވެގެންދިޔަ އެވެ. އަދި އެ ޝޯ އަކީ ބެލުންތެރިންނަށް ވެސް ވިޔަފާރީގެ ފުރުސަތުތައް ތަނަވަސް ކުރަން ހިޔާލުތައް ލިބިގެންދާ ޝޯއެކެވެ.
މި ފަހަރުގެ ސީޒަން މިހާރު ވަނީ އެމެރިކާގައި ދައްކަން ފަށާފަ އެވެ. އެގޮތުން, ފާހަގަކޮށްލަން ޖެހޭ ކަމަކީ މީޑިއާނެޓުގެ ހިޓްސް ނައު ޗެނަލްގައި މިފަހަރު ސީޒަން ދައްކަން މި ފަށަނީ އެމެރިކާއާ ދާދި އެއްކޮށެވެ.
މީޑިއާނެޓަކީ މުނިފޫހި ފިލުވުމުގެ ދުނިޔެ ދިވެހިންނާއި ހަމައަށް ގެނެސްދިނުމުގައި ފާއިތުވި 19 އަހަރު އެންމެ ގާތް އެކުވެރިއެއް ގޮތުގައި މަސައްކަތްކުރަމުން އަންނަ ފަރާތެވެ.
ދިވެހި، ހިންދީ، އިނގިރޭސި އަދި އެހެނިހެން ބަސްތަކުގެ ޝޯވްތަކުގެ އިތުރުން ކުޅިވަރުގެ ތަފާތު އެކި ރަހަތަކުގެ ކޮންޓެންޓް ގެނެސްދޭ ޗެނަލްތައް މީޑިއާނެޓުންދަނީ ރާއްޖޭގެ އެކި ކަންކޮޅުތަކުގެ ޓީވީ އަދި މޯބައިލް ސްކްރީންތަކާއި ހިސާބަށް ގެނެސްދެމުންނެވެ.
