އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާންއާ މެދު ކޮމިޝަނާ އޮފް ޕޮލިސް އަލީ ޝުޖާއު ހިތްހަމަނުޖެހިގެން އޭނާގެ މަގާމު އިއްޔެ ބަދަލުކޮށްފި އެވެ.
"އަދަދު" އަށް އެނގިފައިވާ ގޮތުގައި ޝިފާންއާ މެދު ސީޕީ ހިތްހަމަނުޖެހުނީ މެސެޖިން ޕްލެޓްފޯމެއްގައި ހަދާފައި އިން ގްރޫޕެއްގައި ކުރި މުއާމަލާތަކާ ގުޅިގެންނެވެ.
ފުލުހުން ބުނީ އެ ހިދުމަތުގެ އޮނިގަނޑަށް ގެނައި ބަދަލެއްގެ ދަށުން ހެޑް އޮފް ދަ އޮފީސް އޮފް ދަ ކޮމިޝަނާގެ މަގާމުން، ހެޑް އޮފް ސާވިސް ޑިވެލޮޕްމަންޓް ޑައިރެކްޓަރޭޓުގެ މަގާމަށް ޝިފާން ބަދަލު ކޮށްފައިވާ ކަމަށެވެ.
އެ ބަދަލާއެކު ސާވިސް ޑިވެލޮޕްމަންޓުގެ ހެޑަކަށް ހުންނެވި މޫސާ އަލީ ވަނީ ހެޑް އޮފް ދަ އޮފީސް އޮފް ދަ ކޮމިޝަނާގެ މަގާމަށް ހަމަޖައްސާފައި ކަމަށް ވެސް ފުލުހުން ބުންޏެވެ.
ޝިފާންއަކީ ފުލުހުންގެ ތަރުޖަމާނެވެ. ނަމަވެސް އެ މަގާމުން އޭނާ ދުރުކޮށްފައިނުވާ ކަމަށް މައުލޫމާތު ވަނީ ލިބިފަ އެވެ. ނަމަވެސް އެ މަގާމުން ޝިފާން ދުރު ކުރަން ހަމަޖެހިފައިވާ ކަމަށް އެކި މަސްދަރުތަކުން ވަނީ އެނގިފަ އެވެ.
މިކަމާ ގުޅިގެން ޝިފާން އަދި ސީޕީ ޝުޖާއުގެ ބަހެއް ވެސް މިހާތަނަށް ލިބިފައެއް ނުވެ އެވެ.
