ރައީސް ޑރ. މުހައްމަދު މުއިއްޒަށް ދެވަނަ ދައުރެއް ދޭން ޖެހޭ ކުޑަ ސަބަބެއް ނަމަވެސް ނެތް ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް މިއަދު ވިދާޅުވެއްޖެ އެވެ.
މި ސަރުކާރާއެކު މަސައްކަތް ކުރަމުންދާ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ ނައިބު ރައީސްކަން ވެސް ކުރައްވާ އައްބާސް އެކްސްގައި ވިދާޅުވީ، މި ފަހުން ރާއްޖޭގެ 25 ރަށަށް ދެވުނުއިރު ރައީސް މުއިއްޒުގެ ސަރުކާރު ރަނގަޅޭ ބުނި އެންމެ މީހަކާ ވެސް ދިމާނުވާ ކަމަށެވެ.
"މިހާ އަވަހަށް ރައްޔިތުންގެ އިތުބާރު ގެއްލުނު ވެރިކަމެއް ފާއިތުވި 17 އަހަރު ނުދެކެން. ފަށާފައި ހުއްޓިފައި ހުރި ޕްރޮޖެކްޓެއް ހުރީ ހުއްޓިފަ. އަލުން އާ ކަމެއް ނުކުރެވޭތަނުގައި ސަރުކާރު ނިސްބަތްވާ ކުންފުނިތަކުގެ މުވައްޒަފުންގެ މުސާރައާ އިނާޔަތްތައް ކުޑަކުރުމުގެ ސަބަބުން އާއިލާތައް މިވަނީ ވަރަށް ބޮޑަށް ނިކަމެތި ވެފަ،" އޭނާ ލިޔުއްވާފައިވެ އެވެ.
ކުރިއަށް އޮތް ތަނުގައި ކަންކަން ހަމައަކަށް އެޅި ރައްޔިތުން އެދޭ ގޮތަށް ރައީސް ވެރިކަން ކުރައްވާނެ ކަމަށް އުންމީދު ކުރައްވާ ކަމަށާއި ބިނާކުރަނިވި ފާޑުކިޔުންތަކާއެކު ރައްޔިތުންގެ ލާބަޔަށް ސަރުކާރަށް އެއްބާރުލުން ދެއްވާނެ ކަމަށް ވެސް އައްބާސް ވިދާޅުވި އެވެ.
ސަރުކާރާމެދު ނުރުހުން ފާޅުކޮށް އައްބާސް ޕޯސްޓުތަކެއް ކުރައްވަމުން ގެންދަވާއިރު އޭނާގެގެ ދަރިފުޅު ހިމެނޭ ގޮތަށް މި ސަރުކާރުގެ ސިޔާސީ މަގާމުތަކުގައި ތިބި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ އިސް އޮފިޝަލުންތަކެއް ސަރުކާރުން ވަނީ ސެޕްޓެމްބަރު 26، ގައި ވަކިކޮށްފަ އެވެ.
އެމްޑީއޭ އަކީ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދުގެ ސިޔާސީ ޕާޓީ އެވެ. އެ ޕާޓީން ރައީސް ޑރ. މުހައްމަދު މުއިއްޒުގެ ސަރުކާރާއެކު ދަނީ މަސައްކަތް ކުރަމުންނެވެ. މިދިޔަ އަހަރު އޮތް ރިޔާސީ އިންތިހާބުގެ ދެވަނަ ބުރުގައި އެމްޑީއޭއިން ތާއީދުކުރީ ޕީއެންސީއަށެވެ. އެއާއެކު ރައީސް މުއިއްޒު އެކުލަވާލި ސަރުކާރުގެ ސްޓޭޓް މިނިސްޓަރުންގެ ފެންވަރުން ފެށިގެން އެމްޑީއޭގެ މެންބަރުންނަށް ވަނީ މަގާމުތައް ދީފަ އެވެ.
އެ ޕާޓީގެ "ސްލޮޓު" ތަކުގައި ތިބި ސިޔާސީ މުވައްޒަފުންތަކެއް ވަކިކުރަން ސަރުކާރުން ނިންމާފައި މިވަނީ 2028 ގައި އޮންނަ ރިޔާސީ އިންތިހާބުގައި ވާދަކުރައްވަން ސިޔާމް ނިންމަވާފައިވަނިކޮށެވެ. އެ ވާހަކަ މި ނޫހުން ރިޕޯޓު ކޮށްފައިވާނީ ސެޕްޓެމްބަރު 19، ގަ އެވެ.
