އިސްލާމީ ގައުމުތަކުގެ ޖަމިއްޔާ, އޯގަނައިޒޭޝަން އޮފް ދި އިސްލާމިކް ކޯޕަރޭޝަން (އޯއައިސީ) ގެ އިކޮނޮމިކް އެންޑް ކޮމާޝަލް ކޯޕަރޭޝަން އޮފް ދަ އޯގަނައިޒޭޝަން އޮފް ދި އިސްލާމިކް ކޯޕަރޭޝަން (ކޮމްކެކް) ކޯޑިނޭޝަން އޮފީހުން ބާއްވާ 23 ވަނަ ކޮމްކެކް ޓުއަރިޒަމް ވޯކިން ގްރޫޕު ބައްދަލުވުމުގައި ޝެފްސް ގިލްޑް އޮފް މޯލްޑިވްސްއިން ބައިވެރިވެއްޖެ އެވެ.
ތުރުކީގެ ވެރިރަށް އަންކާރާގައި އިއްޔެއިން މިއަދުގެ ނިޔަލަށް ބޭއްވި އެ ބައްދަލުވުމުގެ މައުލޫއަކީ "ޑިވެލޮޕިންގ އެންޑް ބްރޭންޑިން ގެސްޓްރޮނޮމީ ޓުއަރިޒަމް ޑެސްޓިނޭޝަންސް ވިތިން އޯއައިސީ" ނުވަތަ އޯއައިސީގެ ގައުމުތަކުގައި ގެސްޓްރޮނޮމީ ޓުއަރިޒަމް މަންޒިލުތައް ތަރައްގީކުރުމާއި ބްރޭންޑުކުރުމެވެ.
ރާއްޖޭގެ ވަފުދުގައި ޝެފްސް ގިލްޑް އޮފް މޯލްޑިވްސްގެ ފަރާތުން ބައިވެރިވެވަޑައިގަތީ އެ ޖަމިއްޔާގެ ސެކްރެޓަރީ ޖެނެރަލް, ޝެފް ފާތިމަތު އުމަރު އެވެ.
ފާތިމަތި އުމަރު ވަނީ ގެސްޓްރޮނޮމީ ޓުއަރިޒަމްގައި ދިވެހިރާއްޖޭގެ ތަޖުރިބާ (ކޭސް ސްޓަޑީޒް) ހިއްސާކުރައްވައި, ގެސްޓްރޮނޮމީ ޓުއަރިޒަމް ތަރައްގީކޮށް ބްރޭންޑުކޮށް އަދި ޕޮޒިޝަން ކުރެވިދާނެ ގޮތްތަކާ ބެހޭގޮތުން ރިކޮމެންޑޭޝަންސް ބައްދަލުވުމުގައި ހިއްސާ ކުރައްވާފަ އެވެ.
އެ ބައްދަލުވުމުގައި އޯއައިސީގެ މެމްބަރު ދެ ގައުމު ކަމުގައިވާ ޔޫގަންޑާގެ އިތުރުން ދިވެހިރާއްޖޭގެ ތަޖުރިބާ އަދި ގޮންޖެހުންތަކާ ބެހޭގޮތުން ފުޅާކޮށް މަޝްވަރާކުރި އެވެ.
ފާތިމަތު އުމަރަކީ "އެގްޒެކެޓިވް ޝެފް"ގެ މަގާމު ރާއްޖޭގައި އަދާކުރެއްވި އެންމެ ފުރަތަމަ އަންހެން ޝެފް އެވެ. އޭނާއަށް ވަނީ 2024 ގައި ކަލިނަރީ އާޓްސްގެ ދާއިރާއިން މީހުން ބިނާކުރުމާއި ތަރައްގީކުރުމުގެ ރޮނގުން ހިތްވަރު ދިނުމުގެ ގައުމީ އިނާމު ވެސް ލިބިވަޑައިގެންފަ އެވެ. އަދި 2022 ގައި ސީޖީއެމް ޝެފް އެވޯޑްސްގައި "އެޑިއުކޭޝަން ޝެފް"ގެ އެވޯޑު ވެސް އޭނާ ހާސިލް ކުރެއްވި އެވެ.
އެ ބައްދަލުވުމުގައި ބައިވެރިވާ ފަރާތްތަކުގެ މަޝްވަރާގެ އަލީގައި ގައުމުތަކުގައި ގެސްޓްރޮނޮމީ ޓުއަރިޒަމް ތަރައްގީކުރަން މެންބަރު ގައުމުތަކަށް ހުށަހަޅާނެ ޕޮލިސީ ރެކޮމެންޑޭޝަންސްތަކެއް ކަނޑައަޅައި، އެ ޕޮލިސީ ރެކޮމެންޑޭޝަންތައް, ކޮމްކެކްގެ 40 ވަނަ މިނިސްޓީރިއަލް ސެޝަނަށް ހުށަހެޅުމަށް ވަނީ ހަމަޖެހިފަ އެވެ.
އެ ބައްދަލުވުމުގައި ބައިވެރިވުމުގެ ފުރުސަތު ޝެފްސް ގިލްޑްއަށް ފުރުސަތު ފަހިކޮށްދިނީ ޓޫރިޒަމް މިނިސްޓްރީންނެވެ.
ސީޖީއެމްއަކީ ރާއްޖޭގައި މަސައްކަތްކުރާ ޝެފުން ތަމްސީލުކުރުމަށް އުފެއްދި އެންމެ ފުރަތަމަ، އަދި ހަމައެކަނި ނޮން-ޕްރޮފިޓް އަދި ނޮން-ގަވަރންމެންޓް ޖަމިއްޔާއެވެ. އެ ޖަމްޢިއްޔާގެ މަގްސަދަކީ ރާއްޖޭގައި ކަލިނަރީ ފަންނު ކުރިއެރުވުމެވެ.
އެ ޖަމިއްޔާއަކީ ދުނިޔޭގެ ޝެފުންގެ ޖަމިއްޔާ، ވޯލްޑް އެސޯސިއޭޝަން އޮފް ޝެފްސް ސޮސައިޓީސް (ވޯލްޑްޝެފްސް)އިން ރާއްޖޭގެ ގައުމީ ކަލިނަރީ ޖަމްޢިއްޔާގެ ގޮތުގައި އެންޑޯޒްކުރާ ޖަމިއްޔާ އެވެ.
