ފަލަސްތީނުގައި ނަސްލުހޭދު ކުރުމެއް ހިންގަމުން އަންނަ އިޒްރޭލުގެ ޕާސްޕޯޓު މަނާ ކުރާނެ ކަމަށް ބުނުމަށްފަހު އެ މަސައްކަތް ނުކުރާތީ ސަރުކާރަށް ވަރަށް ބޮޑަށް ފާޑުވިދާޅުވެ، ފަލަސްތީނުގެ ރައްޔިތުން ނައްތާލުމުން ދިވެހި ސަރުކާރުން އިޒްރޭލުގެ ޕާސްޕޯޓު މަނާކޮށްފާނެ ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
އިޒްރޭލުގެ ޕާސްޕޯޓު މަނާ ނުކުރުމުގެ އުޒުރަކަށް މި ސަރުކާރުން ދައްކަނީ ރައްޔިތުންގެ މަޖިލީހުގެ އިޖުރާއަތު ކަމަސް ޕީޕަލްސް ނެޝަނަލް ފްރަންޓުގެ އޮފީހުގައި ބޭއްވި ޖަލްސާގައި ވާހަކަ ދައްކަމުން ޔާމީން ވިދާޅުވި އެވެ. ނަމަވެސް އެ އިޖުރާއަތުތައް އޮއްވައި، ދައުރުން ބޭރުން ޖަލްސާއެއް ބާއްވައިގެން ކުންފުނީގެ ގާނޫނަށް ކުޑަ އިސްލާހެއް ގެނެއިކަން ޔާމީން ފާހަގަ ކުރެއްވި އެވެ.
"އެއްކޮޅުން އަޅުގަނޑުމެން މި ބުނަނީ އިސްލާމީ ދައުލަތެއް ނޫން ނަމަ އިސްލާމީ ނަސްލެއް ނައްތާލަނީއޭ. މިކޮޅުގައި މި ތިބީ އިޖުރާއަތުގައި އަޅައިގަނެފައި. ނަސްލު ނައްތާލައި ނިމޭއިރު އިޖުރާއަތުން ޖާގަ ލިބޭ ދުވަހަކުން ﷲ ގެ ރަހުމަތުން ތިކަން ފާސްވާނެ ކަންނޭނގެ،" ޔާމީން ވިދާޅުވި އެވެ.
އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާ ކުރަން އިދިކޮޅު މޯލްޑިވިއަން ޑިމޮކްރެޓިކް ޕާޓީން އޮތީ ހުށަހަޅައިފަ އެވެ. ކޮމިޓީއަކަށް މިހާރު ފޮނުވައިގެން އުޅެނީ އެ ބިލެވެ. އެ ބިލު އެހެން އޮއްވައި، ގާނޫނުތަކަށް އިސްލާހު ގެނެސްގެން، އިޒްރޭލުގެ ޕާސްޕޯޓު މަނާ ކުރާނެކަން ސަރުކާރުން އިއުލާނު ކުރީ ޖޫން 2، 2024، ގަ އެވެ.
ނަމަވެސް އެއަށްފަހު އެންމެ ދެ މަސް ދުވަސް ވެސް ނުވަނީސް ސަރުކާރުން ވަނީ އިޒްރޭލުގެ ޕާސްޕޯޓު މަނާ ކުރުމާ ގުޅޭ ގޮތުން ތަފާތު ވާހަކައެއް ދައްކައި، ވާހަކަ ބަދަލުކޮށްގަ އެވެ.
"ބައެއް ބޭފުޅުންގެ ހަމަ ވަރަށް ބޮޑު ކަންބޮޑުވުމެއް އެއީ މިހާރު ބިލު ހުށަހެޅިފައި އޮތް ގޮތުން، އިޒްރޭލުގެ ޕާސްޕޯޓް ހޯލްޑްކުރާ ފަލަސްތީނުގެ ވަރަށް ބައިވަރު ރައްޔިތުން ވެސް އެބަތިބި، މިލިޔަނުން ގުނައިލެވޭ، އެހެންވީމާ ބްލެންކެޓް ބޭންއެއް އަޅުގަނޑުމެން އެހެން ކޮށްފިކަމުގައި ވަނީ ނަމަ ކިހިނެތްތޯ ވާނީ، މިއީ ކުޑަކޮށް ވިސްނައިލަން ޖެހޭ ކަހަލަ ކަންކަން،" ޖުލައި 13، ގައި ބަންޑާރަ ނައިބު އަހުމަދު އުޝާމް ވިދާޅުވެފައިވެ އެވެ.
