ފުވައްމުލައް ސިޓީގެ އިރުމަތީގައި ހަރުކޮށްފައި އޮތް ކަނދުފައްޗެއްގައި ފުލުހުންގެ ލޯންޗެއްގައި ބަޔަކު ގަވާއިދާ ހިލާފަށް މަސްވެރިކަން ކުރި މައްސަލައެއް ފުލުހުން ބަލަން ފަށައިފި އެވެ.
އެކަމާ ގުޅިގެން "އަދަދު" އިން ކުރި ސުވާލަކަށް ޖަވާބު ދެމުން ފުލުހުން ބުނީ މައްސަލައާ ގުޅިގެން ބަލަން ޖެހޭ ކަންތައްތައް ބަލަމުން އަންނަ ކަމަށެވެ.
ސޯޝަލް މީޑިއާގައި ދައުރުވަމުންދާ ފޮޓޯ އާއި ވީޑިއޯތަކުން ފެންނަ ގޮތުގައި ފުލުހުންގެ ލޯންޗުން މަސްވެރިކަން ކުރީ ރަތް ބޮއި ކަނދުފައްޗެއް ކައިރިންނެވެ.
އެ ކަނދުފައްޗަކީ ކަނޑުމަހުގެ ދޮށީގެ މަސްވެރިކަން ކުރަން ހާއްސަކޮށް ހަރުކޮށްފައިވާ ކަނދުފައްޗެކެވެ. އެބާވަތުގެ ކަނދުފަތިތަކުގެ ކައިރިން އެހެން މަސްވެރިކަން ކުރުމަކީ މަނާ ކަމެކެވެ.
މައުލޫމާތު ލިބިފައިވާ ގޮތުގައި ފުލުހުންގެ ލޯންޗު އެތަނަށް ގޮސް ކުރީ ވަދު ނަނުގެ މަސްވެރިކަމެވެ. ކަނދުފަތީގެ ކައިރީގައި ފީނުމަކީ މަނާކަމެއް ކަމަށް ވާއިރު ފުލުހުންގެ ލޯންޗުގައި އެތަނަށް ދިޔަ މީހުން ވަނީ ކަނދުފަތީގެ ކައިރިއަށް ކަނޑަށް ވެސް ފައިބައިފަ އެވެ.
އެތަނުން މީގެ ކުރިން ދޮށީގެ މަސްވެރިކަން ފިޔަވައި އެހެން ބާވަތުގެ މަސްވެރިކަން ކޮށްގެން ފިޝަރީޒް މިނިސްޓްރީން ބައެއް ރިސޯޓްތައް ވެސް ޖޫރިމަނާ ކޮށްފައިވާ ކަމަށް މައުލޫމާތު ލިބެ އެވެ.
ފުލުހުންގެ ލޯންޗު ބޭނުންކޮށްގެން މިގޮތަށް މަސްވެރިކަން ކުރުމުން އާންމުންގެ ގިނަ ބައެއްގެ ފާޑު ކިޔުން ފުލުހުންނަށް ވަނީ އަމާޒުވެފަ އެވެ.
