ކްރެޑިޓް ރޭޓިން އެޖެންސީ މޫޑީސް އިން ރާއްޖޭގެ ކްރެޑިޓް ރޭޓިން ޑައުންގްރޭޑު ކުރުމުން ވެސް ފިނޭންސް މިނިސްޓްރީން އަނެއްކާ ވެސް އާމްދަނީ އާއި ހަރަދުގެ ރިފޯމްގެެ ވާހަކަ ދައްކައިފި އެވެ.
ފިނޭންސް މިނިސްޓްރީން މިރޭ ނެރުނު ނޫސް ބަޔާނެއްގައި ބުނީ މޫޑީސްއިން ރާއްޖޭގެ ރޭޓިން ދަށްކުރީ ތަކެތީގެ އަގުބޮޑުވެ، ރާއްޖެއަށް މާލީގޮތުން ދިމާވެފައިވާ އެކި ދަތިތަކުގެ އިތުރުން ފައިސާ ހޯދުމަށް ދަތިވެ، ފިސްކަލް ރިފޯމް ތަންފީޒުކުރުން ލަސްވުމުން ކަމަށެވެ.
ރާއްޖެއިން ފިސްކަލް އަދި ދަރަނި މެނޭޖްކުރުމަށް އަޅަން ޖެހޭ ފިޔަވަޅުތައް އަޅަން ތައްޔާރުވެފައިވާކަން ފާހަގަކޮށް ފިނޭންސުން ބުނީ ސަރުކާރުން ދަނީ އާމްދަނީއާއި ހަރަދުގެ ސިޔާސަތުތައް ވަށާޖެހޭ ގޮތެއްގައި ރިފޯމްކޮށް، މެދުރާސްތާއަށް ދަރަނި ނަގަން ޖެހޭ މިންވަރު ކުޑަކުރުމަށް ފިޔަވަޅުތަކެއް އަޅައި ތަންފީޒު ކުރަން ތައްޔާރުވަމުން ކަމަށެވެ.
ފިނޭންސުން ބުނީ އަޅާ ހަރުދަނާ ފިޔަވަޅުތަކުގެ ސަބަބުން ރާއްޖެއަށް ދިމާވެފައިވާ ހާލަތު ރަނގަޅު ކުރެވޭނެ ކަމުގެ އުންމީދު އެބައޮތް ކަމަށެވެ. އެގޮތުން ރިފޯމްއަށް ކުރާ މަސައްކަތަށް ބައިނަލްއަގުވާމީ އެޖެންސީތަކުގެ އެހީތެރިކަން ލިބޭކަން ވެސް ވަނީ ފާހަގަކޮށްފަ އެވެ.
އޭގެއިތުރުން ސަރުކާރުގެ ކުންފުނިތައް ރިފޯމްކުރުމުގެ މަސައްކަތްތައް ފަށާފައިވާ ކަމަށާއި އޭގެ ސަބަބުން ވެސް ހަރަދު ކުޑަކުރަން ފިޔަވަޅުތަކެއް އެޅިގެންދާނެ ކަމަށް ވެސް ފިނޭންސުން ބުންޏެވެ.
ފިނޭންސުން ބުނީ ސިޔާސަތުތައް ތަންފީޒުވުމުން މި އަހަރާއި މެދުރާސްތާގައި ފަތުރުވެރިކަމުގެ ދާއިރާއަށާއި އިގްތިސާދަށް އަންނާނެ ކަމަށް ބެލެވޭ ކުރިއެރުމާއެކު ދައުލަތުގެ ފިސްކަލް އަދި ދަރަނީގެ ދެމެހެއްޓެނިވިކަން އިއާދަ ކުރެވޭނެ ކަމަށެވެ.
ފިޗް ރޭޓިންގްސް އިން ރާއްޖޭގެ ލޯންގް ޓާމް ފޮރިން ކަރަންސީ އިޝޫއާ ޑިފޯލްޓް ރޭޓިން "ސީސީ" އަށް އޯގަސްޓް 29، ގައި ދަށް ކުރުމުމާ ގުޅިގެން ވެސް ފިނޭންސުން ދެއްކީ ރިފޯމްއަށް ކުރާ މަސައްކަތުގެ ވާހަކަ އެވެ.
