ފުލުހުންގެ ވެހިކަލެއްގައި ގަވާއިދާ ހިލާފަށް ބަޔަކު އުފުލާ ވީޑިއޯއެއް އާންމުވެއްޖެ އެވެ.
ސޯޝަލް މީޑިއާގައި ދައުރުވަމުންދާ މި ވީޑިއޯގައި ފެންނަނީ ފުލުހުންގެ ލޮރީއެއްގެ ފަހަތުގައި އެއްވެސް ރައްކާތެރިކަމެއް ނެތި ބަޔަކު ކޮޅަށް ތިބި މަންޒަރެވެ. އެ ވެހިކަލް ދުއްވަމުން ގެންދިޔައީ މާލެއާއި ހުޅުމާލެއާ ދެމެދު އޮންނަ ހައިވޭގަ އެވެ.
މިގޮތަށް ހައިވޭ މަތީ މީހުން އުފުލުމަކީ ގަވާއިދާ ހިލާފު ކަމެކެވެ. އަދި އެފަދައިން މީހުން އުފުލާ އާންމު ވެހިކަލްތައް ހުއްޓުވާ މީގެ ކުރިން ފުލުހުން ވަނީ ޖޫރިމަނާވެސް ކޮށްފަ އެވެ.
މި ވީޑިއޯ ސޯޝަލް މީޑިއާގައި އާންމުވެފައިވަނީ މި ފަހުން ހުޅުމާލެ ސެންޓްރަލް ޕާކު ކައިރި ހިނގި އެކްސިޑެންޓެއްގައި 23 އަހަރު ޒުވާނަކު މަރުވި ހާދިސާއާ ގުޅިގެން އެއްވެސް ބަޔަކަށް ފުލުހުންގެ ތަހުގީގާ ގުޅޭ މައުލޫމާތު ނުދޭ ކަމަށް ބުނެ ކުރި ޕޯސްޓަކާއެކު އެވެ.
ވީޑިއޯ ޕޯސްޓުކޮށްފައިވަނީ އާންމުކޮށް އެކި ހަބަރުތައް ގެނެސްދޭ "އެމްވީ ކްރައިސިސް" ގެ އެކައުންޓުންނެވެ. މިކަމާ ގުޅިގެން ފުލުހުންގެ ރަސްމީ ބަހެއް މިހާތަނަށް ލިބިފައެއް ނުވެ އެވެ.
